1 Bõsbudạ 21 - সান্তালী বাইবেল

Lạṛhạikoakʼ lekha

¹ Soetan do Israelko upạrteye teṅgoyena. Uni do Dạudakʼ monre Israelko lekhako lạgitʼe uskurkedea.

² Dạud do unre Joab ar lạṛhại phạdkoren subedarkoe metatʼkoa, “Berseba khon Dan hạbicʼ Israelko lekhakope. Ona tayom ruạṛ hecʼkate lạiyạńpe jemon onkoakʼ lekhań baḍae daṛeakʼ.”

³ Menkhan Joab doe roṛ ruạṛkeda, “Probhu Isor do jemon acʼren hoṛko mitʼsae doboṛe saṅge ocoko. E ińren kisạ̃ṛ maharaj, noko sanamkoge cetʼ amren guti doko baṅkana? Enḍekhan cedakʼ ińren Probhu Isor do niạ kạmi lạgitʼe khojkana? Ar cedakʼ baṅ am iạte goṭa Israel jạtrenko dusiko hoyokʼ?”

⁴ Menkhan rajakʼ hukum do Joab ṭhen onage tahẽyena; onate Joab do senkate goṭa Israel disạme dãṛã ạcurketʼte Jerusalemteye ruạṛ hecʼena.

⁵ Ar okoe do tarwaṛeko calao daṛeakʼ onkoakʼ lekha do Dạude baḍae ocokedea. Onakoakʼ lekha do goṭa Israelko talare gelmitʼ lakh ar Jihudạren do pon lakh eaegel hajar hoṛko tahẽkana.

⁶ Joab do menkhan ona lekhare Liwi ar Benjạmin gusṭiren hoṛko do bae doholetʼkoa, ente rajakʼ niạ hukum uni do bhage bae metatʼa.

⁷ Niạ hukum do Isorakʼ mẽtʼre hõ bạṛicʼakʼge tahẽkana; onate uni do Israel jạtrenkoe sạjạiketʼkoa.

⁸ Unre Dạud do Isore metadea, “Noa kạmikate in doń ghạṭ akada. Ar ńitokʼ do am ṭheniń nehõrokʼ kana, niạ behokakʼ khon iń amren guti do ikạkạńme baṛe. Iń do lelha hoṛ lekageń kạmi akada.”

⁹ Unre Probhu Isor do Dạudren gonok nạbi Gade metadea,

¹⁰ “Am do senkate Dạud niạ katha metaeme, ‘iń Probhu Isor do pea sạjại modre mitʼṭecʼ bachao hatao joṅiń metam kana. Onako khon okaṭakʼem bachao joṅ ona lekage amreń paṛao ocoya.’ ”

¹¹ Unre Gad do Dạud ṭhen senkateye menkeda, “Probhu Isor do niạko mod khon mitʼṭecʼ bachao hatao joṅe menakatʼmea.

¹² Pe bochor hạbicʼ akal, se amren bạiriko ṭhen bhagaokate onko samaṅ khon pe cando hạbicʼ ńir baṛae, se pe mãhã hạbicʼ Probhu Isorakʼ tarwaṛe, metakʼme disạm cetanre mahamạri. Ona pe din Probhu Isorren goḍet do Israel reakʼ sanam jaegare ḍahao marao reakʼe kạmiya. Ado ńitokʼ hudiskate lạiyạńme, okoe ińe kolakadiń uni do cetʼ iń roṛ ruạṛaea?”

¹³ Dạud do Gade metadea, “Iń do ạḍi muhinreń paṛao akana. Manwa tire jemon aloń paṛaokʼ, ona khon boroṅ Probhu Isorakʼ tiregeń paṛaokʼma, ente uniyakʼ daya do asambheṛgetaea.”

¹⁴ Unre Probhu Isor do Israel cetanre mitʼṭecʼ mahamạriye kolkeda ar onate Israelren eaegel hajar hoṛko gocʼena.

¹⁵ Jerusalem nagraha ḍahao marao lạgitʼ Isor do mitʼṭen goḍete kolkedea. Menkhan uni goḍet do tinre ona kạmi lạgitʼe calakʼkan tahẽkana unre Probhu Isor do ona bebạṛicʼ sạjại khon mone ạcurketʼtaea. Uni do ḍahao maraoicʼ goḍete metadea, “Tahẽ ocoakʼme, ḍherge hoyakana, ńitokʼ do ti or ruạṛ tam.” Probhu Isorren goḍet do unre Jebusiạ Arownakʼ khạrại ṭhene teṅgo akan tahẽkana.

