1 Bõsbudạ 12 - সান্তালী বাইবেল

Dạud secʼren lạṛhại phạdko

¹ Kisren hopon Sạul samaṅ khon Dạude pharak ocoyen khan ḍher hoṛge Siglogre Dạud ṭhenko hecʼena. Ar lạṛhại jokhecʼ okoeko lạṛhại phạd do Dạudko goṛowade tahẽkan onko modre noko hõko tahẽkana.

² Noko do akʼsar sasapʼkoko tahẽkana ar onko do leṅga ti ar jojomtite hõ bạṭulko tuń daṛeakʼkan tahẽkana. Onko do Benjạmin gusṭiren Sạul bõsren hoṛko tahẽkana. Onko modre nokoko hoṛko tahẽkana:

³ Gibitiạ Somaeren hopon Ahiyesor ar Joas nukin do mukhiyạ hoṛkin tahẽkana; Asmobothren hopon Jesiyel ar Pelot, Borakha, Anathotiạ Jehu:

⁴ Gibiyạren Jismiạ- uni do “Pe gel” ńutuman birbanṭakoren mitʼṭen mukhiyại tahẽkana; Jirimiạ, Johosiyel, Johanan, Goderathiạ Josabod:

⁵ Eliyusoe, Jirimoth, Baliạ, Samariạ, Horophiạ Sophaṭiạ;

⁶ Korohoko modre Elkana, Jisiạ, Asrol, Joyesor, Jasbiam:

⁷ Gadoriạ Jirohamren hopon Joyela ar Sabdiạ.

Daṛean hoṛko do Gadre Dạudko pańjakede

⁸ Gadiạkoren thoṛa hoṛ do akoakʼ dol bạgikate hahaṅkar ṭoṭha reakʼ gạṛ lekanakʼ jaegare Dạud ṭhenko hecʼlena. Onko do lạṛhạiko cetʼakatʼ daṛean birko tahẽkana. Onko do ḍhal ar borlom ṭhik lekako calao daṛeakʼkan tahẽkana. Onkoakʼ mẽtʼãhã do dhạcri kul leka botorge tahẽkana ar birren jel leka onko do ạḍi murukko dạṛ daṛeakʼkan tahẽkana.

⁹ Hudạ secʼ lekate onko doko tahẽkana: Pạhilicʼ do Esor, dosaricʼ do Obidiạ, tesaricʼ do Eliab,

¹⁰ ponicʼ do Mismonna, mõṛẽyicʼ do Jirimiạ,

^11-13 turuiyicʼ do Attoy, eaeyicʼ do Eliyel, irạlicʼ do Johanan, areyicʼ do Elsabed, gelicʼ do Jirimiạ ar Gelmitʼ icʼ do Magbnnoy.

¹⁴ Noko Gadiạko do lạṛhại phạdren mukhiyạko tahẽkana. Onko modre okoe do huḍiń utạricʼe tahẽkan unige mitʼsae hoṛ somane tahẽkana ar okoe joto khon maraṅicʼe tahẽkan uni do eskarge mitʼ hajar hoṛko somane tahẽkana.

¹⁵ Ona bochor reakʼ pạhil candore jordan gaḍa reakʼ dakʼ tinre perecʼlena unre nokoge paromkate gaḍa purub ar gaḍa pạchim bilạn ṭạnḍire girobasokʼkan sanamkoko laga ńirletʼkoa.

Benjạmin ar Jihudạren hoṛhõ Dạudko pańjakede

¹⁶ Ona chaḍa Benjạmin gusṭiren eṭakʼ hoṛko ar Jihudạren thoṛa hoṛko do Dạudakʼ gaṛ lekan jaegare uni ṭhenko hecʼlena.

¹⁷ Ar Dạud do onko sãote ńapamokʼ lạgitʼ oḍok hecʼenteye menkeda, “jodi sulukokʼ lạgitʼ iń goṛowạń lạgitʼpe hecʼakan khan enḍekhan ape sãote midokʼ iń khaṛagea, menkhan jãhãn behokakʼ bạń kạmi akatʼre hõ jodi calaki kate bạirikoakʼ tire jimạyiń lạgitʼ nonḍepe hecʼakan enḍekhan aperen hapṛamkoren Isor do onae ńelma ar apeye bicạrpema.”

¹⁸ Okoe do tayomte “Pegel” dolkoren mukhiyại hoylen uni Amasae cetanre Probhu Isorren Jiu doe hecʼena. Ar unre uni doe menkeda, “E Dạud, ale do amren kangeale! E Jisạiren hopon, Ale do am secʼrege menakʼlea. Bhạlại hoyokʼtam ma, amakʼ bhạlạige baṛe hoyokʼma, onkoakʼ bhạlại hõ hoyokʼtakoma, okoe do amko goṛowam kan, ente amren Isor do ame goṛowam kana.” Unre Dạud do onkoe ataṅketʼkote acʼren bạiriko cetanren mukhiyạkoe benaoketʼkoa.”

Manaseren hoṛko hõ uniko pańjakedea

¹⁹ Dạud do tinre Philisṭiko sãote Sạul upạrte lạṛhại lạgitʼe calakʼkan tahẽkana unre Manase gusṭiren thoṛa hoṛ do akoakʼ dol bạgikate Dạud ṭhenko senlena. Mekhan Dạud ar uniren hoṛko do Philisṭirenko bako goṛowatʼkoa, ente Philisṭiren cakʼlaoko do ako talare galmarao tayom Dạudko bidạkedea. Onkoko menkeda, “Uni do ale bạgikate acʼren kisạ̃ṛ Sạul sãoteye mitʼlen khan ale do bohokʼ ńurokʼ talea.”

