Zeremii 8 - LAWA A BOO SONBORE 2011

¹ Bɛa waáraa, minin tá re Zudaa kiin wen wɛɛ yala-n, ǹ gána nyɛɛnaandɛnan wɔn nɛ, ǹ Lawa a wúlu-bɔlen wɔn nɛ, ǹ Lawa a boo gii-dalin wɔn nɛ, ka Zeruzalɛmu minin wɔn nɛ. Dɛnaa Lawa a da ǹ boo ne.

² Ǹ tá re bɛa wen lɛn nyɔmiɛ tán bǎã tumaa nɛ, wasa li, mui yɔrɔ-a ka leere damata kɛn nɛ, ǹ nə́ ǹ narɛ, ǹ nə́ dí nya ǹ nɛ, ǹ nə́ kɔ ǹ lɛ, ǹ nə́ n gɔn nɔɔ ǹ la, ǹ nə́ ǹ guguru kɔ. Bɛ lɛ nɛ, min kɔn ba re ǹ wen goɛ a ǹ kaa yala-n doo wa. Sɛnɛ maǹ die mànan bù biɛ tán la.

³ Ma bɛ́ tɔrɔ baraa kɛa yiikoonaan mɛnɛn pɛsɛ̃ bǎã woo bǎã nɛ, gɛ̀ á re soɛ koe ǹ ganaa yiikoonaabaa nɛ. Dɛnaa Lawa Pàãyiidɛnaa a da ǹ boo ne.

Zeruzalɛmu minin mìi n laa nɛ

⁴ Dɛnaa Lawa a boo á ke: Bɛ̀ min mɛnaa, a n yui. Bɛ̀ min sã zii ganaa, a n wusii ka a kio ne.

⁵ Wàa na á baa Zeruzalɛmu zaman nə n lɛ goa zii kɛ ganaa, ǹ nə́ tɔn woe nyɛɛnɛ n piɛ̃ ka masɛ nɛ? Maǹ doa-n màn kooron ganaa, manə n piɛ̃ ǹ ba wusii die ma li wa.

⁶ Má n too kɔ ǹ lon taãn-taãnɛ. Ǹ bɛ́ boo mɛn diɛ mìi ba la wa. Ǹ kɔn ba wusii a sii bɔnɛɛn kio wa. Ǹ kɔn ba nɔ̀n diɛ a din la ka a zɛnaa ǹ sii-n wa. Ǹ tumaa n baa sii ka sùin bɛ́ lɔn ziabaa ǹ bǎã nɛ.

⁷ Gɔgɔrɔ mɛn din bɛ́ lon, a woo biikoo ke, á bɛ doɛ̃. Leere bàan nɛ ka yongoo ne, bɛn tumaa ta ǹ wusoo a daa biikoo doɛ̃. Sɛnɛ, ma landan mɛnɛn koa, maa zaman lɛ sɛ a bɛn doɛ̃ wa.

Sii-dɔ̃lin sii-doɛ̃ là ba ǹ ganaa wa

⁸ A n siɛ lɔn ka á pii: «Wɔ n sii-dɔ̃len lɛa, Dɛnaa Lawa a dí-pɛ lɛ n wɔ dinin gɔn.» Sonbore, sɛ́wɔ-kiɛ̃lin lɛn man soɛ-bɔlen lɛa, maǹ dí-pɛ ǹ boon lɛn kɔkɔrɔ koe.

⁹ Bɛa sii-dɔ̃len lɛn manə n piɛ̃ ka Dɛnaa Lawa a boon ne. Ǹ sii-doɛ̃ lɛ a là n ka wàa-n kəni? Sìi nə́ n kɔ ǹ lɛ, nyɛ́ɛ nə ǹ ganaa, kan nə́ ǹ kũ.

Minin mà sii kɔn banban

¹⁰ Dɛnaa Lawa pɛ: Á bǐɛ̃ kɔ, Man die ǹ lɔn koe min kɔsɔn la, ma ǹ wurun kɔ ǹ kũ wolen la. A giala, a kũ ǹ boɛɛndɛnaa ganaa a wo ǹ goledɛnaa yaa, ǹ tumaa n giɛ là li. A kũ Lawa a boo gii-dalin ganaa a wo Lawa a wúlu-bɔlen yaa, ǹ tumaa n kɔkɔrɔ.

