1 Bõsbudạ 17 - সান্তালী বাইবেল

Dạud ṭhen Isorakʼ gokʼakʼ

¹ Raj oṛakʼre girobasokʼ jokhecʼ mitʼdin Dạud do Nathan nạbiye metadea, “Iń do debdạru kaṭ reakʼ oṛakʼreń tahenkana menkhan Probhu Isorakʼ bondobos sinduk do tạmburege menakʼa.”

² Nathan do Dạude roṛ ruạṛadeteye menkeda, “Amakʼ monre oka cekae reakʼ menakʼ onage onkaeme; Isor do am soṅgere menaea.”

³ Enhilokʼ Isorakʼ katha do Nathan ṭhen seṭerena; uniye menkeda,

⁴ “Am do senkate ińren guti Dạudem metaea, Probhu Isore meneda, ‘ińakʼ tahen oṛakʼ am do alom benaoa.

⁵ Misor disạm khon Israelkoń oḍok ạguko hilokʼ khon teheń hạbicʼ iń do okaṭakʼ oṛakʼre hõ bạń tahẽkana. Mitʼ tạmbu khon eṭakʼ tạmbure, mitʼ tahen oṛakʼ khon eṭakʼ tahen oṛakʼteń senlena.

⁶ Ar okoeko mukhiyạko cetanre ińren hoṛko jotonko reakʼ bhariń ematʼko tahẽkan, eṭakʼ eṭakʼ jaegare Israelko sãote ạcur baṛaekan oktere onko mukhiyạko do cetʼ jãhãtinreń metatʼko tahẽkana, iń lạgitʼ debdạru kaṭ reakʼ oṛakʼ do cedakʼ bako benaoleda?

⁷ “Ńitokʼ am do ińren guti Dạud metaeme, sanam daṛean Probhu Isore meneda, ‘ińren hoṛ Israelko ḍanṭaoko lạgitʼ ińge janwarkoakʼ ạtiń ṭạnḍiko khon, bhiḍi palko tayom khoniń ạguakatʼmea.

⁸ Ar jãhãtegem senlen iń hõ onḍe am sãoteń senlena ar am samaṅ khon amren sanam bạirikoń marao giḍi akatʼkoa. Iń do amakʼ ńutum dhạrtiren maraṅ maraṅ hoṛkoakʼ ńutum lekań hoyocoytama.

^9-10 Ińren hoṛ Israelko lạgitʼ mitʼṭecʼ jaegań ṭhik dohoya ar onḍege cara lekań rohoekoa jemon onko do akoakʼ jaegare sulukteko girobas daṛeakʼ ar ińren hoṛ Israelko cetanre cakʼlao koń bahal akatʼko tayom khon onko bạṛicʼ hoṛko oka santaoko calaoletʼ ona jemon ar aloko daṛeakʼ. Iń do amren sanam bạirikoń kobojkoa. “ ‘Iń do arhoń meneda, iń Probhu Isorge amakʼ bõsrenkoń teṅgo ruạṛkoa.

¹¹ Amakʼ bahaokʼ dinko mucạtʼlen khan am do amren hapṛamko ṭhenem calakʼre am bodolte am bõsren mitʼ hoṛ, amren hopongeń duṛubea ar uniyakʼ rajosṭiyiń ṭarhaotaea.

¹² Amren uni hoponge iń lạgitʼ mitʼṭecʼ oṛakʼe benaoa, ar uniyakʼ siṅghạson do jaejug hạbicʼ tahena.

¹³ Iń do uniren apatiń hoyokʼa ar uni do ińren hopone hoyokʼa. Ar ińakʼ dulạṛ do tishõ uni khon do bạń ocoga, cetʼleka am lahateye tahẽkan cetan khoniń ocokʼletʼ leka.

¹⁴ Ińakʼ oṛakʼ ar ińakʼ rajosṭi do jaejug hạbicʼ iń dohoya ar uniyakʼ siṅghạson do jaejug hạbicʼ tahentaea.’ ”

Dạudakʼ koejoṅ ar sarhao

¹⁵ Niạ dorson reakʼ sanamakʼ kathako Nathan do Dạude lạiyadea.

¹⁶ Niạko katha ańjomkate Dạud raj do tạmbu bhitriteye boloyena ar Probhu Isor samaṅre duṛupʼkateye menkeda, “E Probhu Isor, ińge baṅ cetʼ ar ińakʼ bõsge baṅ cetʼ, am do nunạkʼ hạbicʼem ạyur ạguakadińạ.

¹⁷ E Isor, niạge cetʼ amakʼ mẽtʼre baṅ ḍhera; one amren gutiren bõsakʼ tayom daram reakʼ katha hõm roṛakatʼ. E Probhu Isor, iń do mitʼṭen maraṅ hoṛ mentem udukʼ idiń kana.

¹⁸ “Amiren guti okaṭakʼ manotem udukʼade onate iń do am ṭhen cetʼ arhõ ḍheriń roṛ daṛeakʼa? Ar amren guti mam baḍae akadege.

¹⁹ E Probhu Isor, am do amren guti lạgitʼ amakʼ kusi sana leka niạ bhageyakʼem kạmi akada ar amren guti hõm baḍae ocoakadea.

²⁰ “E Probhu Isor, am leka do ar celege bạnukʼkoa ar am chaḍa jãhãn Isor hõ bạnukʼkoa; iń do ińakʼ luturtege niạ katha doń ańjomakada.

²¹ Amren Israel jạtrenko leka dhạrtire do ar jãhãn jạtrenkoge bạnukʼkoa, one okoe do amren hoṛko hoyokʼ lạgitʼem chaḍao akatʼko. Am do Misor disạm khon eṭakʼ jạtrenkom sạṅgiń akatʼkoa. Amakʼ ṭhonok sodorokʼ lạgitʼ maraṅ ar botoranakʼ kạmikote am do onam onka akada.

²² Amren hoṛ Israelko do jaejug amren hoṛem hoyocoakatʼkoa, ar am do, E Probhu Isor, onkoren Isorem hoyakana.

²³ “Ńitokʼ do E Probhu Isor, ińakʼ ar ińakʼ bõsko reaṅ okam gokʼ akatʼ ona do jaejug hạbicʼ rukhiyạime baṛe. Ar amakʼ gokʼakʼ lekage ona do hoyokʼma.

²⁴ Onate ińakʼ bõs do ṭikạu tahena ar jaejug amakʼ ṭhonokʼ hoyokʼa. Unre hoṛko mena, ‘sanam daṛean Probhu Isor do Israelkoren Isor kanae! Sạrige Israelkoren Isor kanae’! Ar amren guti Dạudakʼ bõs do am samaṅre ṭikạu tahena.

²⁵ E ińren Isor, am do iń ṭhen niạ reaṅgem sodor akada, am do iń hotete mitʼṭen bõsrenkom teṅgo rakapʼkoa. Onate am ṭhen niạ koejoṅ lạgitʼ iń dileda.

²⁶ E Probhu ińren Isor! Niạ bhạlạiyakʼ reakʼ iń ṭhenem gokʼakada.

²⁷ Ińakʼ bõs do kusitem bhor akawada jemon niạ bõs do jaejug am samaṅre tahen. E Probhu Isor, am do tinre niạ bõsem bhorakʼa unre ona do jaejug bhoranakʼge tahena.”