Zozoe 10 - LAWA A BOO SONBORE 2011

Amɔɔrɔ tɔrɔn kiin zia baa Gabawɔ̃ laanka Izirayeli ganaa

¹ Zeruzalɛmu ǹ kii Adoni-Sedɛki ma, mà Zozoe goã á Ayii kiwi yu lenlen. A goã á sii mɛn zɛnaa Zerikoo kiwi laanka a kii ni, a na á bɛ lɛ miã dɔ zɛnaa Ayii kiwi laanka a kii ni. Á ma dɔn, mà Gabawɔ̃ minin lɛn nə́ kɔn wɔ ma ka Izirayeli minin lɛn nɛ, ǹ nə́ giã nɛ Izirayeli minin lɛn bii.

² Bɛ lɛ na á nyɛ́ɛ gole da Zeruzalɛmu minin lɛn ganaa. A giala, Gabawɔ̃ na á goã kiwi gole lɛa, goon ka kiin giã ǹ kiwin kɛn nɛ. Á goã gole á la Ayii kiwi ni. A giĩn tumaa na á goã zia-baali foo taãnaan lɛa.

³ Zeruzalɛmu ǹ kii Adoni-Sedɛki tɔ́n minin dia Ebrɔn kii Hohamu la ka Yarmutin kii Periyamu ni, ka Lakiisin kii Yafia nɛ, ka Egulɔn kii Debiiri ni, mà ǹ wo pɛ ǹ nɛ kɛnɛn:

⁴ «Ka da masɛ li, ka n dɔ ma lɛ, wɔ Gabawɔ̃ minin kɛn dɛ. A giala, ǹ nə́ kɔn wɔ ma ka Zozoe laanka Izirayeli minin lɛn nɛ.»

⁵ Amɔɔrɔ tɔrɔn kii min sooro lɛ nə́ n sɔkɔn: Zeruzalɛmu wɔ nɛ, Ebrɔn wɔ nɛ, Yarmuti wɔ nɛ, Lakiisi wɔ nɛ ka Egulɔn wɔ nɛ. Ǹ dinin laanka ǹ zia-baalin tumaa woo kɔ Gabawɔ̃ kiwi lɛ, ǹ nə́ zia baa a ganaa.

⁶ Gabawɔ̃ minin lɛn dɔn nə́ tɔ́n min dia Zozoe li giã ǹ bǎã kɛ nɛ Gilgaali. Maǹ wo pɛ nɛ kɛnɛn: «Wɔsɛn manə n bɛ̀rɛn lɛa, n baran n gɔn bɔ wɔsɛn ganaa wa. N nanaa n da n dɔ wɔ lɛ, n wɔ kirisibaa. A giala, Amɔɔrɔ tɔrɔn kiin mɛnɛn tumaa bɛ́ giã-n kele yii kɛ nɛ, bɛn man nə́ n lɛ kaa kun, ǹ nə́ daa wɔsɛn gialaa.»

⁷ Zozoe nə́ n toa Gilgaali á woo, a din laanka zia-baali zaman lɛ tumaa nɛ, kun ka zia-baali foo taãnaan lɛn tumaa nɛ.

⁸ Dɛnaa Lawa tɔ́n pɛ Zozoe ne: «N baran nyɛ́ɛ baa ǹ nɛ wa. A giala, má ǹ wɔ n gɔn. Min goon din ba re golee n nyɛɛn wa.»

⁹ Zozoe soo Gilgaali, á tɔ wɔ, á lɛ̀ kaara lɛ waa nɛ, á woo ǹ tɔwaa tán.

¹⁰ Dɛnaa Lawa baa da ǹ gòã li Izirayeli minin lɛn nyɛɛnɛ, á bɔ̀n gole da ǹ ganaa kunu Gabawɔ̃ kiwi li. Á ǹ loo miɛ̃, á Bɛti-Ɔrɔn kele a dii ǹ zii kɛ saa ǹ nɛ. Á saa Azekaa ganaa á ǹ dɛ yǎa Makedaa.