¹¹ Koe mɛn bɛ́ maa zaman yii, ǹ ba bɛ biɛ ǹ parsii lɛa wa. Maǹ pii «sii banban, sii banban», A da yaa sii tan.

¹² Ǹ sii bɔbɔnɛɛn mɛnɛn zɛnaa, bɛ á sìi diɛ ǹ ganaa? Kɛnɛn dinin wa. A ǹ mìi da kuməə ganaa wa. Bɛ lɛ nɛ, ǹ tá re mɛnɛɛ kun ka mɛnaa wolen ne. Bɛ̀ ma yoo ǹ gialaa, ǹ tá re woe n dinin yiɛ tán. Dɛnaa Lawa a da ǹ boo ne.

Foo doa ǹ bǎã banban doo wa Dɛnaa Lawa

¹³ Ka boo taãn nɛ, man die ǹ sàabiɛ lenlen. Dɛnaa Lawa a da ǹ boo ne, rezɛ̃ ba re goɛ̃ *rezɛ̃ da la wa, gɔ́rɔ ba re goɛ̃ gɔ́rɔ da la wa. Ǹ luu á re laɛ. Man die ǹ we kiɛ̃ wolen gɔn.

Zaman

¹⁴ Waa na á baa wɔ á tán kànaa? Ka wɔ n lɛ sɔkɔn wɔa kiwi tamaa wole sonboren kɛn nɛ, wɔ n yii da gɛ̀ la, a giala, wɔa Lawa, Dɛnaa Lawa n zoɛ̃ li a wɔ dɛ. A n wɔ kiɛ sèwò mii ganaa. A giala wɔ n wɔ́ sii baraa zɛnaa nɛ.

¹⁵ Wɔ nə n yii diɛ là nyantoro la, sɛnɛ, sii sonbore kɔn ba n zɛnɛɛ wa. Wɔ nə n yii diɛ busu á nya la, sɛnɛ, nyɛ́ɛ n die.

¹⁶ Zɔ́ɔ nə́ n toa Dan á die. Ǹ sùin lɛ baa wuu n boe. Tán tumaa n bìn diɛ ǹ lɛ baa nyɛɛnɛ. Ǹ nə́ ke yii die, maǹ die gána lɛ ziziɛ̃, kɔnlɛ ka a gɔ́ɔ̃gɔ́ɔ̃ ǹ màn tumaa nɛ, ka kiwi lɛ laanka a minin ni.

Dɛnaa Lawa

¹⁷ Man die miɛ̃ baraan diɛ ka la. Màn kɔn ba re boe la a ǹ kurəə sɔn doe ganaa wa. Maǹ die sɔn doe ka-a. Dɛnaa Lawa a da ǹ boo ne.

Zeremii

¹⁸ Màn kɔn ba boe la a maa foo busii kɛ nya wa. Ma foo n ka a yu!

¹⁹ Ka n too kɔ, Maa zaman lɛ nə n toɛ wɔlɔ sɔsɔɔ nɛ, gú diɛ, Maǹ pii: «Dɛnaa Lawa ba *Siɔn doo wa? Kii ba kiwi lɛ n doo wa?» Maǹ nə́ ma foo yoo ka ǹ dìn kɛn nɛ, ka lawa kɔsɔn kɛn nɛ. Wàa na á baa kəni?

Dɛnaa Lawa Zeremii

²⁰ Kaa-piɛ nya, tɛ̀fuu waáraa kiɛ̃, á ke wɔ tɔn kirisibaa wa.

²¹ Koe n ma mìi ni, maa zaman lɛ a koe taman yii. Ma foo ziziɛ̃, ma yiri nə́ n lɔlɔkɔn.

²² Da banban Galaati a n la paparɛɛ nyɛɛ wa? Dɔɔtɔrɔ ba walan doo wa? Wàa na á baa maa zaman lɛ a baayɛrɛ a nyɛɛ wa?

²³ Bɛ̀ ma mìi n mu yala lɛa hinlaa bɛ̀ ma yii mu na a nyɛɛ wa, bɛ̀ man wuu pii penleen laanka tèlò ne maa zaman lɛ a geren lɛa.