1 Bõsbudạ 14 - সান্তালী বাইবেল

Dạudakʼ oṛakʼ ar uniyakʼ gharońj

¹ Tayomte Turren raj Hiram do Dạud ṭhen adom hoṛe kolketʼkoa. Ar onko sãote Dạud lạgitʼ raj oṛakʼ benaoa mente debdạru kaṭko, raj mistriko ar chutạr mistriko hõe kolketʼkoa.

² Unre Dạud doe bujhạukeda, Probhu Isor do Israelko cetanre acʼakʼ raj hudại teṅgo dohoakada ar uniren hoṛko, metatʼme Israelko lạgitʼ acʼakʼ rajosṭiye maraṅketʼtaea.

³ Dạud do Jerusalemre arhõe baplayena ar uniren do arhõ aema gidrạko hoyentaea.

⁴ Jerusalemre uniren okoeko hoponko janamlen onkoakʼ ńutum do hoyokʼkana Simiyi, Sobab, Nathon ar Solomon.

⁵ Jibhor, Elisuạ, Eplelot,

⁶ Nogoho, Nephog, Japhiạ,

⁷ Elisama, Eliyada ar Elipheloṭ.

Philisṭikoko bhagao ocokʼkan

⁸ Philisṭiko tinreko ańjomkeda, goṭa Israel cetanre Dạud do raj hudạreye ojokʼ bahal ocoakana mente unre onko do akoren sanam lạṛhại phạdko ante akromone lạgitʼko calaoena. Ona ańjomkate Dạud hõ onko upạrteye oḍok hecʼena.

⁹ Philisṭiko do hecʼkate Rephayim ṭhen jhãpko emkeda.

¹⁰ Unre Dạud do Isor ṭhene kuliyana, “Iń do cetʼ Philisṭiko cetanre jhãp iń ema se baṅa? Am do cetʼ ińakʼ tire onkom jimạkoa?” Probhu Isore roṛ ruạṛkeda, “Do calakʼme, iń do amakʼ tireń jimạkoa.”

¹¹ Unre Dạud ar uniren hoṛko do Bakʼal-Perasimte senkate onkoe bhagaoketʼkoa. Dạud doe menkeda, “Isor do banbạsi dakʼ leka ińakʼ tite ińren bạirikoe phoṛ idiketʼkoa.” Ona iạte ona jaega reakʼ ńutum do Bakʼal Perasimko dohokeda.

¹² Philisṭiko do akoren murhutʼko onḍegeko giḍi oṭoletʼko tahẽkana. Ar Dạudakʼ hukumte hoṛko do onko murhutʼko seṅgelreko atar giḍikatʼkoa.

¹³ Philisṭiko do arhõ ona tapol otetreko akromonketʼkoa.

¹⁴ Unre Dạud do arhõ Isor ṭhene kuliyana, ar Isor do uniye roṛ ruạṛadea, “Ape do sojhete onko ṭhen do alope calakʼa, bickom tayom secʼte senkate konḍeya dareko samaṅ secʼ khonpe ńẽtʼkoa.

¹⁵ Ar konḍeya darekore tinre lạṛhại phạdko parom calakʼ reakʼ sabad lekam ańjoma unre am do lạṛhại lạgitʼem oḍok hijukʼa. Noa reakʼ mane do hoyokʼkana, Philisṭikoren lạṛhại phạdko ńẽtʼko lạgitʼ Isor do am laha lahateye calao akana.”

¹⁶ Dạud do Isorakʼ hukum lekageye kạmikeda. Onko do Gibeon khon Gesor hạbicʼ goṭa hor Philisṭikoren lạṛhại phạdkoko gocʼ idiketʼkoa.

¹⁷ Nonkate Dạudakʼ ńutum do goṭa disạm pasnao idiyentaea, ar Probhu Isor do sanam jạtrenko talare uni reaṅ mitʼṭecʼ botore rakapʼ ocoketʼtakoa.