Zozoe 2 - LAWA A BOO SONBORE 2011

Duru a ga bǎã ganaa wolen dia Zerikoo

¹ Nunu a nɛgiĩ Zozoe nə́ n toa Sitimu kiwi, á giĩ min paa dia ka durii ni, á pɛ ǹ nɛ: «Ka woo, ka ga gána lɛ ganaa, ka ga Zerikoo kiwi kɛ sɛ din ganaa a tɔ-a.» Ǹ bɛ́ ǹ nə́ woo ǹ nə́ dɔ gána lɛ nɛ, ǹ nə́ woo kaa lɔ kɔrɔ goon a kion, ǹ nə́ waa walan. Lɔ lɛ tɔ n Rahabu.

² Ǹ nə́ pɛ Zerikoon kii-n kɛnɛn: «Haya, pelo tèlò kɛ lɛ nɛ, Izirayeli minin lɛn kɔnɔn nə́ daa kànaa. Maǹ nə́ daa ga gána lɛ ganaa.»

³ Zerikoon kii tɔ́n minin dia Rahabu li, mà ǹ wo pɛ nɛ mà min mɛnɛn lɛn nə da a piɛ, kɛn lɛn ǹ nə́ wɔ a kion, mà a n waa a soo ǹ nɛ. A giala, mà maǹ nə́ daa ga gána lɛ tumaa ganaa.

⁴ Sɛnɛ, lɔ lɛ giĩ min paa lɛ kũ á ǹ duru, á tɔ́n pɛ: «Sonbore ne, giĩ min paa daa maa piɛ. Sɛnɛ, ǹ bɛ́ bǎã mɛn minin lɛa, maa bɛ doɛ̃ wa.

⁵ Wasamiɛ̃n tutu, ǹ bɛ́ mà maǹ die kiwi lɛ a kiɛnlɛ tiɛ̃ ǹ mɛn waáraa, giĩ min paa lɛ soo. Ǹ wo bǎã mɛn nɛ, maa doɛ̃ wa. Ka n nanaa ka ǹ kio loo, ka tá re doe ǹ ganaa.»

⁶ A da yaa, a na á goã á dii ǹ ni kala-n. A din goã á baasan kɔn tɔrɔ a gɔn kaa tán walan. A na á ǹ duru bɛ giulun kala lɛ la.

⁷ Ǹ kio-loolin lɛn bɛ́ ǹ nə́ soo, minin nə́ kiwi lɛ a kiɛnlɛ kũ ǹ nə́ tã. Ǹ nə́ Zurdɛ̃ tà lɛ-a zii saa, ǹ nə́ ga ǹ li miɛ̃, yǎa tà lɛ a kuru ǹ bǎã kɛ nɛ.

⁸ Minin lɛn sɛn laan bɛ̀ maǹ wɛɛ tán, Rahabu dii á woo ǹ li kala lɛ la,

⁹ á pɛ ǹ nɛ kɛnɛn: «Ma á doɛ̃ máa Dɛnaa Lawa gána kɛ lɛ kɔ ka la. Kaa sii din nyɛ́ɛ dɛ á kaa wɔ ganaa. Gána lɛ a minin tumaa gɔ̀nɔn na á bìn da ka nyɛɛnɛ.

¹⁰ A giala, ka bɛ́ soe Ezipti gána nɛ, Dɛnaa Lawa Sawɛɛ tà kɛa mu piɛ̃ á bɔ ka nyɛɛn lɔn, ka tɔ́n boo la ka kiɛ̃, wɔsɛn nə́ bɛa boo ma. Wɔ́ ma dɔn, mà Amɔɔrɔ tɔrɔn kii min paa ke Zurdɛ̃ tà kio, Sihɔn laanka Ɔgu ni, mà ka bɛn dɛ, ka ǹ gɔn màn tumaa ziziɛ̃ lenlen.

¹¹ Wɔsɛn bɛ́ wɔ́ bɛ lɛ ma, wɔ gɔ́ɔ̃ mu baa. Foo tãbaa din ba min kɔn lon doo, á n boe la á n golee ka nyɛɛn wa. A giala, Dɛnaa Lawa lɛ, kaa Lawa lɛa, a din lɛ n Lawa lɛa lon kɛ nɛ, a din lɛ n Lawa lɛa tán kànaa.

¹² Kanna kəni man ka nyankoe, ka n liɛ masɛ nɛ ka Dɛnaa Lawa tɔ nɛ ka pɛ, mà ka tá re bǐɛ̃ zɛnɛɛ masɛ di kion minin manɛ ka ma bɛ́ má bǐɛ̃ zɛnaa ka dɔn man lɔn.

