1 Bõsbudạ 16 - সান্তালী বাইবেল

¹ Probhu Isorakʼ sinduk ạgukate ona do Dạude beretʼakatʼ tạmbureko dohokeda. Ar inạ tayom do Isor samaṅre jeredokʼakʼ samaṅakʼ ar sulukren samaṅakʼko samaṅkeda.

² Ona jotowakʼ samaṅokʼakʼ porob sạten khan Dạud do Probhu Isor ńutumte hoṛkoe bhoratʼkoa.

³ Ona tayom uni do Israelkoren mimitʼ maejiuko ar herel hoponko mimitʼ goṭecʼkate piṭhạ, ar mitʼ kuṭi jel ar kismiskoe hạṭińatʼkoa.

⁴ Probhu Isorakʼ sinduk samaṅre dewasewa kạmi lạgitʼ Dạud do adom Liwikoe bahalketʼkoa jemon onko doko koejoṅ arko gunmanao johar daṛeakʼ ar Israelkoren Probhu Isorakʼ ńutumko sarhao daṛeakʼ.

⁵ Noko hoṛkoren mukhiyạ do Asaphe tahẽkana, dosaricʼ do Sakariại tahẽkana, ona tayom do Jiyiyel, Somiramoth, Jihiyel, Motithiạ, Eliyab, Bonae, Obed-Edom ar Jiyiyel. Noko do binạ banam ar peṛesaṅko banametʼ tahẽkana ar Ashaph do kortale rurukan tahẽkana;

⁶ Ar naeke Bonae ar Johosiyel do Isorakʼ ona bondobos sinduk samaṅre jaoge sakwakin oroṅetʼ tahẽkana.

Dạudakʼ sarhao sereń

⁷ Enhilokʼ Dạud do pạhilre Probhu Isor ńutumte sarhaoe reakʼ niạ sereń reakʼ bhar do Asaph ar uniren hoṛko cetanreye emkeda:

⁸ Probhu Isorge sarhaoepe, ar unige gun manao joharaepe; uniyakʼ kạmi reakʼ katha eṭakʼ eṭakʼ jạtrenko baḍae ocokope.

⁹ Uni ńutumte sereńpe, uni sarhao sereńaepe; uniyakʼ sanam hahaṛa kạmi reakʼ katha lạipe.

¹⁰ Uniyakʼ ṭhonoktetʼ reakʼ sarhaotaepe; okoe do Probhu Isorakʼ khạndritetʼ baḍae sanayetʼko onkoakʼ ontor do rạskạkʼtakoma.

¹¹ Probhu Isor ar uniyakʼ daṛe bujhạu reakʼ kurumuṭuipe; sanam ghạṛicʼ uni sãote helmelokʼ reakʼ gagoj baṛe dohoype.

^12-13 E uniren guti Israelkoren bõsko, uniye bachao akawan Jakobren hoponko, uniyakʼ maraṅ kạmi reakʼ kathako baṛe disạ dohoype; uniyakʼ hahaṛa kạmiko reakʼ katha ar bicạrre oka sạjại reakʼ kathae menakatʼ ona disạ dohoype.

¹⁴ Unige aboren Probhu Isor do; goṭa dhạrti do uniyakʼ ḍanṭaote calakʼkana.

¹⁵ Ar okaṭakʼ katha reakʼ hukume emakatʼ hajar hajar bõsrenko lạgitʼ, uniyakʼ ona bondobos reakʼ katha jaejug hạbicʼ baṛe disạ dohoype.

¹⁶ Ona bondobos do Abraham lạgitʼe bandhaoleda ar Isạhak ṭhen hõe gokʼletʼa.

¹⁷ Uni do acʼakʼ bondobos Jakob ṭhen niạm lekate ar Israelko ṭhen do jaejug bondobos lekateye lại sodor akada.

¹⁸ Uni doe menleda, “Iń do Kanan disạmiń emama, ar onage amakʼ paona sompotti do hoyokʼtama.”

¹⁹ Onko do thoṛako tahẽkana, hẽ ạḍi thoṛako tahẽkana, ar onko do onḍe porjạtrenko lekako tahẽkana,

²⁰ Onko do tinre onḍe eṭakʼ eṭakʼ jạtrenko talare eṭakʼ eṭakʼ rajosṭiko talareko ạcur baṛaekan tahẽkana,

²¹ unre uni do okoege onko bae santao ocowatʼkoa. Onko iạte rajkoe dhomkaoetʼko tahẽkana,

²² uni doe metakokan tahẽkana, “Ińren ojokʼ akan hoṛko alope joṭetʼkoa; ińren nạbikoakʼ jãhãnakʼge alope loksan takoa.”

²³ Dhạrtiren sanam hoṛko, ape do Probhu Isor ńutumte sereńpe; uniyakʼ emakʼ bańcao reakʼ katha dinke din lại pasnaope.

