Zozoe 17 - LAWA A BOO SONBORE 2011

Bǎã mɛn nə n kɔ Manaasee tɔrɔn talɛɛ la

¹ Bǎã kɔ́n dɔ Zozɛfu a nɛgiĩ goledɛnaa Manaasee dɔ tɔrɔn ganaa. Manaasee a nɛgiĩ goledɛnaa Makiiri mɛn bɛ́ Galaati a díi lɛa, Galaati gána kɛ laanka Basan gána kɛ na á dɔ bɛ ganaa. A giala, bɛ na á goã zia-baali lɛa.

² Bǎã kɔ́n dɔ Manaasee tɔrɔ gialakunun kɛn dɔn tanlɛ minin ganaa. Á dɔ Abiezɛɛrɛ a minin ganaa, Elɛki a minin ni, Asiriyeli wɔn nɛ, Sisɛmu wɔn nɛ, Hefɛɛrɛ wɔn nɛ ka Semiidaa wɔn nɛ. Zozɛfu a nɛgiĩ Manaasee a nɛgiĩn man ka bɛn nɛ, ǹ tanlɛ yii li.

³ Selaafaadi mɛn bɛ́ Hefɛɛrɛ laanka Galaati tɔrɔ lɛa, ka Maakiiri laanka Manaasee ne, bɛ nɛgiĩ yɛ wa, yǎa nɛlɔn. A nɛlɔn lɛn tɔn nə́ ke: Maalaa, Noa, Hoglaa, Milkaa, Tirsaa.

⁴ Ǹ kɔn pinaa, nɛlɔn lɛn nə́ n zɔ̃ ǹ nə́ dɔ Lawa a wúlu-bɔle Eleyazaara laanka Nunu a nɛgiĩ Zozoe li ka zaman lɛ a nyɛɛnaandɛnan nɛ, ǹ nə́ pɛ ǹ nɛ: «Dɛnaa Lawa pɛ Muizu ni, mà a die a bǎã kɔ wɔsɛn la wɔ dinin di nɛn lɛn bii.» A kɔnpɛ ka Dɛnaa Lawa a boo ne, ǹ nə́ bǎã kɔ ǹ la ǹ dinin di nɛn lɛn bii ǹ dɔn kíɛ̃ lɛa.

⁵ Bǎã fù na á dɔ Manaasee tɔrɔn lɛn ganaa á n ti Galaati laanka Basan gána kɛ ganaa Zurdɛ̃ tà kio lɛ̀giala-n.

⁶ A giala, Manaasee a nɛlɔn lɛn nə́ bǎã yɛ Manaasee a nɛgiĩn lɛn bii. Sɛnɛ, Galaati gána kɛ na á dɔ Manaasee a nɛgiĩ gialakunun kɛn ganaa.

⁷ Manaasee tɔrɔn gèlè lɛ n siɛ Asɛɛrɛ tɔrɔn bǎã ganaa a wo Mikmetaati kiwi, Sisɛmu kiwi a lɛ̀giala gɔn la. Gèlè lɛ nə n toɛ Mikmetaati, a wo gusin a lɛ̀gɔn la, Ɛn-Tapuwa minin kɛn bǎã nɛ.

⁸ Tapuwa bǎã lɛ na á goã Manaasee tɔrɔn wɔn lɛa. Sɛnɛ Tapuwa kiwi lɛ dinmaa, Manaasee tɔrɔn lɛn gèlè la, bɛ na á dɔ Efrayimu tɔrɔn ganaa.

⁹ Gèlè lɛ nə n toɛ walan a gisĩ a da Kana tà kɛa gusin a lɛ̀gɔn la. Bɛa kiwin lɛn man nə́ goã Efrayimun tɔrɔn wɔn lɛa, Manaasee tɔrɔn kiwin lɛn bii. Manaasee tɔrɔn bǎã lɛ a lɛ doa ǹ bǎã n ka tà lɛ a gɔsɛ a lɛ̀gɔn la nɛ, a kiɛ̃ a wo n doa kɔ̀ gole kɛ ganaa.

