Zozoe 14 - LAWA A BOO SONBORE 2011

Bǎã mɛn nə n gii Zurdɛ̃ tà kio lɛ̀nyɛɛnɛ

¹ Izirayeli minin lɛn nə bǎãn mɛnɛn yɛ ǹ kíɛ̃ lɛa Kanaan gána nɛ, bɛn man ka kɛn nɛ. Lawa a wúlu-bɔle Eleyazaara nɛ, Nunu a nɛgiĩ Zozoe laanka Izirayeli tɔrɔn lɛn kɛdɛnan man nə́ bɛa bǎãn lɛn gii Izirayeli minin lɛn bii, ǹ kíɛ̃ lɛa.

² Maǹ nə́ n pã, ǹ nə́ tɔ́n bǎãn lɛn gii tɔrɔ manangɔrɔ ka talɛɛ lɛ bii ǹ kíɛ̃ lɛa, ka Dɛnaa Lawa goã á pɛ Muizu-n lɔn.

³ A giala, Muizu goã á bǎã kɔ tɔrɔ paa ka talɛɛ kɛ la ǹ kíɛ̃ lɛa Zurdɛ̃ tà kio lɛ̀giala-n. Sɛnɛ, *Levii tɔrɔn kɛn, a goã á bǎã kɔ bɛn la ǹ bii ǹ kíɛ̃ lɛa wa.

⁴ Sonbore, Zozɛfu a nɛgiĩn lɛn man nə́ tɔrɔ màn paa baa: Manaasee laanka Efrayimu ni. Levii tɔrɔn lɛn sɛn, ǹ bǎã kɔ bɛn la gána lɛ-n wa. Bɛ̀ á n bɔ giã ǹ kiwin laanka lɛkoro lɛ-a bǎãn nɛ, ǹ tɔɔn laanka ǹ gɔn màn gialakunun wɔ lɛa.

⁵ Dɛnaa Lawa goã á pɛ Muizu-n lɔn, Izirayeli minin lɛn nə́ zɛnaa miɛ̃, ǹ nə́ gána lɛ gii.

Ǹ bǎã mɛn kɔ Kalɛbu la

⁶ Bɛa biikoo li, Zudaa tɔrɔ minin kɔnɔn nə́ daa dɔ Zozoe li Gilgaali. Kenizi tɔrɔ Zefunee a nɛgiĩ Kalɛbu tɔ́n pɛ nɛ: Dɛnaa Lawa boo mɛn da a boo gii-dali Muizu ni masɛ laanka n din Zozoe wɔ paǹ li Kadɛsi-Barneya kiwi, táa n yiri tá a nɛ?

⁷ Dɛnaa Lawa a dí-nyali Muizu bɛ́ n toɛ Kadɛsi-Barneya ma diɛ, mà ma wo ga gána lɛ ganaa ka durii ni, bɛ̀ ma lɛ̀ pusi ni. Má n bɔyaa má daa n gɔ́ɔ̃ pɛ nɛ.

⁸ Ma dɔɔ̃nɔn mɛnɛn nə goã ǹ nə́ woo kun ka ma nɛ, bɛn nə́ zaman lɛ foo biɛ na. Sɛnɛ, Dɛnaa Lawa lɛ, maa Lawa lɛa, masɛ n má goã koe bɛ lɛ ka ma foo tumaa nɛ.

⁹ Bɛa pinaa kɛ lɛ nɛ, Muizu nə́ n liɛ á pɛ kɛnɛn: «N gòã mɛ gána mɛn lɛ nɛ, bɛ á re n laanka n nɛnyaanan kíɛ̃ biɛ yǎa duduu, sàabaa ba bɛ la wa. A giala, Dɛnaa Lawa mɛn bɛ́ masɛ Muizu a Lawa lɛa, á kɔ bɛ lɛ ka a foo tumaa nɛ.»

¹⁰ Dɛnaa Lawa pɛ lɔn, á ke á masɛ yii toa koo á daa dɔ pelo ganaa. Dɛnaa Lawa bɛ́ boo kɛ lɛ pii Muizu ni, bɛ̀ Izirayeli minin lɛn maǹ don bii wɔsɛ kiɛ̃. Bɛ lɛ̀ pusiwensooro n ke. Pelo, masɛ lɛ̀ pɔkiwisiwensooro dɔ nɛ.

¹¹ Sɛnɛ, ma goã kaka lɔn bɛ̀ Muizu bɛ́ ma diɛ giɛ gána lɛ ganaa, man tɔn kaka miɛ̃ haalɛ pelo. Pàã mɛn goã ma lon lɛlɛ má n zia biɛ nɛ, ma soo bɛ̀ ma woo bɛ̀ man bɔyaa, bɛa pàã lɛ miã á tɔn n ma lon pelo.

¹² Dɛnaa Lawa kele yii mɛn boo da bɛa pinaa kɛ lɛ nɛ, bɛ lɛ kɔ masɛ la kanna kəni. A giala, ń ma a din pinaa kɛ lɛ dɔ nɛ, mà Anaaki tɔrɔn tá walan, mà kiwin dadaran dɔn tá a nɛ, ǹ nə́ kungɔn dɔ, ǹ nə́ ǹ lɛnpɛnɛ nɛ. Kɔntan Dɛnaa Lawa á re n doe masɛ lɛ, ma á re ǹ lui ma ǹ bɔ gána lɛ nɛ, ka Dɛnaa Lawa din bɛ́ á pɛ lɔn.

¹³ Zozoe barka da Zefunee a nɛgiĩ Kalɛbu ganaa, á Ebrɔn kiwi kɔ la a kíɛ̃ lɛa.

¹⁴ Bɛ lɛ n ke, Ebrɔn kiwi tá tɔn Kenizi tɔrɔ Zefunee a nɛgiĩ Kalɛbu wɔ lɛa, yǎa a da kaa pelo lɛ. A giala, a na á goã á kɔ Dɛnaa Lawa, Izirayeli minin Lawa lɛ ka a foo tumaa nɛ.

¹⁵ Lɛlɛ, maǹ nə́ goã Ebrɔn kiwi lɛ bíi mà Arabaa a kiwi. Arabaa na á goã Anaaki tɔrɔn lɛn *min gole goon lɛa. A kũ bɛa biikoo lɛ ganaa, gána lɛ goã là nyantoro la, zia ná a banban.