1Timothi 6 - সান্তালী বাইবেল

¹ Okoe golamiko khạṭaokʼkan onko sanamkoge akoren kisạ̃ṛko manot ocokʼlek menteko bujhạukoma, jemon okoe hõ Isorakʼ ńutum ar aboakʼ sikhạuna aloko nindạu daṛeakʼ.

² Okoeṭakʼ golam Mạsire biswạs akan ar kisạ̃ṛakʼ gobolre menae uni do biswạsi boeha mente kisạ̃ṛ aloe nihạ̃tema bickom artetʼ bes okocʼte uniyakʼ golam reakʼe kạmima, ente uniyakʼ kạmite okoeye upkạrokʼkan uni doe pạtiạrgea ar uniren do dulạṛiạ kanae. Ar am do noako katha cetʼakome ar sikhạu paṛhaokom.

Bhul sikhnạt ar sạri dhon

³ Jãhãe hoṛ judạwakʼe lại cecetʼ khan ar sạriyakʼ kathako, metakʼme aboren Probhu Jisu Mạsiyakʼ kathako ar Isor bhokti sikhạunako bae aṅgoc enḍekhan uni do bạḍạiteye phulạu akana.

⁴ Uni do cetʼge bae baḍaere hõ jhogṛa ar katha rapṭa rạpṭire ạḍi bạ̃ṛtiye capao akana. Noako reakʼ jo do hiskạ, jhogṛa, nindạu, bạṛicʼ hudis,

⁵ ar mon baṅgla bhat akantako hoṛko talare mitʼ talao gulmal. Ar noko hoṛkore Isorakʼ sạritetʼ do bạnukʼa; Mạsiyakʼ dhorom pạtiạu onko do dhạrti secʼte mitʼṭecʼ lab reakʼ upại menteko bujhạueda.

⁶ Menkhan kusi monte Mạsiyakʼ dhorom biswạs lekate colonle khan do maraṅ labjoṅakʼ kangea.

⁷ Dhạrtire abo do cetʼge babon ạgu dara akada ar dhạrti khon hõ cetʼge babo idi daṛeakʼa.

⁸ Onate jomakʼ ar horokʼ bandeakʼ tahen khan abo do dhirpur akae bon tahenma.

⁹ Menkhan okoe kisạ̃ṛokʼ hoyokʼ sanayetʼko onko do aema lekan biḍạu ar jhạlikoreko paṛaokʼa, ar nonkan bebuj ar laloc mon janamakoa, one onate maraokʼ ar nosṭokʼre hoṛkoe unumetʼko.

¹⁰ Ente sanam lekan bạṛicʼakʼ reakʼ rehetʼ do ṭaka-poesa bạ̃ṛti dulạṛ khonge. Ḍher hoṛge ona reakʼ lalocte Mạsiyakʼ dhorom pạtiạu khonko ocokʼ akante apnarre ạḍi okocʼ dukteko sobokʼ tapʼakana.

Mucạtʼ sikhạuna

¹¹ Menkhan am do Isorren hoṛ kanam; noako khon men ńirjoṅme. Ar dhorom, Isor bhokti, biswạs, dulạṛ, sobori, ar mạ̃hir baṛe khudạu me.

¹² Mạsire biswạs iạte bhage lạṛhại ma lạṛhạime. Oka jaejug jion lạgitʼ Isore hohoakatʼme ona sapʼakae tahenme. Am do ạḍi utạr hoṛko samaṅre amakʼ biswạs reakʼ goham emleda.

¹³ Isor, okoe do sanamakʼe jiwetʼ ocoyetʼ ar Mạsi Jisu, one uni do Pontus Pilạt ṭhen sạriyakʼ reakʼ gohae emletʼ, uni Isor ar Jisu Mạsi samaṅre iń do noań hukumam kana,

¹⁴ aboren Probhu Jisu Mạsi ạuriye sodorokʼ hạbicʼ ińakʼ hukumko doho idime, jemon okoe hõ aloko neṅghao daṛeam.

¹⁵ Uni maraṅ bhạgan Isor, one uni eskar cakʼlaoyicʼ ar rapajkoren raj are Probhukoren Probhu kan, unige acʼakʼ okte nạpitre Mạsiye sodorea.

¹⁶ Isor do gujukʼ gobolren doe baṅkana. Uni do nonkan marsalreye tahenkana one okare okoe manwage bako sen daṛeakʼ. Ar okoe manwa hõ uni do tisge bako ńelakadea ar bako ńel daṛeaea; uniyakʼge man ar jaejug daṛe do. Amen.

¹⁷ Noa puriren kisạ̃ṛko hukumakome jemon onko do aloko usul monokʼ ar nasaokʼ dhonre aloko bhorsakʼ, menkhan Isorrege bhorsa akaeko tahenma. Unige mạṅgnite jotowakʼe kulạu anṭao abon kana rạskạte beoharjoṅ lạgitʼ.

¹⁸ Kisạ̃ṛko hukumakome onko do eṭakʼ hoṛ jemonko bhạlạiko, ar bhage kạmikoreko kisạ̃ṛokʼ, ar em hạṭińko ar mãyã monanko hoyokʼ.

¹⁹ Noate apnar lạgitʼ nonkan dhonko jogao joṅa one oka do darakan dinko lạgitʼ mitʼṭecʼ keṭecʼ rehetʼ lekako hoyokʼte, sạriyakʼ reakʼ jionko sapʼ dohojoṅ.

²⁰ E Timothi, oka jogao doho lạgitʼ jimạ akawatʼme ona do bes okocʼte horho doho akae tahenme; ạuṛiyakʼ akel reakʼ bebhokti roṛ ar eṛe cecetʼakʼ khon sahaṛ akae tahenme.

²¹ Adom adom hoṛ do nonkan akel reakʼ dạbikate Mạsiyakʼ dhorom pạtiạu khonko ocokʼ akana. Isore dayawape ma.