1 Bõsbudạ 15 - সান্তালী বাইবেল

Jerusalemte bondobos sinduk ạgukʼ lạgitʼ sapṛaokʼ

¹ Dạud nagrahare acʼ lạgitʼ oṛakʼ duạre benao sạtketʼ tayom Dạud do Isorakʼ sinduk lạgitʼ mitʼṭecʼ ṭhạ̃iye ṭhikketʼte onḍe mitʼṭecʼ tạmbui ṭaṅgaokeda.

² Inạ tayom uni doe menkeda, “Isorakʼ sinduk do Liwiko chaḍa ar okoe hõ jemon aloko gokʼ bhạriại ente Probhu Isorakʼ sinduk gokʼ idi ar jaejug hạbicʼ uniyakʼ sewae lạgitʼ Probhu Isor do onkogeye bachao akawana.”

³ Ar Probhu Isorakʼ sinduk lạgitʼ Dạud okare ṭhạ̃iye ṭhik dohoakatʼ tahẽkan onḍe ạgui lạgitʼ uni do sanam Israelko mitʼ ṭhene jarwaketʼkoa.

⁴ Aron bõsren okoe hoṛko ar okoe Liwikoe jarwaketʼko onko doko hoyokʼkana:

⁵ Kohatakʼ bõsren hoṛko mod khon mukhiyạ Uriạl ar arhõ mitʼsae bargel hoṛko;

⁶ Merari bõsren hoṛko mod khon mukhiyạ Asae ar arhõ barsae bargel hoṛko;

⁷ Gersonakʼ bõsren hoṛko mod khon mukhiyạ Joel ar arhõ mitʼsae pegel hoṛko;

⁸ Elisaphonakʼ bõsren hoṛko mod khon mukhiyạ Somoyi ar arhõ barsae hoṛko;

⁹ Hebronakʼ bõsren hoṛko mod khon mukhiyạ Eliyel ar arhõ irạl gel hoṛko;

¹⁰ Usiạwakʼ bõsren hoṛko mod khon mukhiyạ Aminnadab ar arhõ mitʼsae gelbar hoṛko.

¹¹ Ona tayom Dạud do naeke Sadok ar Ạbiathar ar Liwi Uriạl, Asai, Joyel, Somoyiạ, Eliyel ar Amminadab takoe hohowatʼkoa.

¹² Uni do onkoe metatʼkoa, “Ape do Liwi gusṭikoren judạ judạ bõsren mukhiyạko kanape; ape ar aperen sãoten Liwiko do Isor ńutumte apnartetʼpe begar dohokʼa, jemon oka ṭhạ̃iyiń sapṛao dohoakatʼ ona ṭhạ̃ire Israelren Probhu Isorakʼ sinduk ạgukatepe doho daṛeakʼ.

¹³ Pạhil dhao ona bape ạgu daraletʼte abo cetanre aboren Probhu Isor do edreteye perecʼlen tahẽkana. Ar uniyakʼ hukum leka ona do cetʼlekate ạgui hoyokʼa ona do uni ṭhen khon baṅ baḍae hoylena.”

¹⁴ Onate naekeko ar Liwiko do Isor ńutumte apnarko begarena jemon onko do Israelkoren Probhu Isorakʼ sindukko ạgu daṛeakʼ.

¹⁵ Probhu Isore udukʼ akatʼ Moseyakʼ hukum leka Liwiko do Isorakʼ sinduk gokʼ ạgui reakʼ ḍaṅkin gokʼkate onako ạgukeda.

¹⁶ Dạud do Liwikoren mukhiyạkoe metatʼkoa, onko do jemon bajnakote, metatʼme, binạ banam, peṛesaṅ, kortalko ruwate rạskạkʼ lạgitʼ sereń dolko bahalko.

¹⁷ Onate Liwiko do Joelren hopon Hemon ar uni bõsren hoṛko mod khon Berikhiạ hopon Asaph ar onkoren peṛa Morariko mod khon Kusawaren hopon Ethonko bahalketʼkoa.

¹⁸ Onko sãote onko bõsren tayom sạrren naekeko hõko bahalketʼkoa. Onko doko hoyokʼkana Sakhariạ, Ben, Jasayel, Somiramoth, Jihiyel, Unni, Eliyab, Bonae, Maseyo, Motithiyạ, Elipholehu, Mikneo ar Obed-Idom ar Jiyiyel ńutuman duạrren barea pharadarkin.

¹⁹ Pitạl reakʼ kortal ruru reakʼ bhar do gaenaha Hemon, Asoph ar Ethon cetanre tahẽkana.

²⁰ Ar ãṭ aṛaṅte binạ banam banam lạgitʼ bhar do Sakhariạ, Asiyel, Somiramoth, Jihiyel, Unni, Eliab, Maseyo ar Bonaeteko cetanre dohoyena.

²¹ Latar rạṛte peṛesaṅ bakʼnamkoakʼ bhar do Motithiạ, Elipholehu, Mikneo, Obed-Idom, Jiyiyel ar Asosiyer cetanre dohoyena.

²² Sereń ạyur lạgitʼ do Liwi mukhiyạ Kononiạ cetanre paṛaoena. Uni do sereń guruye tahẽkante uni cetanre ona dạyik do dohoyena.

^23-24 Sinduk horhoe reakʼ bhar do Berikhiạ, Elkana, Obed-Idom ar Jihiyi cetanre paṛaoena. Isorakʼ sinduk samaṅre pẽpṛẽtʼ oroṅ reakʼ bhar do naeke Soboniạ, Jehosaphat, Nothnel, Amasae, Sakhariạ, Bonae ar Eliyesor cetanre paṛaoena.

Goha sinduk Jerusalemte ạgukʼkan

²⁵ Inạ tayom Dạud do, Israelkoren murubbiko ar lạṛhại phạdkoren hajarko cetanren subedarko rạskạ salakʼ Obed-Idomakʼ oṛakʼ khon Probhu Isorakʼ ona bondobos sinduk ạgui lạgitʼko calaoena.

²⁶ Okoe Liwiko do Probhu Isorakʼ bondobos sindukko gokʼ ạguiyetʼ tahẽkan onko do Isorgeye ạyuretʼko tahẽkante eae goṭen phẽṭaṛ ar eae goṭen bheḍako samaṅketʼkoa.

²⁷ Sinduk gokʼ idiyetʼkan Liwiko, gaenahako ar sereń dolrenkoe ạyuretʼko Kononiạ do mĩhĩ musnạ kicricʼe horokʼ akatʼ tahẽkana. Ar Dạud hõ mĩhĩ musnạ kicricʼ ar ephode horokʼleda.

²⁸ Nonkate sanam Israelko do ãṭ aṛaṅte hohowate, pẽpṛẽtʼ ar sakwa oroṅate, kortal ruwate, binạ banama ar peṛesaṅ banamate Probhu Isorakʼ sinduk do Jerusalemteko ạgukeda.

²⁹ Probhu Isorakʼ bondobos sinduk do tinre Dạudakʼ nagrahate seṭerena unre Sạulren hoponera Mikạl do jalna khone oyoṅ akatʼ tahẽkana. Ar Dạud raj do enejokʼ ar rạskạ joṅe ńelkede khan uni do mon monte Dạude nihạ̃tkedea.