1 Bõsbudạ 20 - সান্তালী বাইবেল

Dạud do Rabae hatetʼkan

¹ Hoe lolo din rapajko do lạṛhại lạgitʼ tinreko oḍokokʼkan tahẽkana unre Joab do lạṛhại phạdanteye oḍok calaoena. Uni do Amonkoakʼ disạme jarkharketʼte Rabate senkate onae gheraokeda. Menkhan Dạud acʼ do Jerusalemregeye tahẽyena. Ar Joab do Rabae akromonketʼte onae jarkharkeda.

² Ar Dạud do onḍenicʼ rajakʼ bohokʼ khon mukuṭe bocʼ hataokeda. Ona mukuṭ do pegel pon keji sonate benao tahẽkana, ar onare damanakʼ dhiriko hõ bạisạu tahẽkana. Ar ona mukuṭ do Dạudakʼ bohokʼreko horokʼadea. Dạud do ona nagraha khon ạḍi utạr maljalkoe luṭ idikeda.

³ Uni do nagraharen hoṛkoe oḍok ạguketʼkoa ar koratte, khontate ar ṭeṅgocʼteye makʼ paṛakʼketʼkoa. Uni do Amonrenkoakʼ joto nagrahako hõe onkakeda. Inạ tayom Dạud do acʼren sanam lạṛhại phạdante Jerusalemteye ruạṛ calaoena.

Philisṭiko sãoteye lạṛhạikan

⁴ Tayomte Gesorre Philisṭiko sãote lạṛhại ehopʼena. Ona jokhecʼ Husatiạ Sibekae do Rophayiko bõsren Sippoy ńutuman mitʼṭen hoṛe gocʼkedea, ar onate Philisṭiko doko bhagao ocoyena.

⁵ Philisṭiko sãote ar mitʼṭecʼ lạṛhạire Jayirren hopon Elkana do Gat Goliạtren hopon Lohime gocʼkedea. Uniyakʼ borlom do kicricʼ teteńkoakʼ bimleka tahẽkana.

⁶ Gatre ar mitʼṭecʼ lạṛhại hoylena. Ona lạṛhạire mitʼṭen usul hoṛe tahẽkana one uniyakʼ banar ti ar banar jaṅgare turui goṭecʼkate bargel pon goṭecʼ kạṭupʼ tahẽkantae. Uni hõ mitʼṭen Rophayiạ hoṛe tahẽkana.

⁷ Uni do Tinre Israel jạtrenkoe siṛogakokan tahẽkana unre Dạudren boeha Simiyiren hopon Jonathan do uniye gocʼkedea.

⁸ Gatren noko hoṛko do Ropha bõsren hoṛko tahẽkana. Dạud ar uniren hoṛkoakʼ tite noko doko gocʼ ocolena.