Zozoe 3 - LAWA A BOO SONBORE 2011

Zurdɛ̃ tà kurii

¹ Bɛa lɛawaa, Zozoe yoo baayɛlɛ yiisoone. A laanka Izirayeli minin lɛn tumaa soo Sitimu kiwi, ǹ nə́ woo yǎa Zurdɛ̃ tà lɛ-a. Ǹ nə́ golee walan boɛɛnɛ, bɛ kio, ǹ nə́ tɔ́n tà kuru.

² Nyɛɛnaandɛnan nə́ n bibiə̃ giã ǹ bǎã lɛ nɛ lɛawaa sɔɔ gɔ́ɔ̃ nɛ,

³ ǹ nə́ zaman lɛ doro ka boon kɛn nɛ: «Dɛnaa Lawa lɛ, kaa Lawa lɛa, bɛ̀ ka bɛa *lɛ kɔ kɔn la ǹ goo kɛ yɛ Levii tɔrɔ wúlu-bɔlen kɛn gɔn lɔn, didie yoo a n bɔ a giã ǹ bǎã nɛ a kɔ lɛ.

⁴ Bɛ á re toɛ ka zii lɛ dɔ̃. A giala, ka bin kɔ zii kɛ lɛ lɛ wa. Sɛnɛ, ka baran n mɔrɔ lɛ kɔ kɔn la ǹ goo lɛ ganaa wa. Ka toa ka bii lui a ganaa a dɔ kilomɛtrə goon kɛ miã.»

⁵ Bɛ kio, Zozoe pɛ zaman lɛ-n kɛnɛn: «Ka *gɔ̀ bɔ ka dinin ganaa, a giala, biɛ̃, Dɛnaa Lawa á die kaãbaa ǹ siin zɛnɛɛ ka bii.»

⁶ Zozoe pɛ Lawa a wúlu-bɔlen lɛn manɛ: «Ka lɛ kɔ kɔn la ǹ goo lɛ saa, ka kiɛ̃ ka mɛ zaman lɛ nyɛɛnɛ.» Ǹ nə́ lɛ kɔ kɔn la ǹ goo lɛ saa, ǹ nə́ bɔ ǹ nə́ mɛ zaman lɛ nyɛɛnɛ.

⁷ Dɛnaa Lawa pɛ Zozoe ne: «Pelo, man die a giala koe, ma n tɔ saa lon Izirayeli minin lɛn tumaa yɔrɔ-a. Bɛ á re toɛ ǹ dɔ̃, mà ma á re goɛ̃ kunun n ni ka ma bɛ́ má goã kun ka Muizu-n lɔn.

⁸ Wúlu-bɔlen mɛnɛn bɛ́ lɛ kɔ kɔn la ǹ goo lɛ guĩ, n din doroo kɛ kɔ bɛn la, n pɛ ǹ nɛ mà bɛ̀ ǹ nə́ dɔ Zurdɛ̃ tà lɛ-a, mà ǹ wɔǹ golee tà lɛ a mu li.»

⁹ Zozoe tɔ́n pɛ Izirayeli minin lɛn manɛ: «Dɛnaa Lawa lɛ, kaa Lawa lɛa, ka n zɔ̃ ka dɔ kànaa, ka n too kɔ a boo li.»

¹⁰ Zozoe wusoo á pɛ ǹ nɛ: «Ka á re doɛ̃ kɛ li, mà Lawa Yiikoonaa lɛ tá ka bii. A din dɔ n die Kanaan minin laanka Ɛti tɔrɔn kɛn lui sonbore a ǹ bɔ ka nyɛɛnɛ, ka Evii tɔrɔn laanka Perɛzi tɔrɔn nɛ, ka Girgazi minin ni ka Amɔɔrɔ tɔrɔn laanka Zebuzu minin ni.

¹¹ Haya, kanaa tumaa a Dɛnaa a lɛ kɔ kɔn la ǹ goo lɛ á die kiɛ̃ a mɛ ka nyɛɛnɛ, a Zurdɛ̃ tà kuru ka nɛ.

¹² Sisia kəni, ka min fulupaa bɔ Izirayeli tɔrɔn lɛn bii. Tɔrɔ goon min goon.

¹³ Dɛnaa Lawa lɛ, kanaa tumaa a Dɛnaa lɛa, wúlu-bɔlen mɛnɛn bɛ́ bɛa lɛ kɔ kɔn la ǹ goo lɛ guĩ, bɛ̀ bɛn gòã tisi mɛ Zurdɛ̃ tà mu lɛ li lɔn gɔrɔ, mu mɛn bɛ́ gisĩ die ka pàã nɛ, bɛ á die n lɛ kuri, a golee bǎã goon ne ka maǹ nə́ bèlèn dɔ nɛ.»

¹⁴ Zaman lɛ bɛ́ á yoo á n bɔ a giã ǹ bǎã nɛ á n die Zurdɛ̃ tà kuri, wúlu-bɔlen mɛnɛn nə goã lɛ kɔ kɔn la ǹ goo lɛ guĩ bɛn nə́ mɛ ǹ nyɛɛnɛ.

¹⁵ Sonbore, Zurdɛ̃ tà gòã lɛ piɛ̃maa-n ka mu ni, yǎa kaa-piɛ nyɛɛ. Wúlu-bɔlen mɛnɛn bɛ́ lɛ kɔ kɔn la ǹ goo lɛ guĩ, bɛn dinin gòã mɛ tà lɛkoro lɛ-a mu lɛ li lɔn gɔrɔ,

¹⁶ mu mɛn bɛ́ gisĩ die ka pàã nɛ, bɛ́ golee. Mu lɛ golee bǎã goon ne Aadã kiwi kɛ li tìãlɛ-a sɔɔsɔɔ, ka maǹ nə́ bèlèn dɔ nɛ. Aadã kiwi lɛ n kunu Sartan kiwi li. Mu mɛn dɔ goã baa sii die yìsi mu kɔ̀ kɛ ganaa nyankɔrɔ basa kɛ nɛ, bɛ tumaa lɛ kuru lenlen. Zaman lɛ tɔ́n boo la á Zurdɛ̃ tà kuru Zerikoo kiwi yɔrɔ-a, á kiɛ̃.

¹⁷ Wúlu-bɔlen mɛnɛn bɛ́ Dɛnaa Lawa a lɛ kɔ kɔn la ǹ goo lɛ guĩ, bɛn nə́ golee Zurdɛ̃ tà lɛ bii tán gere la. Wúlu-bɔlen lɛn nə́ golee bǎã goon ne, bɛ̀ Izirayeli minin lɛn tumaa á tɔ we kiɛ̃. Ǹ nə́ golee miɛ̃, yǎa zaman lɛ tumaa soo ǹ nə́ n bɔ Zurdɛ̃ tà lɛ gɔ́ɔ̃ nɛ.