¹¹ Ǹ bɛ́ ǹ nə́ baa si Izirayeli minin lɛn nyɛɛnɛ, ǹ nə́ woo dɔ Bɛti-Ɔrɔn kele a gisĩ ǹ bǎã kɛ nɛ. Dɛnaa Lawa gii dadaran bɔ lon á ǹ duduwəə ne, yǎa Azekaa kiwi. La gii lɛ min mɛnɛn dɛ, bɛn nə́ mɔnaa ǹ nə́ la kɛn manɛ, Izirayeli minin lɛn dinin nə ǹ dɛ ka gɔya sa nɛ.

¹² Dɛnaa Lawa bɛ́ á Amɔɔrɔ tɔrɔn lɛn wɔ Izirayeli minin lɛn gɔn ǹ mɛn pinaa, Zozoe boo da Dɛnaa Lawa nɛ, á pɛ Izirayeli minin lɛn yɔrɔ-a: «Wasa, golee Gabawɔ̃ lalan, nsɛ mui dɔ, golee Ayalɔn a nyankɔrɔ basa kɛ lalan!»

¹³ Wasa golee, mui dɔ́ goã a bǎã nɛ, yǎa Izirayeli gána minin lɛn nə́ boo ǹ zɔ́ɔn la. A boo din tá kiɛ̃-n "min pepere a sɛ́wɔ" kɛ nɛ kɛnɛn: «Wasa golee lon baã la, a n nanaa á n yii sã wa, á lɛawaa goon tumu kɛ miã bɔ lon.»

¹⁴ Dɛnaa Lawa minbuiin nɛ lɛ si bɛa pinaa lɛ nɛ. Bɛa lɛawaa lɛ miã tɔn yɛ wa. A yɛ lɛlɛ wa, a re yii a kio dɔ-n wa. A giala, Dɛnaa Lawa na á goã zia biɛ Izirayeli minin lɛn lɛa.

¹⁵ Zozoe nə́ n bɔyaa á daa giã ǹ bǎã kɛ nɛ Gilgaali, Izirayeli minin lɛn tumaa n kun ni.

Kii sooro lɛ n Makedaa kele yala-n

¹⁶ Bɛa kii sooro lɛ na á baa si, ǹ nə́ woo n duru kele yala kɛ nɛ Makedaa kiwi.

¹⁷ Ǹ nə́ daa pɛ Zozoe ne mà ǹ nə́ kii sooro lɛ yɛ durii-n kele yala kɛ nɛ Makedaa kiwi.

¹⁸ Zozoe tɔ́n pɛ: «Ka kɔlɔ dadaran birikəə̃ ka kele yala lɛ tã nɛ, ka minin doa a li, ǹ na a lɛduə̃.

¹⁹ Sɛnɛ, kasɛn kɛn baran golee wa. Ka kaa zɔ́ɔn lɛn loo, ka saa ǹ kiodɛnan ganaa ka ǹ dɛ. Ka baran toa kaa zɔ́ɔn lɛn nə dɔ ǹ kiwin ni wa. A giala, Dɛnaa Lawa, kaa Lawa lɛ, bɛ́ kaa zɔ́ɔn lɛn wɔ ka gɔn.»

²⁰ Zozoe laanka Izirayeli minin lɛn nə bɔ̀n mɛn da ǹ ganaa, á gole kɔ á la yii ni. Ǹ nə́ ǹ dɛ, ka ǹ daa ǹ nə ǹ nya. Ǹ mɛnɛn nə baa si ǹ nə́ la, bɛn nə́ woo n duru kiwin kɛn nɛ, kungɔn nə́ ǹ lɛnpɛnɛ.

²¹ Zaman lɛ tumaa nə́ n bɔyaa ka là nyantoro ne, ǹ nə́ daa Zozoe li giã ǹ bǎã lɛ nɛ, Makedaa kiwi. Min kɔn boo bɔ a lɛ-n á da Izirayeli minin lɛn ganaa wa.

²² Zozoe tɔ́n pɛ: «Ka kele yala lɛ bũ, ka kii sooro lɛ waa ka bɔ a nɛ, ka da ǹ kɔ ma la.»

