Zeremii 5 - LAWA A BOO SONBORE 2011

Lawa n boo diɛ kɔnlɛ ka a boo gii-dali ni Zeruzalɛmu a paǹ li Dɛnaa Lawa

¹ Ka wo bǎã tumaa nɛ, Zeruzalɛmu a ziin la, ka ga sɔnbɔraa nɛ, ka nɔ̀n da, Ka ga a bǎã dadaran nɛ, Bɛ̀ ka min goon yɛ, pepere, bɔlɔgoondɛnaa lɛa, ma á re makara boe Zeruzalɛmu ganaa kəni.

Zeremii

² Bɛ̀ ǹ tá liɛ we, maǹ pii: «Ma nə n liɛ ka Dɛnaa Lawa Yiikoonaa tɔ nɛ.» Sɛnɛ, ǹ liɛ tumaa n soɛ lɛa.

³ Dɛnaa Lawa, n bie giɛ sonbore taãn li wa? Ń nə́ ǹ dɛ, sɛnɛ a wɔ ǹ ganaa wa. Ń bɔ̀n da ǹ ganaa, sɛnɛ, ǹ nə́ n piã ka n doroon ne. Ǹ nə́ n mìi laa ka kɔlɔ bɛ́ lɔn, ǹ nə́ n piã mà ǹ ba die n li wa.

⁴ Man taasɛ: «Min mɛnɛn bɛ́ ǹ ba n taasɛ sɔsɔɔ wa, bɛn zɛnaa ǹ sii n kɛ nɛ. Maǹ sii zɛnɛɛ ǹ nə́ ǹ ba n taasɛ wa. Taãn nɛ! Ǹ ba ǹ Dɛnaa Lawa dùũ doɛ̃ wa, ǹ ba a dí-pɛn dɔn doɛ̃ wa.

⁵ Man die woe nyɛɛnaandɛnan li, ma á re boo diɛ ǹ nɛ, ta a baalan, bɛn tá Dɛnaa Lawa dùũ doɛ̃ ka ǹ Lawa a dí-pɛn nɛ.» Sɛnɛ, haayii! Ǹ tumaa kun, ǹ nə́ ǹ zǔun yiyiɛ, ǹ nə́ ǹ biɛn nana.

⁶ Bɛ lɛ nɛ, daã gòã li ǹ yàra á re ǹ kuĩ, don ginin nə ǹ sɔ̃. Goe tá re n yii diɛ ǹ la kunu ǹ kiwin ganaa, a minin kũ ǹ soo waáraa. Sonbore, ǹ sii baraan nə́ mɔnaa á la yii ni, ǹ bɔlɔgoonbaãdɛnaabaa kɛ a n nimii doɛ̃ wa.

Dɛnaa Lawa

⁷ Man makara boe n ganaa lɔn kəni Zeruzalɛmu? N nɛnyaanan nə́ n la bɔ ma ganaa. Mànan mɛnɛn bɛ́ ǹ ba Lawa lɛa wa, maǹ liɛ we ka bɛn tɔ nɛ. Ǹ bɛ́ màn mɛn tumaa li, má a tumaa kɔ ǹ la. Sɛnɛ, ǹ nə́ naarɛbaa zɛnaa, ǹ nə́ kɔn nyɛnyɛnaa ǹ nə́ woo kɔrɔbaa ǹ kion.

⁸ Ǹ bɛ́ màn mɛn lɛa, sùi kasiɛ̃ wolen manɛ, lɔ sii nə́ ǹ ganaa. Didie tumaa n baa sii ǹ miãkɛn a lɔ kio.

⁹ Dɛnaa Lawa a da ǹ boo á ke: Ma kɔnbɔ ma yoo minin kɛn gialaa wa? Ma doamaa bie ma maa gɛ̀ dòo bɔ tɔrɔ kɛ miã ganaa wa?

¹⁰ Ka dii kungɔn la ka *rezɛ̃ da kɛ ziziɛ̃. Sɛnɛ, ka nyan ziziɛ̃ lenlen wa. Ka a gùrùn kukuru, ǹ bie masɛ wɔn lɛa wa.

¹¹ Zudaa minin nə́ ma yiri sã, Izirayeli minin nə ma yiri sã taãn-taãnɛ. Dɛnaa Lawa a da ǹ boo ne.

Bɔlɔgoonbaãdɛnaabaa a saraa

¹² Zudaa minin nə́ soɛ bɔ Dɛnaa Lawa wɔ paǹ li. Ǹ nə́ pɛ mà a banban. Koe á re boe wɔ ganaa wa, wɔ a re zia yii wa, bòo á re wɔ kuĩ wa!

¹³ Lawa a boo gii-dalin lɛn man piɛ̃ kooro lɛa. Lawa boo kɔn da ǹ nɛ wa. Ǹ bɛ́ koen mɛnɛn pii, maǹ die kuĩ ǹ dinin mìi ni.

¹⁴ Bɛ lɛ nɛ, Dɛnaa Lawa Pàãyiidɛnaa bɛ́ boo mɛn diɛ, á ke: «Ǹ bɛ́ boo diɛ ka kɛa yɔrɔ kɛ nɛ, ma bɛ́ boon mɛnɛn we n lɛ-n Zeremii, bɛ n die goɛ̃ ka tɛ bɛ́ lɔn. Tɔrɔ kɛ n die goɛ̃ ka gɔn bɛ́ lɔn, tɛ n kuĩ.»

