1Timothi 3 - সান্তালী বাইবেল

Manḍer cakʼlaoko ar sapʼdapʼko reaṅ

¹ Noa katha do sạrikangea je, jãhãe manḍerren ạyuricʼ hoyokʼe menjoṅkan khan uni do mitʼṭecʼ bhage kạmi lạgitʼgeye gagojokʼ kana.

² Onate manḍer ạyuricʼ do nonkanicʼ hoyokʼ jạruṛa jemon okoe hõ uni do aloko dusi daṛeae. Uniren do mitʼṭen erae tahentaema. Uni do sote ar apnarte sambṛaokʼicʼ ar bhage bud akel tahen jạruṛtaea. Uni do soṛa ar pekʼṛayicʼ hoyokʼ jạruṛtaea. Ar eṭakʼko cetʼako reakʼ daṛe hõ tahen jạruṛtaea.

³ Uni do ńũ bulokʼicʼ ar dadalicʼ aloe hoyokʼma, jhogṛayicʼ ar ṭaka-poesa lalocicʼ hõ alo, bickom mạ̃hiranicʼe hoyokʼma.

⁴ Uni do lek leka apnar gharońj reakʼ jotowakʼe calao ma, uniren gidrạko do gobolrenko ar mạ̃hirankoko hoyokʼma.

⁵ Jãhãe apnarakʼ gharońj calao bae baḍae khan uni do cekate Isorakʼ manḍer doe jotona?

⁶ Manḍerren ạyuricʼ do nãwã biswạsi hoṛ hõ alo jemone hoyokʼ, ente nãwã biswạsicʼ do bạḍạiteye phulạukʼa ar Soetan reakʼ bicạrreye khańjo botecʼkokʼa.

⁷ Bahre hoṛko ṭhen uniyakʼ do bhage goha tahen jạruṛtaea, jemon durnamre ar Soetanakʼ jhạlire aloe ńurokʼ.

⁸ Onkage sapʼdapʼko hõ manot ocokʼ lek jemonko hoyokʼ ar bar mocawanko leka do alo. Onko do ńũ bulokʼko hõ jemon aloko hoyokʼma, ar laloc secʼ hõ alo jemonko ạwilokʼ.

⁹ Onko do sapha bibekte jemon Mạsiyakʼ dhorom biswạs reakʼ sạri okoakʼko sapʼ doho daṛeakʼ.

¹⁰ Laharege biḍạu maṛaṅko hoyokʼa, ar inạ tayom bin dusạnko sạbudlen khan onko do sapʼ dapʼkoko hoedaṛeakʼa.

¹¹ Onkage onkoren bạhuko hõ manot ocokʼ lekko hoyokʼma. Onko do eṭakʼkoakʼ aloko okta baṛaema ar apnar sambṛao akanko tahenma. Ar jotowakʼre jemon pạtiạranko hoyokʼ.

¹² Sapʼdapʼicʼren hõ mitʼṭen bạhugeye tahentae ma. Uni do acʼren gidrạko ar acʼakʼ gharońj mońjteye calao ma.

¹³ Okoe sapʼdapʼicʼ bhageye kạmikan uni do manote ńama ar Jisu Mạsire pạtiạu iạte uniyakʼ ontor do dilte perejokʼtaea.

^14-15 Iń do asiń dohoyeda, usạrage am ṭheniń sen daṛeakʼa. Menkhan jãhãnakʼ iạteń bilom botecʼkokʼ onate am ṭhen noakoń oleda, jemon am hõm baḍae daṛeakʼ Isorakʼ gharońjren hoṛkoakʼ do cetʼ leka colon lek takoa mente. Ar noa gharońj do hoyokʼ kana jiwetʼ Isorakʼ manḍer, one okaṭakʼ do tham-khunṭi ar rehetʼ leka Isorakʼ sạriyakʼe sapʼ dohoyetʼkan.

¹⁶ Isor bhokti reakʼ sạri okoakʼ je maraṅge ona do jotokogeko aṅgoca. Ona sạritetʼ do noage, Uni do manwa lekateye sodorena; ar Jiureye dhorom ocoyena; serma goḍet do uniko ńelledea; sanam jạtrenko ṭhen uni reaṅ porcarlena; dhạrtiren hoṛko do unireko pạtiạuena; ar serma ṭhonokre uni doe rakapʼ ocoyena.