¹⁰ Gusin a lɛ̀gɔn la bǎã kɛ na á goã Efrayimu tɔrɔn wɔ lɛa, gɔsɛ a lɛ̀gɔn la bǎã kɛ na á goã Manaasee tɔrɔn wɔ lɛa. Kɔ̀ gole kɛ na á goã ǹ gèlè lɛa. Gɔsɛ a lɛ̀gɔn la, ǹ bǎã lɛ n woe n doɛ Asɛɛrɛ tɔrɔn bǎã ganaa. Lɛ̀giala gɔn la, a n woe n doɛ Isakaara tɔrɔn bǎã ganaa.

¹¹ Isakaara tɔrɔn laanka Asɛɛrɛ tɔrɔn bǎã nɛ, Bɛti-Seyan kiwi laanka a lɛkoro lɛ-a bǎãn man nə́ dɔ Manaasee tɔrɔn lɛn ganaa, Yibuleyamu laanka a lɛkoro lɛ-a bǎãn nɛ, Dɔɔrɔ kiwi ni, Ɛn-Dɔɔrɔ nɛ, Tanaaki ni, Megidoo kiwi laanka a lɛkoro lɛ-a bǎãn nɛ, kiwi sɔɔ.

¹² Manaasee tɔrɔn lɛn nə boo la ǹ nə́ bɛa kiwin lɛn minin loo wa. Bɛ lɛ n ke, Kanaan minin lɛn nə́ n tã ǹ nə́ giã gána kɛ nɛ.

¹³ Izirayeli minin lɛn bɛ́ ǹ nə́ daa ǹ nə́ pàã yɛ, ǹ nə́ Kanaan minin lɛn kaa pàã dí ganaa. Sɛnɛ, ǹ boo ǹ la ǹ nə́ ǹ loo wa.

¹⁴ Zozɛfu a nɛnyaanan nə́ boo da ka Zozoe ne ǹ nə́ pɛ nɛ: «Wàa na á baa, ń bǎã goon toto dinsɔɔ̃ kɔ wɔsɛn la kíɛ̃ lɛa, a da yǎa wɔsɛn man zaman damata lɛa. A giala, Dɛnaa Lawa barka da wɔsɛn ganaa parsiini yǎa á daa kaa pelo lɛ.»

¹⁵ Zozoe tɔ́n pɛ ǹ nɛ: «Ka bɛ́ zaman damata lɛa, Efrayimu a kele yii bǎã kɛ dɔ bɛ́ kiɛɛrɛ ka ganaa á la yii ni, ka wo daã kɛ nɛ, Perɛzi minin laanka Refayimu minin gána nɛ, ka bǎã kuru kaa wɔ lɛa.»

¹⁶ Sɛnɛ, Zozɛfu a nɛnyaanan lɛn nə́ pɛ Zozoe ne: «Kele yii bǎã lɛ a die wɔsɛn boe wa. A giala, Kanaan minin mɛnɛn bɛ́ nyankɔrɔ basa gána kɛ nɛ, fɔlɔ wotoro tá ǹ tumaa lon. Min mɛnɛn bɛ́ Bɛti-Seyan kiwi, ka a lɛkoro lɛ-a bǎãn nɛ, a tá bɛn lon, a tá Zizereyɛli a nyankɔrɔ basa dɛnan kɛn dɔn lon.»

¹⁷ Zozoe tɔ́n pɛ Zozɛfu a minin, Efrayimu laanka Manaasee tɔrɔn lɛn manɛ: «Sonbore ne, ǹ tá zaman damata lɛa, ka pàã dɔ á gole. Ka bɛ́ re bǎã mɛn yii, a goɛ̃ bǎã goon toto dinsɔɔ̃ wa.

¹⁸ Sɛnɛ, kele yii bǎã kɛ dɔ á re doe ka ganaa. A laanɛ á daã lɛa, ka tá re kuri, a tumaa á re goɛ̃ kaa wɔ lɛa, a wo kaa a lɛ lɛ. A laanɛ fɔlɔ wotoron laanka pàã tá Kanaan minin lɛn lon, ka tá re ǹ lui ka ǹ bɔ gána lɛ nɛ.»