²⁴ Eṭakʼ eṭakʼ jạtrenko modre uniyakʼ ṭhonok lại sodorpe; sanam hoṛko talare uniyakʼ sanam hahaṛa kạmiko reakʼ katha lại pasnaope.

²⁵ Probhu Isorgeye maraṅa ar sanamko cetanre unige sarhaoanicʼ lek kanae; sanam debotako khon hõ uni doe botorangea.

²⁶ Eṭakʼ eṭakʼ jạtren debotako doko ạuṛiyakʼgea, menkhan Probhu Isor do maraṅ serma sirjạuicʼ kanae.

²⁷ Unige man ar ṭhonokteye esetʼ ocoakana; uniyakʼ oṛakʼre do daṛe ar rạskạ menakʼa.

²⁸ E jạt jạtren sanam gusṭirenko, sanam daṛe ar ṭhonok do Probhu Isorakʼ kangea.

²⁹ Sanam sarhaoteakʼ do Probhu Isorakʼ mente aṅgocpe; ar samaṅokʼakʼ jinisko uni samaṅre ạguipe. Probhu Isorakʼ ṭhonokte perecʼ sonot reakʼ kathako hudiskate uni manotepe.

³⁰ E dhạrtiren sanam hoṛko, ape do uni samaṅre thar tharaokʼpe. Dhạrti do khạndri khon bạisại akana, ona do tisge baṅ ḍikạ ḍakekʼa.

³¹ Serma do rạskạkʼma, ar dhạrti do hulạsokʼma; eṭakʼ eṭakʼ jạtrenko talare onko doko lại jạhirma, “Probhu Isorgeye rajokʼ kana mente.”

³² Doreão ar ona bhitri reakʼ jotowakʼ do hińjrạukʼ rakabokʼma; ṭạnḍi ar ona reakʼ jotowakʼko hulạsokʼma.

³³ Enḍekhan bir reakʼ dareko hõ Probhu Isor samaṅreko sereńa, ente uni do dhạrti reakʼ bicạr lạgitʼe hijukʼkana.

³⁴ Probhu Isorge gunmanao joharaepe, ente uni doe bhagegea; ar uniyakʼ daya do jaejug hạbicʼ tahẽ akae tahenkana.

³⁵ Ape do menpe, “E Probhu, aleren Isor, ale rukhiyạleme baṛe; eṭakʼ jạtrenko tala khon mitʼ ṭhạ̃ire ạguleme baṛe ar ale rukhiyạleme, jemon ale do amakʼ sonot ńutumle ńumtam arle sarhao daṛeam arle õṛhẽ sereń daṛeamte amle sabasi daṛe am.

³⁶ Sirjạu reakʼ etohopʼ khon jaejug hạbicʼ Israelkoren Probhu Isorakʼ sarhao baṛe hoyokʼtae ma.” Inạ tayom sanam hoṛko menkeda, “Amen, Probhu Isorakʼge sarhao hoyokʼtaema.”

³⁷ Din hilokʼ reakʼ jaruṛokʼakʼko sapʼ sosor lạgitʼ Dạud do Probhu Isorakʼ bondobos sinduk ṭhen Asaph ar uniren hoṛkoe dohoketʼkoa.

³⁸ Ar onko goṛowako lạgitʼ uni do Obed-Idom ar uniren turui gel irạl hoṛ hõe dohoketʼkoa. Jiduthonren hopon Obed-Idom ar Hosa do rurukhiyạ hoṛkin tahẽkana.

³⁹ Dạud do Gibeon reakʼ koejoṅ oṛakʼre Probhu Isorakʼ ḍera tạmbu samaṅre naeke Sadok ar uni sãoten naekekoe dohoketʼkoa.

⁴⁰ Niạ reakʼ monsubạ do tahẽkana okaṭakʼ ạn-ạri Probhu Isor do Israelkoe em akawatʼko ar oka ol tahẽkan ona lekage jemon Probhu Isor ńutumte jeredokʼakʼ samaṅokʼakʼko samaṅ daṛeakʼ.

⁴¹ Onko sãote Hemon ar Jiduthon ar sarecʼ hoṛko tahẽkana, ar okoekoakʼ ńutum roṛ rakapʼkate bachao hoylena jemon onko do Probhu Isorakʼ jaejug hạbicʼ daya lạgitʼ uniko sarhao daṛeae.

⁴² Isor ńutumte sereń jokhecʼ pẽpṛẽtʼ kortal ar eṭakʼ bajnako rui lạgitʼ si Hemon ar Jiduthon cetanre bhar tahẽkana. Ar Jiduthon bõsren hoṛko do rurukhiyạ lekateko bahal ocolena.

⁴³ Inạ tayom sanam hoṛko apan ạpin oṛakʼteko ruạṛ calaoena ar Dạud hõ acʼakʼ gharońjren hoṛko bhorako lạgitʼ oṛakʼteye ruạṛena.