Zeremii 6 - LAWA A BOO SONBORE 2011

Koe n die Zeruzalɛmu ganaa

¹ Bɛnzamɛn tɔrɔn lɛn, ka soo ka n bɔ Zeruzalɛmu! Ka n duru bǎã kɔsɔ nɛ. Ka sère gɔ̀lɔ̀ bɛn pɛ Tekoa, ka sii giala pɛ ǹ màn doa tán Bɛti-kerɛmu. A giala, koe n die, koe taãn-taãn lɛa, boe gɔsɛ a lɛ̀gɔn la.

² Á ke, *Siɔn nə die yui, kiwi siĩn sonbore ke!

³ Tɔɔ-lɛduəlin tá re die a gialaa, kun ka ǹ tɔɔn tumaa nɛ. Ǹ tá re mɔnaa kionən doe ǹ na a lɛnpɛnɛ nɛ. Didie á re a tɔɔn lɛduĩ a bǎã nɛ.

⁴ Maǹ nə́ n lɛ dii: «Ka yoo! Wɔ n yɔrɔ bɔ zia taman yii! Ka wɔ n ta Zeruzalɛmu gialaa, penleen! Ebe! Wasa mɛ, da wúlun nə́ sasa kɔ.

⁵ Ka yoo! Ka wɔ n ta a gialaa tèlò-n, wɔ a kion sonboren kɛn ziziɛ̃!»

⁶ Dɛnaa Lawa Pàãyiidɛnaa a da ǹ boo á ke: «Ka dan kuru, ka ziabaa ǹ kungɔn dɔ Zeruzalɛmu ganaa.» Kiwi mɛn doamaa bɛ-n ka dɔlɔ nɛ, asɛ mɛn a sii tumaa bɛ́ ka kakaarɛbaa nɛ.

⁷ Mu piã bɛ́ a mu sui lɔn, a dɔ na a baraabaa lɛ sui miɛ̃. A kiwi bii, kakaarɛbaa laanka wɔlɔ yui dinsɔɔ̃ boo na a tan. Biikoo tumaa li, nɔmaa laanka busulɛn man ma yii giulun.

⁸ Zeruzalɛmu, lɛ kɔ maa doroon ganaa, bɛ bie wa, man die n lɛ boe n ganaa, ma n baa diə gole lɛa, tán lɛa min ná a boe la a giã la wa.

Zaman nə́ n piã ka too kɔ nɛ Dɛnaa Lawa

⁹ Dɛnaa Lawa Pàãyiidɛnaa a da ǹ boo á ke: Izirayeli min gialakunun kɛn, ka ǹ tumaa goa, ka rezɛ̃ bɛ́ lɔn wuru-n. Ka n gɔn talaa *rezɛ̃ da lɛ la doo gunyin damata, ka ǹ dɛnaa bɛ́ zɛnɛɛ lɔn kaa-piɛ waáraa.

Zeremii

¹⁰ Ma doamaa nɛ ma boo da die ne? Ma doamaa nɛ man gɔn waa die ne, a n too kɔ ma lon? Ǹ too tiɛ̃maa nɛ, ǹ ba n too koe doɛ̃ wa. Ǹ laadoo bie ka Dɛnaa Lawa a boo-n wa. Ǹ ba li wa.

¹¹ Ma piɛ̃maa-n ka Dɛnaa Lawa a foo-busii ni. Ma a boe la ma kũ ma foo n doo wa. Bɛa foo-yoo lɛ sawaa nɛnyaanan la zii la, kɔnlɛ ka nɛ tenən tumaa nɛ. Ǹ tumaa tá re kòso nɛn biɛ, giĩn ni lɔn nɛ, min golen ne ka min zizin ni.

Dɛnaa Lawa

¹² Ǹ kionən tá re min kɔsɔn wɔ biɛ, kɔnlɛ ka ǹ wurun ni ka ǹ lɔn nɛ. Ma á re n gɔn siɛ gána kɛa minin li. Dɛnaa Lawa a da ǹ boo ne.

¹³ A giala, a kũ ǹ boɛɛndɛnaa ganaa a wo ǹ goledɛnaa yaa, ǹ tumaa n giɛ là li. A kũ ǹ Lawa a boo gii-dalin ganaa a wo ǹ Lawa a wúlu-bɔlen yaa, ǹ tumaa n kɔkɔrɔ.

¹⁴ Koe mɛn bɛ́ maa zaman lɛ mìi ni, ǹ ba bɛ biɛ ǹ parsii lɛa wa. Maǹ pii: «Sii kɔn banban, sii kɔn banban!» A da yaa, sii tan.

¹⁵ Ǹ sii bɔbɔnɛɛn mɛnɛn zɛnaa, bɛa sìi tá ǹ ganaa? Kɛnɛn dinin wa! A ǹ mìi da kuməə ganaa wa. Bɛ lɛ nɛ, ǹ tá re mɛnɛɛ kun ka mɛnaa wolen ne. Bɛ̀ ma yoo ǹ gialaa, ǹ tá re woe n dinin yiɛ tán. Dɛnaa Lawa a da ǹ boo ne.

