1 Bõsbudạ 19 - সান্তালী বাইবেল

Dạud do Amonrenko sãoteye lạṛhạikan

¹ Amonren raj Nahase gocʼen khan uniren hopon Hanun do uni bodolte raje hoyena.

² Dạude menkeda, “Hanunren apattetʼ do ińre pạtiạre tahẽkante ińhõ Hanun upạrte pạtiạriń tahena.” Onate uniren apatakʼ gujukʼre jiwi raṛecʼ emae lạgitʼ adom hoṛkoe kolketʼkoa. Dạudren hoṛko do Hanun jiwi raṛecʼ emae lạgitʼ Amonrenkoakʼ disạmteko calaoena.

³ Menkhan Amonren mukhiyạko do Hanunko metadea, “Cetʼem hudiseda uni do amren ạpum manot emae ar jiwi raṛejtam lạgitʼ hoṛe kol akatʼkoa? Ona do baṅa, uni doe kol akatʼkoa disạm ciyại lạgitʼ jemon amakʼ disạm reakʼ khoj khoborko hatao daṛeakʼ ar tayomte onako jarkhar daṛeakʼ.”

⁴ Hanun do unre Dạudren hoṛko sapʼkate gocokoe hoyo poṭorketʼtakoa ar onkoakʼ jeleṅ aṅgrop hõ barabạri, metakʼme ḍanḍa hạbicʼe getʼ kuṭrạketʼtakoa are bidạkatʼkoa.

⁵ Dạud do oneye kolletʼko hoṛakʼ jãhãnakʼ hoyakana menteye baḍaeketʼ khan onko tulucʼ ńapamokʼ lạgitʼ thoṛa hoṛkoe kolkatʼkoa, ente onko hoṛ do ạḍi lajaoreko paṛao akan tahẽkana. Raj do onko ṭhene roṛgotʼkada, “Apeakʼ gocoko ạuri harakʼ hạbicʼ ape do Jerikhorege tahenpe; ar ona tayom do ruạṛ hạjukʼpe.”

⁶ Amonrenko do tinreko bujhạukeda, onko do Dạud ṭhen hirkhạwan hoṛko hoyakana, unre Hanun ar Amonrenko do Aram-Nohoriạm, Aram-Makha ar Soba khon rãt gạḍiko ar rãt cakʼlaoko bhaṛa ạguko lạgitʼ pe gel are hajar keji rupạko kolkeda.

⁷ Onko do pe gel bar hajar rãt gạḍiko ar lạṛhại phạdko sudhạ Makha rajko bhaṛa ạgukedea. Uni ar uniren lạṛhại phạdko do Medbar ṭhen hecʼkateko ḍerayena ar Amonrenko do apan ạpin nagrahako khon lạṛhại lạgitʼ mitʼdomteko oḍok hecʼena.

⁸ Niạ ańjomkate Dạud do Joab ar uniren sanam lạṛhại phạdkoe kolkatʼkoa.

⁹ Unre Amonrenko doko oḍok hecʼente onkoakʼ nagraha reakʼ phaṭok duạr bolokʼ horre lạṛhại lạgitʼ phạdko sapṛaoketʼkoa. Ar okoeko rajko hecʼlen onko do ṭạnḍiregeko tahẽyena.

¹⁰ Joab do acʼ samaṅ ar tayom secʼre Aramren lạṛhại phạdkoko sapṛao akane ńelketʼkoa. Onate uni do acʼren lạṛhại phạdko mod khon bachao akan adom lạṛhại phạdko onko upạrteye sapṛaoketʼkoa.

¹¹ Ar sarecʼ lạṛhại phạdko do acʼren boeha Abisoe tabereye dohokatʼkoa; onate onko do Amonrenko upạrte lạṛhại lạgitʼko sapṛaoena.

¹² Joab do acʼren boehae metadea, “Aramrenko iń khon daṛeanko hoylen khan am do ińem goṛowạńa, ar Amonrenko am khon daṛeanko hoyokʼ enḍekhan iń hõ amiń goṛowama.

¹³ Dil dohoyme; alaṅren hoṛko lạgitʼ ar aboren Isorakʼ nagrahako lạgitʼ ar dela abo do dil salakʼ bon lạṛhạilenge. Probhu Isorakʼ mẽtʼre oka bhageakʼ kan onage uni doe kạmi ma.”

¹⁴ Niạ menkate Joab do acʼren lạṛhại phạdkoante Aramrenko sãote lạṛhại lạgitʼe laha idiyen khan Aramrenko do uni samaṅ khonko ńir pharakena.

¹⁵ Aramrenko dạdạṛkanko ńelketʼko khan Amonrenko hõ Joabren boeha Abisoe samaṅ khonko dạṛketʼte nagraha bhitriteko boloyena. Onate Joab do Jerusalemteye ruạṛ calaoena.

¹⁶ Aramrenko do tinreko ńelkeda, Israelko ṭhen khonko bhagao ocokʼkana, unre onko do hoṛ kolkate phurạt gaḍa hanasereko girobasokʼ kan tahẽkan Aramrenkoko ạguketʼkoa. Hoddesorren lạṛhại phạdkoren subedar Sobok do onkoe ạyur ạguketʼkoa.

¹⁷ Ado Dạud onako baḍae ocokede khan uni do Israelren goṭa lạṛhại phạdrenkoe jarwaketʼkoa ar jordan gaḍa paromkate onko upạrteye laha idiyena ar onko samaṅ secʼ lạṛhại lạgitʼ phạdkoe sapṛaoketʼkoa. Unre Aramiạko do Dạud sãoteko lạṛhạiyena.

¹⁸ Menkhan onko do Israelko samaṅ khonko dạṛkeda. Unre Dạud do onkoren eae hajar rãt gạḍi cakʼlaoko ar pongel hajar lạṛhại phạdkoe gocʼketʼkoa. Uni do onkoren subedar Sobok hõe gocʼkedea.

¹⁹ Hoddesor gobolren rajko do tinreko ńelkeda, onko do Israelko ṭhenko bhagao ocokʼkana unre uni do Dạud sãote mitʼṭecʼ bondobose bandhaokeda ar uni gobolreye tahẽyena. Onate Amonrenko do Aramrenko goṛowako lạgitʼ ar bako rebenlena.