¹⁵ Á ke, Izirayeli minin, tɔrɔ mɛn bɛ́ boe sɔsɔɔ, man die bɛ diɛ ka ganaa. Dɛnaa Lawa a da ǹ boo ne. Tɔrɔ nɛ pàã ná a lon, Tɔrɔ zizi ni, tɔrɔ lɛa, ka a ǹ bɔlɔ miɛ̃ wa, ka a ǹ boo a woo ǹ bǎã yii wa.

¹⁶ Ǹ kiɛn man gɛ̀ pɛsɛ̃, ǹ sɔraasin miã banban.

¹⁷ Maǹ màn tumaa ziziɛ̃: kaa kaa-piɛ mànan nɛ, kaa màn-biin ni, kaa nɛgiĩn laanka kaa nɛlɔn nɛ, kaa tɔɔ bisinin laanka kaa tɔɔ dadaran nɛ, kaa rezɛ̃ dan laanka kaa gɔ́rɔ dan nɛ. Zia á re kaa kiwi tamaa wolen yui, ka goã taasɛ mà ka á re yii-nyɛɛ yii ǹ mɛnɛn lɛn nɛ.

¹⁸ Sɛnɛ, bɛa biikoo lɛ li, ma a re ka bɔ̀n biɛ lenlen wa. Dɛnaa Lawa a da ǹ boo ne.

¹⁹ Bɛ̀ minin tá nɔ̀n diɛ mà wàa na á baa Dɛnaa Lawa, wɔa Lawa kɛ tumaa zɛnaa wɔ nɛ, nsɛ Zeremii, n tá re ǹ lɛ sii n pɛ ǹ nɛ kɛnɛn: «Ka ǹ ka n la bɔ a ganaa, ka dí nya lawa kɔsɔn manɛ kaa gána nɛ. Ka bɛa yɔrɔ lɛ nɛ, ka ǹ die dí nyɛɛ tiin manɛ gána nɛ a ná a bie kaa gána lɛa wa.»

Lawa nə n gɔn wɛɛ a zaman nɛ

²⁰ Ka boo kɛ pɛ Zakɔba a kion minin manɛ, ka toa a kaa Zudaa minin too ne.

²¹ Ka n too kɔ kəni, tɔrɔ yiriwɛɛnaan kɛn, baãnaan lɛa. Ka yiin tan sɛnɛ ǹ ba wɔlɔ yii wa, ka toon tan sɛnɛ ǹ ba boo miɛ wa.

²² Ka a ma guguru koe wa? Ka a nyɛ́ɛ biɛ ma-n wa? Dɛnaa Lawa a da ǹ boo ne. Ma din ni má nyɔɔsɔ̃ kaa tán yìsi mu gole lɛdan lɛa yǎa duduu, sɛnɛ a ba a la boe ǹ kɔn pinaa wa. A mu á boe la a yoo, sɛnɛ pàã n nyaabiɛ a ganaa. Á boe la a gini, sɛnɛ a ba re a la boe wa.

²³ Sɛnɛ, kasɛn man tɔrɔ too kaka, gòãn dii wolen lɛa. Ka n dɔ̀ɔ̃ wɔ ma nɛ, ka woo.

²⁴ Ka a pii dɔn dinin: «Ka daa wɔ nyɛ́ɛ baa Dɛnaa Lawa, wɔa Lawa yii-n wa, asɛ mɛn bɛ́ la mu koe wɔ la a biikoo li, a bibinaa laanka a nyɔɔbaa. Lɛ̀ woo lɛ̀, a n lɛawaan boe koɛ wɔ nɛ kaa-piɛ wɔ lɛa.»

²⁵ Kaa sãn nə́ bɛ tumaa lɔlɔkɔn. Kaa sii baraan nə́ toa ka fɔ̃ bɛa bǐɛ̃n lɛn li.

²⁶ A giala, min baraan tá maa zaman lɛ bii. Ka dɔ-dɔli bɛ́ lɔn, manə n duri, ń yii diɛ. Maǹ nə́ kan kɔ ǹ tá minbuiinin kuĩ ni.

²⁷ Bàanan kion bɛ́ piɛ̃ lɔn ka bàanan nɛ, ǹ dɔn kionən piɛ̃maa-n ka mànan nɛ, mɛnaa ma la ǹ mànan lɛa. Bɛ lɛ nɛ, ǹ nə́ yii gugurubaa yɛ, ǹ nə́ pàãman baa.

²⁸ Ǹ nə́ kã, ǹ wìi wɔ. Maǹ sii baraa zɛnɛɛ yǎa ǹ kiɛ̃ a dan la. Sɛnɛ ǹ sii tumaa n bǐɛ̃ koe. A da yaa ǹ ba nɛ toen a zia gii diɛ wa, ǹ ba kiri pepere we doobaan lɛa wa.

²⁹ Dɛnaa Lawa a da ǹ boo á ke: Ma kɔnbɔ ma yoo minin kɛn gialaa wa? Ma doamaa bie ma maa gɛ̀ dòo bɔ tɔrɔ kɛ miã ganaa wa?

³⁰ Sii bɔbɔnɛɛn ka foo yoo siin manə n zɛnɛɛ gána kɛ nɛ:

³¹ Lawa a boo gii-dalin man soɛ boon didiɛ, Lawa a wúlu-bɔlen manə n gɔn kuĩ ǹ pàã ganaa. Maa zaman dɔ ǹ lɛ koe bɛ lɛ ganaa! Sɛnɛ bɛ kio, ka ǹ die wàa zɛnɛɛ?