1 Bõsbudạ 10 - সান্তালী বাইবেল

Sạulakʼ gujukʼ

¹ Mitʼ dhao Philisṭiko do Israelko sãoteko lạṛhạiyena ar Israelko do onko samaṅ khonko dạṛkeda. Onko modre ḍherkoge Gilboe burure Philisṭiko hoteteko gocʼ ocoyena.

² Philisṭiko do Sạul ar uniren hoponko laga idiketʼkote uniren hopon Jonathon, Abinadab ar Mollki-Suạko takoko gocʼketʼkoa.

³ Ona tayom Sạul upạrte ạḍi ãṭ lạṛhại do calao idiyena. Ar akʼsar sipạhiko do uniko ńel ńamkede khanko ghạlkedea.

⁴ Unre Sạul do acʼren khanḍa bhanḍa akʼsenicʼ hoṛe metadea, “Amakʼ tarwaṛe oḍokkate ińakʼ hoṛmo sobokʼ tabme. Ar baṅkhan onko bin khatna hoṛko hecʼkateko henostayińạ.” Menkhan uniren khanḍa bhanḍa asenicʼ hoṛ do bae rebenlena, ente uni do ạḍitetʼge botor caṛhao akawade tahẽkana. Unre Sạul do acʼakʼ tarwaṛe cetanreye bhindạṛena.

⁵ Ar uni khanḍa bhanḍa akʼsenicʼ do Sạule gocʼena menteye ńelkede khan acʼ hõ acʼakʼ tarwaṛereye bhindạṛena are gocʼena.

⁶ Nonkate enhilokʼ Sạul, ar uniren pea hopon ar uni sãoten hoṛko do mitʼ domteko gocʼena.

⁷ Ar bilạn ṭạnḍireko tahẽkan Israelko do tinreko ńelkeda, Israelkoren lạṛhại phạdkoko dạṛkeda ar Sạul ar uniren hopon hõko gocʼ ocoyena unre onko hõ atoko ńir bạgiyada, ar Philisṭiko do hecʼkate onako nagrahako dokholkeda.

⁸ Dosar hilokʼ Philisṭiko do gocʼ hoṛkoakʼ jinisko luṭ idijoṅ lạgitʼko hecʼen khan Gilboa burure Sạul ar uniren hoponkoakʼ mạ̃ṛĩ do giḍi akanko ńelkeda.

⁹ Onko do Sạulakʼ bohokʼko makʼ kuṭrạketʼte uniyakʼ sajbaj ar khanḍa bhanḍako hataoketʼtaea. Ar akoren sanam debotako ar hoṛko ṭhen lại pasnao lạgitʼ onko do Philisṭi disạm reakʼ sanam jaegate sombatko kolkeda.

¹⁰ Ona tayom onko do Sạulakʼ khanḍa bhanḍa hataokate akoren debotakoakʼ mundilreko dohokada ar uniyakʼ bohokʼ do Dagon debotawakʼ mundilreko aka dohokada.

¹¹ Philisṭiko Sạul cetanre okako cekaketʼ ona do Jabes Gileadren hoṛko ańjom ńamkeda.

¹² Unre onḍenko lạṛhại birbanṭa hoṛko do senkate Sạul ar uniren hoponkoakʼ mạ̃ṛĩ do Jabesteko ạgukeda. Ar Jabes reakʼ ela dare buṭạre onkoakʼ jaṅkoko topakada ar eae din hạbicʼko upạskeda.

^13-14 Probhu Isor cetanre pạtiạr bae tahẽkante Sạul doe gocʼena. Uni do Probhu Isorakʼ katha bae bataoetʼ tahẽkana; ar Probhu Isor ṭhen khon sopolha baṅ hataokate okoe do bạṛicʼ jiuko tulucʼ helmel menakʼtako onkanko hoṛ ṭhen khon sopolhae hataoetʼ tahẽkana. Onate Probhu Isor do uniye gocʼ ocokedea ar raj do Jisạiren hopon Dạud ṭhene jimạkada.