²³ Ǹ nə́ zɛnaa miɛ̃. Ǹ nə́ kii sooro lɛ waa kele yala lɛ nɛ, ǹ nə́ woo ǹ kɔ la: Zeruzalɛmun kii ni, Ebrɔn wɔ nɛ, Yarmutin wɔ nɛ, Lakiisin wɔ nɛ ka Egulɔn wɔ nɛ.

²⁴ Ǹ bɛ́ ǹ nə́ ǹ waa ǹ nə́ daa ǹ kɔ Zozoe la, Zozoe tɔ́n lɛ dia Izirayeli minin lɛn tumaa la. Zia-baalin goledɛnan mɛnɛn nə goã ǹ nə́ tɔ wɔ ǹ nə́ woo kun ni, á tɔ́n pɛ bɛn manɛ: «Ka n zɔ̃ ka da kànaa, ka n gòãn kaa kiin kɛn wìi la.» Ǹ nə́ n zɔ̃ ǹ nə́ dɔ, ǹ nə́ n gòãn kaa ǹ wìi la.

²⁵ Zozoe tɔ́n pɛ ǹ nɛ: «Ka baran nyɛ́ɛ baa wa, ka foo baran biɛ na wa. Ka n foo taã, ka n gù we yii. A giala, kaa zɔ́ɔn mɛnɛn tumaa á ke ǹ nə́ die zia biɛ ka ganaa, Dɛnaa Lawa n die zɛnɛɛ ǹ tumaa-n kɛnɛn.»

²⁶ Bɛ kio, Zozoe kii sooro lɛ dɛ ǹ nə́ gã, á ǹ geren lɔɔ lon da sooro ganaa. Maǹ nə́ goã loɛ-n dan lɛn ganaa, yǎa wasa woo mɛ.

²⁷ Wasa a yii sã waáraa, Zozoe tɔ́n pɛ: «Ka ǹ fore, ka ǹ bɔ dan lɛn ganaa. Ǹ goã ǹ nə́ woo n duru kele yala mɛn nɛ, ka ǹ zũ walan.» Bɛ kio, ǹ nə́ kɔlɔ dadaran kɔ yala lɛ lɛ. Bɛa kɔlɔ dadaran lɛn man nə́ goã walan, yǎa á daa kaa pelon lɛ.

Zia mɛn nə n baa gusin a lɛ̀gɔn la kiwin kɛn ganaa

²⁸ A din pinaa kɛ lɛ nɛ, Zozoe Makedaa kiwi kũ. Kiwi lɛ a kii ni, ka min mɛn tumaa goã kiwi lɛ nɛ, á bɛn dɛ. A toa min goon din la wa. A goã á sii mɛn zɛnaa Zerikoon kii ni, a na á bɛ lɛ miã zɛnaa Makedaan kii lɛ dɔ nɛ.

²⁹ Zozoe soo Makedaa, Izirayeli minin lɛn tumaa n kun ni, á woo Libnaa kiwi, á zia baa Libnaa kiwi ganaa.

³⁰ Dɛnaa Lawa bɛa kiwi lɛ dɔ laanka a kii wɔ Izirayeli minin lɛn gɔn. Min mɛn tumaa goã kiwi lɛ nɛ, ǹ nə́ bɛn dɛ. Ǹ min goon din toa kiwi lɛ nɛ a yii n koo wa. Ǹ goã ǹ nə́ sii mɛn zɛnaa Zerikoon kii ni, maǹ nə́ bɛ lɛ miã zɛnaa ǹ dɔn kii lɛ nɛ.

³¹ Bɛ kio, Zozoe soo Libnaa kiwi, Izirayeli minin lɛn tumaa n kun ni, á woo Lakiisi kiwi, á golee walan bɔrɔ, á n yɔrɔ da bɛ la, á zia baa a ganaa.

³² Dɛnaa Lawa Lakiisi kiwi wɔ Izirayeli minin lɛn gɔn. A lɛawaa paabaa ǹ wɔ pinaa, ǹ nə́ kiwi lɛ kũ. Min mɛn tumaa goã kiwi lɛ nɛ, ǹ nə́ bɛn dɛ. Ǹ goã ǹ nə́ sii mɛn zɛnaa Libnaa kiwi ni, maǹ nə́ bɛ lɛ miã zɛnaa ǹ dɔn manɛ.