²⁰ Dạud do Siglogteye ruạṛ calakʼ jokhecʼ Manase gusṭiren okoeko hoṛ do akoakʼ dol bạgikate uni ṭhenko senlen onko doko hoyokʼkana, Adon, Josabad, Jidiyel. Mikhayel, Josabad, Elihu ar Silthoy. Noko do Manase gusṭiren mimitʼ hajar lạṛhại phạdkoren subedarko tahẽkana.

²¹ Eṭakʼ hạhạn bạiriko upạrte noko do Dạudko goṛowade tahẽkana. Noko sanamkoge maraṅ daṛean birko tahẽkana ar Dạudren lạṛhại phạdkoren subedarko tahẽkana.

²² Nonkate dinke din hoṛko do Dạud goṛowae lạgitʼ hijukʼko ehopʼena. Ar sesre Isorren lạṛhại phạdko leka mitʼṭen maraṅ lạṛhại phạdko benao rakapʼena.

Dạudren lạṛhại phạdko.

²³ Probhu Isorakʼ katha leka lạṛhạikate Sạulakʼ rajosṭi Dạudakʼ tire jimại lạgitʼ okoe do khanḍa bhanḍawante Hebronre Dạud ṭhenko hecʼlen onkoakʼ lekha do nonka tahẽkana:

²⁴ Lạṛhại lạgitʼ sajao sapṛao akan ḍhal ar borlomko calao daṛeakʼ Jihudạ gusṭiren turui hajar irạl sae hoṛko.

²⁵ Simeon gusṭiren eae hajar mitʼsae daṛean lạṛhại hoṛko.

²⁶ Liwi gusṭiren do pon hajar turui sae hoṛ.

²⁷ Onko modre do Aron bõsren mukhiyạ Jehoyada hõe tahẽkana, one uni sãote pe hajar eae sae hoṛko tahẽkan.

²⁸ Ona chaḍa Sadok ńutuman mitʼṭen daṛean lạṛhại bire tahẽkana ar uni bõsren bargel bar subedarko tahẽkana.

²⁹ Sạulakʼ nij gusṭiren, metakʼme Benjamin gusṭiren pe hajar hoṛ. Menkhan niạ gusṭiren ḍher hoṛge unhõ Sạul gharońjrenko secʼko tahẽkana.

³⁰ Ephrayem gusṭiren bargel hajar irạlsae daṛean birbanṭako tahẽkana. Noko do nij nij bõsre namḍak hoṛko tahẽkana.

³¹ Manase gusṭiren adha bõsren do gel irạl hajar hoṛko tahẽkana. Noko hoṛko do ńutum ńum ocokateko men ocolena jemon onko do hecʼkate Dạudko raje.

³² Esakhar gusṭiren bar sae mukhiyạko. Onko do budan hoṛko tahẽkana arko bujhạu daṛeakʼkan tahẽkana Israelko tinre cetʼ cekae hoyokʼtakoa mente. Onko sãoteko do ako taberen ako gusṭiren hoṛkogeko tahẽkana.

³³ Sebulon gusṭiren do mõṛẽgel hajar gạkhuṛ lạṛhại phạdko tahẽkana. Onko do joto lekan khanḍa bhanḍawanteko lạṛhại daṛeakʼkan tahẽkana. Onko do ạḍi pạtiạr salakʼ Dạudko goṛowade tahẽkana.

³⁴ Napthali gusṭiren do mitʼ hajar subedarko tahẽkana. Onko sãote do ḍhal ar borlom calao daṛeakʼ pegel eae hajar hoṛko tahẽkana.

³⁵ Dan gusṭiren do bargel irạl hajar turui sae gạkhuṛ lạṛhại phạdko.

³⁶ Aser gusṭiren do pongel hajar gạkhuṛ lạṛhại phạdko.

³⁷ Sanam lekan khanḍa bhanḍawante jordan purub secʼ khon mitʼ lakh bargel hajar hoṛko hecʼlena. Noko doko hecʼlena Ruben, Gad ar Manase gusṭiren adha hoṛko modrenkoge.

³⁸ Noko sanamkoge gạkhuṛ lạṛhại birko tahẽkana. Sanam Israelko cetanre Dạud raje lạgitʼ onko do mon murukkate Hebronteko hecʼlena. Dạud raje lạgitʼ eṭakʼ Israelko hõko mitʼ motlena.

³⁹ Noko hoṛko do pe din Dạud sãote tahẽkateko jom ńũkeda. Ar onḍenko hoṛ hõ onko lạgitʼ jom ńũiyakʼko bebostakeda.

⁴⁰ Ona chaḍa Isakar, Sebulon ar Napthali ṭoṭha khon hõ hoṛko do ũṭko, gadhako, khaccarko ar ḍaṅgrako cetanre decʼkate onko lạgitʼ jomakʼko ạguleda. Israel disạmren hoṛkoakʼ monre rạskạ tahẽkante onko do ḍher holoṅ, loa ar kismis, darkha rasa, sunum ar ḍaṅgrako, meromko ar bheḍako anteko hecʼlena.