Zozoe 4 - LAWA A BOO SONBORE 2011

Kɔlɔ fulupaa

¹ Zaman lɛ tumaa bɛ́ á Zurdɛ̃ tà kuru á nya, Dɛnaa Lawa pɛ Zozoe ne:

² «Min fulupaa bɔ zaman lɛ bii, tɔrɔ gogoonmaa a min goon.

³ Ka pɛ bɛn nɛ mà ǹ kɔlɔ fulupaa goa kànaa Zurdɛ̃ tà lɛ bii, wúlu-bɔlen lɛn nə golee ǹ gòãn la bǎã mɛn lɛ nɛ. Ǹ bɛ́ re lɛ̀ wɛɛ bǎã mɛn nɛ, ǹ doamaa nɛ, ǹ wo ka kɔlɔn lɛn nɛ, ǹ nə ǹ kaa tán walan.»

⁴ Zozoe min fulupaa mɛn bɔ Izirayeli minin lɛn bii, á lɛ dia bɛn la. A na á min goon bɔ tɔrɔ gogoonmaa bii.

⁵ Zozoe tɔ́n pɛ ǹ nɛ kɛnɛn: Dɛnaa Lawa lɛ, kaa Lawa lɛa, ka kiɛ̃ ka mɛ a goo lɛ nyɛɛnɛ, ka wo Zurdɛ̃ tà lɛ bii. Ka dinin gogoonmaa kɔlɔ goon saa ka da ka kɔrɔn, Izirayeli nɛnyaanan lɛn tɔrɔn lɛ yii li,

⁶ màn mɛn bɛ́ toɛ, bɛ goã sii a kɔnboe lɛa ka bii. A giala, ǹ kɔn pinaa, kaa nɛnyaanan tá re nɔ̀n diɛ ka la ǹ pɛ mà kɔlɔn kɛn man wàa mɛn sii giala pii ka nɛ?

⁷ Ka pɛ ǹ nɛ kɛnɛn: «Zurdɛ̃ tà a mu na á goã á n na kɔn Dɛnaa Lawa a *lɛ kɔ kɔn la ǹ goo lɛ nyɛɛn lɛlɛ. Ǹ bɛ́ Zurdɛ̃ tà lɛ kuri ni, Zurdɛ̃ tà a mu lɛ na á n na kɔn. Kɔlɔn kɛn lɛn man die Izirayeli minin yiri gisĩ bɛa sii lɛ nɛ yǎa duduu.»

⁸ Izirayeli minin lɛn nə́ zɛnaa ka Zozoe goã á pɛ ǹ nɛ lɔn. Ǹ nə́ kɔlɔ fulupaa lɛ goa Zurdɛ̃ tà lɛ bii, Izirayeli minin tɔrɔn lɛn lɛ yii li, ka Dɛnaa Lawa bɛ́ á goã á pɛ Zozoe-n lɔn. Ǹ nə́ ǹ gũ ǹ nə́ kiɛ̃ ǹ nɛ. Ǹ dinin bɛ́ re golee bǎã mɛn nɛ bɔrɔ, ǹ nə́ woo ǹ kaa tán walan.

⁹ Lawa a wúlu-bɔlen mɛnɛn nə goã lɛ kɔ kɔn la ǹ goo lɛ guĩ, bɛn nə golee ǹ gòãn la bǎã mɛn nɛ, Zozoe kɔlɔ fulupaa da kɔn la walan dɔ nɛ, Zurdɛ̃ tà lɛ bii. Maǹ tɔn walan a da kaa pelo lɛ.

¹⁰ Wúlu-bɔlen mɛnɛn nə goã goo lɛ guĩ, bɛn nə́ golee Zurdɛ̃ tà lɛ bii. Dɛnaa Lawa goã á boo mɛn tumaa pɛ Zozoe ne mà a pɛ zaman lɛ nɛ, ǹ nə́ golee yǎa bɛ tumaa a sii nə́ n zɛnaa lenlen á nya. Muizu goã á boo mɛn tumaa pɛ Zozoe ne, Zozoe na á zɛnaa á kɔnpɛ ka bɛ nɛ. Bɛ kio, Zaman lɛ nə́ n nanaa á kiɛ̃.

¹¹ Zaman lɛ tumaa bɛ́ á kiɛ̃ á nya ǹ mɛn waáraa, Dɛnaa Lawa a goo lɛ laanka wúlu-bɔlen lɛn nə́ kiɛ̃, ǹ nə́ mɛ zaman lɛ nyɛɛnɛ.

