1Timothi 4 - সান্তালী বাইবেল

Timothi lạgitʼ sikhạuna

¹ Sonot Jiu do pusṭạuteye menakada, darakan dinkore adom hoṛ do biswạs khonko bhingṛạukʼa ar bulạu jiuko ar bạṛicʼ jiukoakʼ bintiko moneyakʼa.

² Bibek goṛdho akan nonkan eṛe hoṛkoakʼ phạsiạrate nonka do hoyokʼa.

³ Noko do manwa baṅ baplakʼ lạgitʼko hukumako kana ar adom adom jomakʼ jojomko baron kana. Menkhan biswạsiko, okoe do Isorakʼ sạriyakʼtetʼko baḍae akatʼ, onko do gun manao joharkateko jomma ar ona iạtege Isor do noako jomakʼe sirjạu akada.

⁴ Isore sirjạu akatʼ sanamakʼge bhagegea, onate okaṭakʼ hõ bạṛicʼ hudiskate giḍikakʼ lek do baṅkana; menkhan ona do jemon gun manao joharkate ataṅokʼ,

⁵ ente Isorakʼ katha ar koete ona do sonot ocokʼ kana.

⁶ Am do noako reaṅ boehakom bujhạuako khan enḍekhan Mạsiyakʼ dhorom biswạs reakʼ okaṭakʼ sạri ar bhageakʼ sikhnạtem manaoetʼkan, onate Mạsi Jisuren mitʼṭen bhage sapʼ dapʼicʼem hoyokʼa.

⁷ Bhõnḍ ar alatʼ bakatʼ kạhniko khon sahaṛ akae tahenme; ente onako do haṛam ar buḍhikoakʼ benaoakʼ kạhni kana. Ona khon bickom Isor bhokti lạgitʼ hewakʼme.

⁸ Hoṛmo bhańjaore porho do ńamokʼgea, menkhan Isor bhokti do joto secʼ khon porhowanakʼ kana; onare do nahakʼ reakʼ ar darakan jion reakʼ as menakʼa.

⁹ Noa katha do sạrikangea ar sanam secʼte ataṅ reakʼ hõ lek kana.

¹⁰ Onate murukte bon mehnoteda arbon lạgiyạ paṛao akana, ente abo do jiwetʼ Isorre bon as akana. Uni do sanam manwakoren babańcaoicʼ kanae, asokaete okoe do unireko pạtiạu akan.

¹¹ Ar noako babotre am do hukum emakom ar cetʼakome.

¹² Amakʼ koṛa umer do okoe hõ aloko neṅghaotam ma. Menkhan pạtiạuko lạgitʼ nạmuna baṛe hoyokʼme, amakʼ kathare, amakʼ cạl-colonre, amakʼ dulạṛre, amakʼ biswạsre ar sonotre.

¹³ Ar iń ạuriń hijukʼ hạbicʼ am do biswạsikom sikhạu paṛhaokoa, sonot sostorkom paṛhao ańjomakoa, ar lại cecetʼakʼge moneyakʼme.

¹⁴ Manḍerren murubbiko capokateko koeyatʼme tahẽkanre nạbi lekate katha roroṛ hotete okaṭakʼ danko ematʼme tahẽkan, ona daya dan do alom ḍhilạua.

¹⁵ Noako kạmi idire mone lagaome; ar onakorege tahẽakan tahenme. Jemon sanamkoko ńelme, am dom laha idikʼkana mente.

¹⁶ Am apnar reaṅ ar amakʼ lại cecetʼre sontor akae tahenme. Ar onakore tahẽakae tahenme, entem onka lekhan apnar hõm bańcaokʼa, ar okoeko ańjomtam onko hõm bańcaokoa.