1 Bõsbudạ 11 - সান্তালী বাইবেল

Dạud do Israelren raje hoyen

¹ Israelren sanam hoṛ Hebronte Dạud ṭhen hecʼkateko menkeda, “Am ar aleakʼ hoṛmore do inạ mitʼ mãyãmge ạtukʼkana.

² Sạule rajokʼkan tahẽkanre amge Israelren lạṛhại phạdkom ạyuretʼko tahẽkana; ar amren Probhu Isor doe men akatʼmea amge jemon uniren hoṛko, metakʼme Israelkom ńel todarotkoa ar onkoren mukhiyạm hoyokʼa.”

³ Unre Israel disạmren sanam murubbiko do Hebronre Dạud ṭhenko jarwayena. Unre Dạud do Probhu Isorge gohayicʼ dohokate onko sãote mitʼṭecʼ bondobose bandhaokeda, ar Samuel hotete roṛakʼ Probhu Isorakʼ katha lekate onko do Israel disạmren raj lekate Dạudko ojokʼ bahalkedea.

Dạud do Jerusaleme ạidạri joṅan

⁴ Tayomte Dạud ar sanam Israelko do Jerusalemre, metakʼme Jebusiteko calaoena. Ar onḍe do Jebusirenko girobasokʼ kan tahẽkana.

⁵ Onko do Dạudko metadea, “Am do nonḍe ohom bolo daṛelena.” Enhõ Dạud do Sion reakʼ gaṛkoe ạidạri joṅana. Ar onage ńitokʼ do Dạud nagrahako metakʼkana.

⁶ Dạude menleda, “Okoeṭakʼ hoṛ pạhilte Jebusiko cetanre jhãpe em unige maraṅ subedar doe hoyokʼa” Onate Seruạre hopon Joab do onko cetanre jhãp em lạgitʼe calaoena, ar onate uni do maraṅ subedarko hoyocokedea.

⁷ Inạ tayom Dạud do ona gaṛre girobasokʼe ehopʼena; onate ona nagraha do Dạud nagrahako metatʼa.

⁸ Uni do Millo ṭhen nagrahae benao rakapʼkeda ar Joab nagraha reakʼ sarecʼakʼ hĩskoe jut arokeda.

⁹ Dạud do din din arhõe daṛe idiyena, ente phạdkoren Probhu Isor do uni sãoteye tahẽkana.

Dạudren daṛean hoṛko

^10-11 Probhu Isorakʼ gokʼakʼ lekate Dạud jemon goṭa disạm cetanre acʼakʼ ạidạriye teṅgo daṛeakʼ ona lạgitʼ daṛean hoṛko modre okoe mukhiyạko tahẽkan onko do sanam Israelko soṅgekate uni secʼko hoyente uniyakʼ raj daṛeko keṭecʼketʼtaea. Onko daṛean hoṛkoakʼ katha do noa kana: Jasbiam ńutuman Hokmoniạkoren mitʼṭen hoṛe tahẽkan uni do “Pe gel” ńutuman bir banṭaren mukhiyại tahẽkana. Uni do mitʼ dhao borlomte pe sae hoṛe sobokʼ gocʼletʼkoa.

¹² Uni tayom dosaricʼ do Eleasare tahẽkana. Uni do Ahoyi bõsren Dodoren hoponge. Uni do pea birbanṭako modren mitʼhoṛe tahẽkana.

¹³ Philisṭiko do tinre lạṛhại lạgitʼ Pos-domimreko jarwalena unre Eleasar do Dạud sãoteye tahẽkana. Ar mitʼ jaegare jao reakʼ goḍare Israelren lạṛhại phạdko do Philisṭiren samaṅ khonko dạṛkeda.

¹⁴ Menkhan onko pe birbanṭa hoṛ do tala baṛgere senkateko teṅgoyena. Onko do ona baṛgeko rukhiyạkeda ar Philisṭikoko maraoketʼkoa. Enhilokʼ Probhu Isor do onkoe rukhiyạketʼkoa ar maraṅ jitạukʼgeye danatʼkoa.

¹⁵ Mitʼ dhao pe gel birbanṭako modre pe hoṛ do Adullum dander ṭhen okaṭakʼ maraṅ dhiri tahẽkan onḍe Dạud ṭhenko hecʼena. Unre mitʼ dol Philisṭi lạṛhại phạdko do Rophayem bilạn ṭạnḍireko ḍera akan tahẽkana.

¹⁶ Un jokhecʼ Dạud do hahaṅkar reakʼ gaṛ lekan mitʼṭecʼ jaegareye tahẽkana ar Philisṭiren lạṛhại phạdko do Bethlehemreko tahẽkana.

¹⁷ Unre Dạud do ạḍi ãṭ tetaṅkedea, onate uni doe menkeda, “Jãhãege Bethlehem phaṭok-duạr ṭhenakʼ kuń khon thoṛa dakʼko ạguạń khan!”