¹² Urubɛn tɔrɔ minin ni, Gaadi wɔn nɛ, ka Manaasee tɔrɔ minin kɛn talɛɛ nɛ, bɛn nə́ ǹ ziabaa ǹ mànan goa, ǹ nə́ mɛ Izirayeli minin gialakunun lɛn nyɛɛnɛ, ka Muizu bɛ́ á goã á pɛ ǹ nɛ lɔn.

¹³ Zia-baali duu pusi kɛ miã na á kiɛ̃ Dɛnaa Lawa din yii ni, ka ǹ ziabaa ǹ mànan nɛ ǹ ganaa, ǹ nə́ woe zia biɛ Zerikoo a nyankɔrɔ basa kɛ nɛ.

¹⁴ Bɛa pinaa kɛ lɛ nɛ, Dɛnaa Lawa nyaa Izirayeli minin lɛn tumaa nɛ, mà asɛ din na á tɔ kɔ Zozoe la. A saa bɛ lɛ ganaa lɔn, ǹ nə́ nyɛ́ɛ baa Zozoe ne, ka ǹ bɛ́ ǹ nə́ goã nyɛ́ɛ biɛ Muizu-n lɔn a tá kanaa lɛawaa tumaa gɔ́ɔ̃ nɛ.

¹⁵ Dɛnaa Lawa tɔ́n boo da Zozoe ne á pɛ nɛ:

¹⁶ «Wúlu-bɔlen kɛn lɛn, Lawa a lɛ kɔ kɔn la ǹ goo lɛ guĩ, a pɛ ǹ nɛ, mà ǹ soo ǹ nə n bɔ Zurdɛ̃ tà lɛ gɔ́ɔ̃ nɛ.»

¹⁷ Zozoe tɔ́n pɛ ǹ nɛ ma ǹ soo ǹ nə n bɔ Zurdɛ̃ tà lɛ gɔ́ɔ̃ nɛ.

¹⁸ Wúlu-bɔlen mɛnɛn bɛ́ Dɛnaa Lawa a lɛ kɔ kɔn la ǹ goo lɛ guĩ, bɛn bɛ́ soe n boe Zurdɛ̃ tà lɛ gɔ́ɔ̃ nɛ ǹ mɛn waáraa, ǹ gòã tisi n die miɛ̃ tán gere la, Zurdɛ̃ tà lɛ a mu wusoo á daa a bǎã nɛ, á baa si a lɛkoro tumaa li ka a lɛlɛn bɛ́ lɔn.

¹⁹ Mui bibinaa a lɛawaa fùbaa ǹ wɔ nɛ, zaman lɛ soo á n bɔ Zurdɛ̃ tà lɛ gɔ́ɔ̃ nɛ. Ǹ nə́ woo golee Gilgaali bɔrɔ, Zerikoo kiwi a lɛ̀giala gɔn la.

²⁰ Ǹ goã ǹ nə́ kɔlɔ fulupaa mɛn goa Zurdɛ̃ tà lɛ bii, Zozoe bɛn da kɔn la Gilgaali.

²¹ Á tɔ́n boo da ka Izirayeli minin lɛn nɛ á pɛ ǹ nɛ mà bɛ̀ ǹ nɛnyaanan nə́ nɔ̀n da ǹ la ǹ mɛn pinaa, mà kɔlɔn kɛn man wàa mɛn sii giala pii,

²² mà ǹ nə ǹ nɛnyaanan lɛn daraa ǹ pɛ ǹ nɛ kɛnɛn: «Lɛlɛ, Izirayeli minin lɛn man nə́ Zurdɛ̃ tà kɛ lɛ gɔ́ɔ̃ geremaa kuru ǹ nə́ kiɛ̃.

²³ A giala, Dɛnaa Lawa lɛ, kaa Lawa lɛa, bɛ na á Zurdɛ̃ tà lɛ a mu piɛ̃ á bɔ ka nyɛɛnɛ, yǎa ka kiɛ̃ ka nya. Dɛnaa Lawa lɛ, kaa Lawa lɛa, a na á zɛnaa miɛ̃ Sawɛɛ tà dɔ lɛ-a, á ná a mu piɛ̃ á bɔ ka nyɛɛnɛ, yǎa ka kiɛ̃ ka nya.

²⁴ A na á bɛ zɛnaa, màn mɛn bɛ́ toɛ, kanaa minbuiinin tumaa dɔ̃, mà Dɛnaa Lawa pàã á gole. Màn mɛn bɛ́ toɛ dɔn, ka dininmaan lɛn nə nyɛ́ɛ baa kaa Lawa, Dɛnaa Lawa nɛ biikoo tumaa li.»