³³ Bɛa biikoo li, Gezɛɛrɛn kii Oramu woo mà asɛ nə n doe Lakiisi kiwi minin lɛ. A din laanka a zaman nɛ, Zozoe nə́ ǹ dɛ, a ǹ goon din yii toa koo wa.

³⁴ Bɛ kio, Zozoe soo Lakiisi kiwi, Izirayeli minin lɛn tumaa n kun ni, á woo Egulɔn kiwi. Ǹ nə́ golee walan bɔrɔ, ǹ nə́ n yɔrɔ da bɛn la, ǹ nə́ ziabaa ǹ ganaa.

³⁵ Ǹ nə́ kiwi lɛ kũ a din pinaa lɛ nɛ. Min mɛn tumaa goã a nɛ, ǹ nə́ bɛn ziziɛ̃ lenlen. Ǹ sii mɛn tumaa zɛnaa Lakiisi kiwi ni, maǹ nə́ bɛ lɛ miã zɛnaa Egulɔn kiwi dɔ nɛ bɛa pinaa.

³⁶ Bɛ kio, Zozoe soo Egulɔn kiwi, Izirayeli minin lɛn tumaa n kun ni, á woo Ebrɔn kiwi, á zia baa bɛn ganaa.

³⁷ Ǹ nə́ kiwi lɛ kũ. Min mɛn tumaa goã kiwi lɛ nɛ, ǹ nə́ bɛn dɛ lenlen, ka ǹ kii dɔ nɛ. Ǹ ná a kiwin lɛn tumaa ziziɛ̃ lenlen, kɔnlɛ ka min mɛn tumaa goã a nɛ. Zozoe kiwi lɛ a min goon din yii toa koo wa. A goã á sii mɛn zɛnaa Egulɔn kiwi ni, a na á bɛ lɛ miã zɛnaa ǹ dɔn manɛ.

³⁸ Bɛ kio, Zozoe wusoo ka a kio ne, Izirayeli minin lɛn tumaa n kun ni, á n yɔrɔ dia Debiiri kiwi la, á zia baa bɛn ganaa.

³⁹ Zozoe kiwi lɛ kũ, á ná a kii kũ, ka a lɛkoro-a ǹ kiwin tumaa nɛ. Min mɛn tumaa goã bɛa kiwin lɛn nɛ, ǹ nə́ bɛn dɛ, ǹ nə́ ǹ tumaa ziziɛ̃ lenlen. Zozoe min goon yii toa koo wa. A goã á sii mɛn zɛnaa Ebrɔn kiwi ni, a ǹ mɛn dɔ zɛnaa Libnaa kiwi laanka a kii ni, a na á bɛ lɛ miã zɛnaa Debiiri kiwi dɔ laanka a kii ni.

⁴⁰ Zozoe boo gána lɛ tumaa la á kũ: Kele yii bǎã kɛ nɛ, gusin a lɛ̀gɔn la bǎã kɛ nɛ, diə bǎã kɛ nɛ ka kele gòã lasa bǎãn kɛn nɛ. Á ǹ kiin tumaa dɛ. A min goon yii toa koo wa. A laanɛ, màn mɛn tumaa bɛ́ piɛ̃ sii, a na á bɛ tumaa ziziɛ̃ lenlen, ka Dɛnaa Lawa, Izirayeli minin Lawa lɛ goã á pɛ-n lɔn.

⁴¹ Zozoe saa Kadɛsi-Barneya kiwi ganaa, á ǹ dɛ miɛ̃ yǎa Gaazaa, Gosɛnɛ gána tumaa, a wo yǎa Gabawɔ̃ kiwi.

⁴² Zozoe na á bɛa kiin lɛn tumaa laanka ǹ gánan kũ zia goon toto gòã wuu li. A giala, Dɛnaa Lawa, Izirayeli minin Lawa lɛ na á goã zia diɛ Izirayeli minin lɛn lɛa.

⁴³ Bɛ kio, Zozoe nə́ n bɔyaa á woo giã ǹ bǎã kɛ nɛ Gilgaali, Izirayeli minin lɛn tumaa n kun ni.