Zozoe 5 - LAWA A BOO SONBORE 2011

¹ Bɛa biikoo li, Amɔɔrɔ tɔrɔn mɛnɛn tumaa goã Zurdɛ̃ tà kio lɛ̀nyɛɛn gɔn la, bɛn kii ni, ka Kanaan gána a kiin mɛnɛn tumaa goã kɔ̀ gole kɛ lɛ-a, bɛn nə́ ma mà Dɛnaa Lawa Zurdɛ̃ tà a mu piɛ̃ á bɔ Izirayeli minin lɛn nyɛɛnɛ, yǎa ǹ nə́ kiɛ̃ ǹ nə́ nya. Ǹ bɛ ma lɔn, ǹ gɔ́ɔ̃ yii mu baa, ǹ foo biɛ na Izirayeli minin lɛn nyɛɛnɛ.

Izirayeli minin kurii boo Gilgaali

² Bɛa waáraa lɛ nɛ, Dɛnaa Lawa pɛ Zozoe-n kɛnɛn: «Kɔlɔn sɛlɛ gɔyan lɛa, n wusoo n Izirayeli minin lɛn kuru doo.»

³ Zozoe kɔlɔn sɛlɛ gɔyan lɛa, á Izirayeli minin lɛn kuru ni, minin kuru ǹ tenten la.

⁴ Bɛ̀ ń yaa Zozoe nə́ ǹ kuru, a mìi n ka kɛ nɛ: Zaman mɛn tumaa goã ǹ nə́ soo Ezipti gána nɛ giĩn lɛa, ǹ mɛnɛn tumaa bɛ́ boe zia-baa la, bɛn nə́ gã don, zii tɔ we lɛ gɔ́ɔ̃ nɛ, ǹ soo lɛ kio Ezipti gána nɛ.

⁵ A giala, zaman mɛn tumaa soo Ezipti gána nɛ, bɛn nə́ goã kurii ni. Sɛnɛ, ǹ soo Ezipti gána-n kio, ǹ mɛnɛn tumaa yɛ don zii tɔ we lɛ gɔ́ɔ̃ nɛ, ǹ goã ǹ nə́ bɛ kɔn kuru wa.

⁶ Sonbore, Izirayeli minin lɛn man nə́ n binbirin bɔ don, lɛ̀ pusi gɔ́ɔ̃ nɛ. Zaman mɛn tumaa soo Ezipti, ǹ mɛnɛn bɛ́ boe zia-baa la, yǎa bɛn tumaa papaã ǹ nə́ nya. A giala, ǹ nə n too kɔ Dɛnaa Lawa lon wa. Bɛ lɛ nɛ, á n liɛ bɛ lɛ a biikoo li, mà asɛ a re toɛ ǹ yii mɛ gána kɛ lɛ ganaa doo wa. Bɛ bie wa, Dɛnaa Lawa na á goã á n lɛ kɔ ǹ digolon la, mà asɛ n die bɛa gána kɛ lɛ koe ǹsɛn la, bɔ̀nyaa laanka zoo nyɔɔ bɛ́ baa sii gána mɛn nɛ.

⁷ Sɛnɛ, Dɛnaa Lawa na á ǹ nɛnyaanan kaa ǹ bǎã nɛ. Bɛn man nə́ goã soroman lɛa, a giala, ǹ goã ǹ nə́ ǹ kuru zii tɔ we lɛ a biikoo li wa. Zozoe na á bɛn lɛn kuru.

⁸ Ǹ bɛ́ ǹ nə́ zaman lɛ tumaa kuru ǹ nə́ nya, maǹ nə́ giã bǎã goo ne, ǹ golee ǹ bǎã lɛ nɛ, yǎa ǹ kurii lɛ nya.

⁹ Dɛnaa Lawa tɔ́n pɛ Zozoe ne: «Pelo, má Ezipti minin sìi da ǹ sii kɛ toɛ̃ ma bɔ ka ganaa.» Bɛ lɛ nɛ, ǹ nə́ tɔ́n bɛa bǎã lɛ bii Gilgaali, yǎa a da kaa pelo lɛ, bɛ n "sìi toɛ̃" giala pii.

Kiɛ̃mala ǹ zɔ́n bibinaa zɛnaa boo Kanaan gána nɛ

¹⁰ Izirayeli minin lɛn nə́ golee Gilgaali. Ǹ nə́ *kiɛ̃mala ǹ zɔ́n zɛnaa Zerikoo a nyankɔrɔ basa kɛ nɛ, mui a lɛawaa fulusiibaa ǹ wɔ pinaa, wasamiɛ̃n lɛn li.

¹¹ Kiɛ̃mala ǹ zɔ́n lɛ a lɛawaa, ǹ nə́ gána lɛ a tán-kɔsiɛ mànan bii. Ǹ nə́ yɔbubaã buuru laanka wuru màn nàn paparɛɛ sɔ̃ a din pinaa kɛ lɛ nɛ.

¹² Ǹ bɛ́ ǹ nə́ gána lɛ a tán-kɔsiɛ mànan bii ǹ mɛn pinaa, bɛa lɛawaa, *maánə nə́ n lɛ kuru. «Maánə» yɛ Izirayeli minin lɛn wɔ lɛa doo wa. Sɛnɛ, maǹ nə́ n dinin too ka Kanaan gána lɛ a tán-kɔsiɛ mànan nɛ bɛa lɛ̀ kɛ lɛ gɔ́ɔ̃ nɛ.

Dɛnaa Lawa a zia-baalin goledɛnaa a din nyaa

¹³ Zozoe bɛ́ Zerikoo kiwi lɛkoro-a, á n yii saa á ga, bɛ̀ giĩ goon nə́ ke golee ne a nyɛɛnɛ ka a gɔya sa nɛ a gɔn. Zozoe nə́ n zɔ̃ á dɔ a li, á nɔ̀n da la kɛnɛn: «Ma n kun ka wɔsɛn nɛ hinlaa, ma n kun ka wɔsɛn zɔ́ɔn nɛ?»

¹⁴ A ná a lɛ si: «Haayii! Man Dɛnaa Lawa a zia-baalin goledɛnaa lɛa. Maa daa n ka kɛ nɛ.» Zozoe na, á kaa tán a giulun á n mìi kuməə, á pɛ nɛ: «Maa dɛnaagiĩ, masɛ nə n bɛ̀rɛgiĩ lɛa. Wàa mɛn boo nə n lɛ-n kəni, n nə́ die pii masɛ nɛ?»

¹⁵ Dɛnaa Lawa a zia-baalin goledɛnaa lɛ tɔ́n pɛ Zozoe ne: «N kɔsɔnɔn waa n nə ǹ bɔ n gòãn ganaa, a giala, n bɛ́ golee-n bǎã mɛn nɛ ke, Lawa a bǎã nɛ.» Zozoe zɛnaa miɛ̃.