¹⁶ Inạ oktere Dạud do cetan secʼ beṅgetʼketʼteye ńelkeda, Probhu Isorren goḍet do rimilreye teṅgo akana ar uniyakʼ ti reakʼ tarwaṛe do Jerusalem cetanre tul akana. Noa ńelte Dạud ar murubbiko do gõṛẽ kicricʼko horokʼ akatʼ tahẽkanrege otreko taber hapeyena.

¹⁷ Unre Dạud do Isore metadea, “Hoṛko lekhako reakʼ hukum do cetʼ ińge bạń emakada? Kại do ińgeń kại akada, ar behokakʼ hõ ińgeń behok akada. Noko ma eken bhiḍi leka, noko do cetʼko ceka akatʼte? E Probhu, ińren Isor, amakʼ ti do iń ar ińakʼ gharońjrenko cetanre baṛe rakabtam, menkhan hoṛko cetanre niạ mahamạri do alo baṛe paṛaokʼma.”

¹⁸ Unre Probhu Isorren goḍet do Gade hukumadea Dạud do jemon Jibusiạ Arownakʼ khạrạite senkate Probhu Isor ńutumte onḍe mitʼṭecʼ pinḍe benaoma.

¹⁹ Ar Dạud do Probhu Isorakʼ hukumte Gadakʼ katha leka onḍeye senena.

²⁰ Ar Arowna do guhum ewer ewerte tinreye ạcurena unre uni do serma goḍete ńelkedea, ar uni sãote uniren okoe ponea hoponko tahẽkan onko doko okoyena.

²¹ Dạud doe sen laha idiyen khan Arowna do khạrại bạgikate uni samaṅre senkate otre ombakʼkateye ḍobokʼadea.

²² Dạud do uniye metadea, “Amakʼ noa khạrại do iń imạńme. Iń do do nonḍe Probhu Isor ńutumte mitʼṭecʼ pinḍ iń benaoa jemon hoṛkore oka mahamạri hoyokʼkan ona do thirokʼ. Ar purạ damtege ona do iń ṭhen ạkhrińme.”

²³ Arowna do Dạude metadea, “Ma ona do amge hataome. Ińren maharaj oka bhageye hudisetʼkan onage baṛeye onkaema. Ńelme, jeredokʼ samaṅokʼakʼ lạgitʼ iń do ińren ḍaṅgrakoń emokʼkana, ar sahan lạgitʼ do lelenakʼ kaṭ ar anaj samaṅokʼakʼ lạgitʼ do guhumiń emokʼkana. Iń do noa sanamakʼge amiń emam kana.”

²⁴ Menkhan Dạud raj do Arownae metadea, “Baṅa, onka do baṅ hoyokʼa. Iń do purạ damtegeń hataoa. Ente okaṭakʼ amakʼkan Probhu Isor lạgitʼ ona do bạń emokʼa, se begor damte ńamakʼ nonkan jãhãn jiniskote jeredokʼ samaṅokʼakʼ hõ bạń samaṅa.”

²⁵ Niạ menkate Dạud do Arownakʼ ona jumi lạgitʼ eae keji irạl sae sonae emena.

²⁶ Dạud do onḍe Probhu Isor ńutumte mitʼṭecʼ pinḍe benaokeda ar jeredokʼ samaṅokʼakʼ ar sulukren samaṅokʼakʼe samaṅkeda. Uni do Probhu Isor ṭhene nehõrena ar Probhu Isor do jeredokʼ samaṅokʼakʼ pinḍ cetanre serma khon seṅgele kolkeda.

²⁷ Inạ tayom Probhu Isor do uni serma goḍete hukumadea ar uni do acʼakʼ tarwaṛeye bhorao ruạṛkeda.

²⁸ Dạud do tinreye ńelkeda, Jebusiạ Arownakʼ khạrạire Probhu Isor do uniye roṛ ruạṛadea unre uni do onḍe arhõ samaṅokʼakʼe samaṅkeda.

²⁹ Hahaṅkarre Mose do Probhu Isor lạgitʼ oka ḍera tạmbui benaoletʼ ona ar jeredokʼ samaṅokʼakʼ pinḍ do ona jokhecʼ Gibeon reakʼ koejoṅ oṛakʼre tahẽkana.

³⁰ Menkhan Probhu Isorren goḍetakʼ tarwaṛe botorte Dạud do Isorakʼ sana baḍae lạgitʼ ona pinḍ samaṅre bae sen daṛeada.