Zowɛli 1 - LAWA A BOO SONBORE 2011

¹ Dɛnaa Lawa a boo n ka kɛ nɛ, á pɛ Petuweli a nɛgiĩ Zowɛli ni.

Boo mɛn nə n da Zudaa gána a min golen manɛ

² Min golen lɛn, ka n too kɔ kɛ li. Gána minin lɛn, ka tumaa nə n too da! Ka bɛ́ ka tɔn sii mɛn yɛ kaa tá kanaa gɔ́ɔ̃-n wa, ka digolon dɔn dinin bɛ́ ǹ sii mɛn yɛ ǹ tá kanaa gɔ́ɔ̃-n wa, bɛ lɛ n ke die.

³ Ka a laakalaa kaa nɛnyaanan manɛ, kaa nɛnyaanan dɔn na a laakalaa ǹ nɛnyaanan manɛ. Kaa nɔ̀ɔnɔn na a laakalaa ǹ kiodɛnan manɛ.

⁴ Tangiəə̃ nə sɔ̃ á màn mɛn toa, bisin nɛ muə bɛ goa bisin nɛ muə sɔ̃ á màn mɛn toa, bisin tenən nə́ bɛ goa bisin tenən nə sɔ̃ ǹ nə́ màn mɛn toa, bisin dadaran nə́ bɛ goa.

Bisinin basaã kɔ laanka lɛ̀ gere

⁵ Yɔ-mili babaraan lɛn, ka yoo ka n lɛ da wuu ni. Duvɛ̃-milin lɛn, ka tumaa nə n lɛ dɛ koe! A giala, ǹ nə́ duvɛ̃ dii kɛ nafɔ̃ ǹ nə́ bɔ ka lɛ-a.

⁶ Tɔrɔ kɔsɔn nə́ daa kɔ maa gána lɛ. Maǹ kakaarɛ, min ba ǹ lɛ doɛ̃ wa, mɔnaa nɛ ka bisin bɛ́ lɔn. Ǹ sɔn kɛn man ka yàra sɔn bɛ́ lɔn, ǹ pàã gɔnɔn kɛn man ka yàra wɔn bɛ́ lɔn.

⁷ Ǹ nə́ maa rezɛ̃ wuru ziziɛ̃, maa gɔ́rɔ dan kɛn, ǹ nə́ bɛn kakã. Ǹ nə́ ǹ fɔrɔ tumaa gagasaã, ǹ nə́ pɛpɛsɛ̃ tán. Ǹ gùrù bibisinin kɛn tumaa fufu kɔ.

⁸ Ka wuu pɛ ka n lala da, ka nɛniɛ mɛn nə ke, á giɔɔrɔ mɔnaan wɔ, a tá ǹ zuũ a gɛ̀ wuu pii.

⁹ *Belee laanka duvɛ̃ nɛ, bɛ kɔn ba yii á die Lawa a kion doo Dɛnaa Lawa gɔ ǹ màn lɛa wa. Wúlu-bɔlen mɛnɛn bɛ́ Dɛnaa Lawa a dí nyɛɛ, bɛn foo ziziɛ̃ ka gɛ̀ na á gã ǹ la.

¹⁰ Wurun nə́ ziziɛ̃ tán mànan foo ziziɛ̃. A giala, belee ziziɛ̃, duvɛ̃ banban doo wa, nyɔɔ banban doo wa.

¹¹ Buu-Kɔsɔlin gù gã, rezɛ̃ wuru-bɔlen tá n lɛ didii. Belee banban, *ɔrzi banban wuru gɔ́ɔ̃ màn tumaa ziziɛ̃.

¹² *Rezɛ̃ dan nə́ tutusi, gɔ́rɔ dan nə́ bɛbɛnɛ. Grenadie da nɛ, tamaran da nɛ, da nɛ-kɔle tumaa don, ǹ tumaa gã. Min kɔn foo a kɔɔ̃n wa.

Lɛ-sɔɔ laanka Lawa nyankɔ

¹³ Lawa a wúlu-bɔlen lɛn, ka gɛ̀ koa ǹ mɔnaan wɔ, ka wuu pɛ. Kasɛn mɛnɛn bɛ́ *wúlu bɔ ǹ bǎã kɛa dí nyɛɛ, ka n lɛ dɛ. Kasɛn mɛnɛn bɛ́ dí nyɛɛ maa Lawa nɛ, ka n yɔrɔ kɔsɛ, ka lɛ̀ waa nɛ. A giala, minin ba die ka belee laanka duvɛ̃ nɛ Lawa gɔ ǹ wɔ lɛa, Lawa a kion doo wa.

¹⁴ Ka lɛawaa bɔ, ka n lɛ sɔɔ bɛ li. Ka zaman bii a tɔ-a, ka min golen lɛ sɔkɔn, ka gána lɛ a minin tumaa nɛ, Dɛnaa, kaa Lawa a kion kɛ nɛ, ka goã-kũ da Dɛnaa Lawa ganaa.

Dɛnaa Lawa a lɛawaa

¹⁵ Haya! Lɛawaa lɛ a mɛn tɔrɔ-n ke! Dɛnaa Lawa a lɛawaa lɛ diri. A n die n biɛ ka basaã-kɔle a basaã bɛ́ lɔn, boe Pàãyiidɛnaa Lawa li.

¹⁶ Màn-bii lɛ bie á nya wɔ dinin yii-n wa ya? Foo kɔɔ̃nbaa laanka nyɛnyɛɛ lɛ bie á nya Lawa a kion wɔ dinin yii-n wa ya?

¹⁷ Màn tɔrɔn nə́ ke boɛ̃ tán tii li. Dɔǹɔn gɔ́ɔ̃ kooro ne, màn tamaa ǹ bǎãn lɛn nə́ kaa. A giala, belee banban.

¹⁸ Á ke, tɔɔn lɛ-baa ba nɛn wa! Diin manə n binbirin boe, buu sɔ̃ ǹ bǎã banban. Bòen laanka sèren, bɛn dɔn dinin nə́ pɛpɛrɛ.

Zowɛli a Lawa nyankɔ

¹⁹ Dɛnaa Lawa, ma nə n lɛ dii n din li. Tɛ á ke á tɔɔn buu sɔ̃ ǹ bǎã lɛ kũ don, tɛ lɛ da tumaa kũ don.

²⁰ Haalɛ don mànan dɔn dinin manə n yɔrɔ diɛ n din la. A giala, mu piɛ̃ á n bɔ pɛrɛn nɛ, tɛ tɔɔn buu sɔ̃ ǹ bǎã tumaa kũ don.