¹³ Bɛ̀ ka lɛ kɔ mà ka tá re masɛ a díi laanka maa náa yii toɛ koo sonbore, ka ma dɔɔ̃ngiĩn laanka ma dɔɔ̃nlɔn nɛ, ka ǹ kion minin tumaa nɛ, bɛ̀ ka tá re ǹ sii gɛ̀ la sonbore, ka màn kɔn kɔ ma la bɛa sii a kɔnboe lɛa.»

¹⁴ Giĩn lɛn nə́ tɔ́n pɛ nɛ: «Wɔsɛn tá re wɔ dinin koe n lɛa. Yǎa n baran wɔsɛn boo da min ni wa. Bɛ̀ Dɛnaa Lawa gána lɛ kɔ wɔ la ǹ mɛn waáraa, wɔ á re koe wɔ bɔlɔ lɛ, wɔ bǐɛ̃ zɛnaa n nɛ.»

¹⁵ Kungɔn mɛn goã kiwi lɛ lɛnpɛnɛ, Rahabu a kion na á goã doa-n kɔn ka bɛ nɛ. Á biɛ yii lon, minin lɛn nə́ bɔ ka fənɛtrə ne, ǹ nə́ kɔ bɛ lɛ, ǹ nə́ gisĩ.

¹⁶ Á tɔ́n pɛ ǹ nɛ: «Ka baa si ka wo kele yii kɛ nɛ, màn mɛn bɛ́ toɛ ka kio-loolin lɛn baran kaa ka lɛ wa. Ka n duru walan lɛawaa sɔɔ gɔ́ɔ̃ nɛ, yǎa ka kio-loolin lɛn nə n bɔyɛɛ ǹ die. Bɛ kio, ka á re boe la ka kiɛ̃ kaa zii ni.»

¹⁷ Minin lɛn nə́ tɔ́n pɛ nɛ: «N wɔ da liɛ mɛn wɔ ganaa, wɔ bɛ́ re bɛ boe wɔ bɔ wɔ dinin bɔlɔ-a lɔn, bɛ n ka kɛ nɛ:

¹⁸ Haya, bɛ̀ wɔ wɔ gána lɛ nɛ ǹ mɛn waáraa, fənɛtərə kɛ lɛ ń wɔsɛn gisĩ li, biɛ nàn tiɛɛ̃n kɛ yii bɛ ganaa. N di laanka ǹ dan nɛ, ǹ dɔɔ̃nɔn nɛ ka ǹ di kion minin tumaa nɛ, n bɛn lɛ sɔkɔn n din li kion lɛ nɛ.

¹⁹ Bɛ̀ ǹ mɛn soo á n kion lɛ a kiɛnlɛ da a kio, bɛ̀ wɔ bɛ dɛ, bɛa dɛnaa a sii na a din mìi ni, wɔsɛn sii ba bɛ-n wa. Sɛnɛ, min mɛnɛn tumaa bɛ́ kunun n ni kion lɛ nɛ, bɛ̀ wɔ n gɔn da bɛn goon ganaa, bɛa sii n die goɛ̃ wɔsɛn dɔn mìi ni.

²⁰ Sɛnɛ, bɛ̀ ń wɔsɛn boo da min ni, n wɔ da liɛ mɛn wɔ ganaa, bɛa sii ba wɔsɛn bɔlɔ-a doo wa.»

²¹ Rahabu tɔ́n pɛ: «Lawa toa a n zɛnaa a kɔnpɛ ka kaa da ǹ boo ne.» Bɛ kio, á ǹ kaa ǹ nə́ woo, á tɔ́n biɛ nàn tiɛɛ̃n lɛ yii fənɛtərə ganaa.

²² Ǹ nə́ zii saa ǹ nə́ woo kele yii ni, ǹ nə́ giã walan lɛawaa sɔɔ, yǎa ǹ kio-loolin lɛn nə́ n bɔyaa ǹ nə́ daa piɛ. Bɛ á zɛnɛɛ, bɛ̀ ǹ nə́ ga ǹ li bǎã tumaa nɛ ǹ nə́ fɔ̃.

²³ Bɛ kio, giĩ min paa lɛ soo ǹ duru ǹ bǎã nɛ, ǹ nə́ gisĩ ǹ nə́ n bɔ kelen lɛn la. Ǹ nə́ Zurdɛ̃ tà kuru, ǹ nə́ daa Nunu a nɛgiĩ Zozoe li. Sii mɛn tumaa nə ǹ yɛ, ǹ nə́ bɛ laakalaa nɛ.

²⁴ Ǹ nə́ pɛ Zozoe-n kɛnɛn: «Taãn nɛ, Dɛnaa Lawa gána lɛ tumaa wɔ wɔ gɔn. Gána lɛ a minin tumaa din gɔ̀nɔn nə bìn diɛ wɔ nyɛɛnɛ.»