¹⁶ Dɛnaa Lawa bɛ màn mɛn pii á ke: Ka zii mɛn saa, ka golee bɛ la, ka n taasɛ. Ka nɔ̀n da lɛlɛ ǹ ziin kɛn nɛ, ka ga zii lɛ a sonbore li, ka kɔ lɛ. Ka bɛ nɛ, ka á re susui yii ka dinin wɔ lɛa. Sɛnɛ, ǹ nə́ pɛ kɛnɛn: «Wɔ a re koe lɛ wa.»

¹⁷ Má minin bɔ má ǹ koa máa ǹ nə n gɔn waa ǹ nɛ: «Bɛ̀ ka sère gɔ̀lɔ̀ bɛn wuu ma, ka yiri bɔ.» Sɛnɛ, ǹ nə́ pɛ: «Wɔ laadoo bie wa.»

¹⁸ Bɛ lɛ nɛ, tɔrɔ kɔsɔn lɛn, ka n too kɔ. Sii mɛn bɛ́ re ǹ yii ka tumaa bɛ dɔ̃.

¹⁹ Ka n too kɔ kanaa tumaa a tɔrɔn: Man die koe boe minin kɛn ganaa. Ǹ dí mɛn lɛ bɔ, bɛ lɛ a binyəə ne. Ma boo mɛn da ǹ nɛ, ǹ yiri bɔ bɛ li wa. Ǹ nə́ n piã ka maa dí-pɛn nɛ.

²⁰ Ka bɛ́ boe da yon gìĩ kɔɔ̃n nɛ Sabaa ka n die ne, ka gána sɔsɔɔ buu gìĩ kɔɔ̃n kɛ nɛ masɛ wɔ lɛa, bɛ là n ka wàa-n kəni? Kaa *wúlu màn tiɛ̃n kɛn, ma ba ǹ li wa. Kaa wúlu mànan kɛn ba kɔɔ̃n ma ganaa wa.

²¹ Dɛnaa Lawa bɛ́ boo mɛn diɛ, á ke: Man die màn koɛ tán zaman kɛ nyɛɛnɛ, a ǹ bɔ a ǹ kaa. Ǹ tumaa á re giɛ̃ kun, díin laanka nɛnyaanan nɛ, miãkɛn laanka giaáran nɛ.

Zɔ́ɔn boe gɔsɛ a lɛ̀gɔn la die Dɛnaa Lawa

²² Dɛnaa Lawa bɛ́ boo mɛn pii, á ke: Tɔrɔ goon nə boe gɔsɛ a lɛ̀gɔn li die. Zaman gole kɔ́n nə n toɛ kanaa lɛ dan ganaa die.

²³ Ziabaa ǹ mànan manə ǹ sɔraasin gɔn, sa laanka ziabaa ǹ màn lɛ pɛpɛnɛn nə́ ǹ gɔn. Maǹ baraa, ǹ ba makara doɛ̃ wa. Ǹ bìn diɛ wuu n boe ka yìsi mu gole a ginii bɛ́ lɔn. Maǹ sùin la, telee-n kɔn li sɔnbɔraa nɛ, ǹ nə́ die ziabiɛ n ganaa Siɔn kiwi.

Zaman

²⁴ Wɔ bɛ́ wɔ bɛa kibərə lɛ ma, wɔ foo ziziɛ̃, nyɛ́ɛ wɔ kũ, wɔ n nɔmaa nɛ ka lɔ bɛ́ lɔn a nɛ yɛ biikoo li.

²⁵ Ka nyan wo wuru-n wa, ka nyan wo ziin la wa. A giala, zɔ́ɔ tan, a n gɛ̀ dii. Nyɛ́ɛ n bǎã tumaa nɛ.

Dɛnaa Lawa

²⁶ Maa zaman, ka gɛ̀ koa ǹ mɔnaa wɔ. Ka n birikəə̃ tii li. Ka gɛ̀ zɛnaa giala kɔ, ka nɛgiĩ goon toto wɔ bɛ́ lɔn. Ka gɛ̀ koa ǹ loe kɔɔsɛ lɔ. A giala, sisia bɛ̀ zɔ́ɔ basaã-kɔle lɛ dɔ ka ganaa.

Zaman lɛ n zaman gòãn dii wolen lɛa Dɛnaa Lawa

²⁷ Zeremii, man má n bɔ má n koa maa zaman lɛ bii, ka fɔlɔ dí-nyali bɛ́ lɔn. Ga ǹ sii zɛnaa ǹ gɔn ganaa, n nə n da ǹ gɔ́ɔ̃ li.

Zeremii

²⁸ Ǹ tumaa n gòãn dii wolen lɛa, Ǹ foo n kaka. Maǹ soɛ diɛ kɔn la. Ǹ sii a kakabaa n ka zan hinlaa fɔlɔ wɔ bɛ́ lɔn. Ǹ tumaa n basaã-kɔle lɛa.

²⁹ Fuũ na a tɛ zoɛ̃ biikoo yii li. Bɛ̀ á daa a zii li, fɔlɔ n yoe tɛ-n. Fuũ lɛ n zoɛ̃ li mà a zan lɛ yoreen kɔ. Sɛnɛ kànaa, bɛa yɔrɔ yii wa, *gɔ̀ lɛ a boe wa.

³⁰ Maǹ bɛa minin kɛn lɛn bíi: "wɔrɔ bɔbɔnɛɛ". A giala, maǹ màn bɔbɔnɛɛ lɛa Dɛnaa Lawa yɔrɔ-a.