¹⁸ Niạ katha ańjomkate onko pene birbanṭa hoṛ do Philisṭiren lạṛhại phạdko talate senkate Bethlehem reakʼ phaṭok-duạr ṭhenakʼ kuń khon dakʼ lo rakapʼkate Dạud ṭhenko idikeda. Menkhan Dạud do ona bae ńũleda; ona bodolte ona dakʼ do Probhu Isor ńutumte otreye dulkeda.

¹⁹ Uni doe menkeda, “E Isor, noa dakʼ iń ńũiya ona do baṅa. Ente okoe do jiwi cuputʼkate ạguko senlen onko hoṛkoakʼ mãyãm do cetʼ iń ńũiya?” Onko do akoakʼ jiwi cuputʼkate ona dakʼko ạguletʼte Dạud do ona ńuńu bae rebenlena. Ar onko pene birbanṭa hoṛkoakʼ kạmige nonka tahẽkana.

²⁰ Joabren boeha Abisae do onko pene hoṛren subedare tahẽkana. Uni do borlomte pesae hoṛe gocʼletʼkoa ar uni hõ onko pene birbanṭako leka ńutume hạran tahẽkana.

²¹ Uni do onko pene hoṛko khon hõ ḍher manote ńamleda. Onate onko pene hoṛko modre bae lekhalenre hõ unige onkoren subedare hoyena.

²² Kabsilren Jehoyada hopon Bonae hõ mitʼṭen birbanṭa hoṛe tahẽkana. Uni hõ maraṅ maraṅakʼkoe kạmileda. Uni do Moab Ariyelren barea hopone gocʼletʼkinạ. Ar him ńurokʼ hilokʼ uni do mitʼṭecʼ danderte bolokate mitʼṭen dhạcri kule gocʼledea.

²³ Arhõ uni do misrikoren mitʼṭen hoṛ okoe do eae moka usule tahẽkan uni hõe gocʼledea. Unre uni misri hoṛakʼ tire do tãt reakʼ bim leka mitʼṭecʼ borlom tahẽkana, menkhan uni hoṛ do enhõ mitʼṭecʼ ṭheṅgawante uni misri secʼe laha idilena. Ar uni misri hoṛakʼ ti khon borlom recʼkate ona borlomtege uniye gocʼkedea.

²⁴ Jehuyada hopon Bonaeyakʼ kạmi hõ onkage tahẽkana. Uni hõ onko pea birbanṭa leka ńutume hạran tahẽkana.

²⁵ Onko pe hoṛko leka baṅ hudislere hõ uni do “Pe gel” ńutuman dolren hoṛko khon hõ bạ̃ṛti manote ńamleda. Dạud do acʼakʼ rurukhiyạ reakʼ bhar do Bonae cetanregeye doholeda.

²⁶ Onko daṛean hoṛko doko hoyokʼkana: Joabren boeha Asahel, Bethlehem Dodoren hopon Elhanan,

²⁷ Harodren Sema, Harodren Elika,

²⁸ Peletren Heles, Tekuaren Ikesren hopon Ira,, Anathotren hopon Abieser,

²⁹ Husatren Sibekai, Ahohren Ithoy,

³⁰ Nethopharen Maharai, Natophatren Bana hopon Helob,

³¹ Benjamin-gusṭiren Gibe, Ribaeren hopon Ithoy, Pirathonren Benaya,

³² Gaser binlạn ṭạnḍi khon Huroy, Abortiyạ Abiyel,

³³ Bahurimren Asmawet, Sakʼalbonren Eliahba,

³⁴ Gisạniạ Hasemren hoponko, Horariạ Sakhorren hopon Jonathan,

³⁵ Horariạ Sakhorren hopon Ahiam, Urren hopon Eliphal,

³⁶ Makeratiạ Hephor, Poloniạ Ahiạ,

³⁷ Jitriạ Hisro, Esboyren hopon Naraoy,

³⁸ Nathonren boeha Joel, Hogriren hopon Mibhor,

³⁹ Amonren Selek, Seruaren hopon Joabakʼ khanḍa bhanḍa akʼsenicʼ Berotiạ Nohoroe,

^40-42 Jitriạ Era, Jitriạ Gareb, Hiti Uriạ, Aholoyren hopon Sabod, Ruben Sisaren hopon Adina uni do Rubenikoren mukhiyại tahẽkana ar uni sãote pe gel hoṛko tahẽkana.

⁴³ Makaren hopon Hanan, Mittiạ Jishaphat,

⁴⁴ Asṭarotiạ Usiạ, Aroyeyir Hothomren banar hopon Sam ar Jiyiyel,

⁴⁵ Simriren hopon Jidiyel ar uniren boeha Tisiạ Joha,

⁴⁶ Mohobiạ Eliyel, Elnamren banar hopon Jiriboy ar Josboy, Moabiạ Jithma,

⁴⁷ Eliyel, Obed ar Mosobayir Jasiyel.