Zeremii 48 - LAWA A BOO SONBORE 2011

Lawa a boo Moabu minin wɔ paǹ li

¹ Moabu minin paǹ li: – Dɛnaa Lawa Pàãyiidɛnaa, Izirayeli a Lawa n kɛ pii: Wàa koe n ka kɛ nɛ Neboo kiwi ganaa: ǹ nə́ ziziɛ̃! Wàa sìi n ka kɛ nɛ Kiritayimu kiwi ganaa: ǹ nə́ yɔyɔrɛ! Kiwi ke tamaa-n sɔnbɔraa nɛ, sìi laanka nyɛ́ɛ gole nə́ n kɔ lɛ!

² Màn mɛn bɛ́ Moabu diɛ din koa ganaa, bɛ́ papaã. Minin man koe yɔrɔ boe Ɛsibɔn ganaa, ǹ nə́ pii: «Ka daa wɔ kiwi kɛ yu, wɔ bɔ tɔrɔn bii!» Nsɛ dɔ Madmɛn, ǹ tá re n diɛ lɛ tã ganaa, ǹ tá re n bɔ̀n biɛ ka zia nɛ.

³ Lɛ-dɛ n boe Oronayimu kiwi. «Màn tumaa ziziɛ̃! Wàa koe baraa n ka kɛ nɛ!»

⁴ Ǹ nə́ Moabu gána yu, a nɛnyaanan manə n lɛ dii kɔsɛ kɔsɛ.

⁵ Minin man dii Luhiti tenten la ka wuu ni. Oronayimu a tenten a gisĩ ǹ bǎã kɛ nɛ, foo ziziɛ̃ ǹ lɛ dɛ n boe basaã kɛ taman yii:

⁶ Ka papaã ka n bɔ kànaa, ka nyin a lɛa. Ka n baa ka Aroɛɛrɛ bɛ́ lɔn diə gole ne!

⁷ Moabu, ma nə́ ń goã n foo doɛ n sii zɛnaan laanka n naforon ganaa. Sɛnɛ, ǹ tá re n dɔ kuĩ, ǹ wo n ne. N dì Kemɔɔsi kɛ á re woe gùli kɔ ǹ bǎã nɛ kun ka n wúlu-bɔlen laanka n kiãn tumaa nɛ.

⁸ Basaã-kɔle lɛ n die boe kiwi gogoonmaa nɛ, a yiri a re boe a goon din ganaa wa. Nyankɔrɔ basan tá re papaɛ̃, wurun kɛn dɔn nə ziziɛ̃, ka Dɛnaa Lawa goã á pɛ lɔn.

⁹ Ka nyàa kan kɔ Moabu gána la, a giala, a n li a piɛ̃! A kiwin man die goɛ̃ ka diə gole bɛ́ lɔn, min kɔn ná a giɛ̃ ǹ nɛ wa.

¹⁰ Min mɛnɛn bɛ́ ǹ ba Dɛnaa Lawa a dí nyɛɛ ka ǹ foo tumaa-n wa, lɛn baraa bíi bɛa dɛnan kũ! Min mɛnɛn bɛ́ ǹ ba li ǹ gɛ̀ dɛ ka ǹ gɔya sa n wa, lɛn baraa bíi bɛn kũ!

¹¹ A kũ Moabu a tenmaa waáraa ganaa, á goã yii-nyɛɛ la. A bin wo gùli kɔ ǹ bǎã-n wa. A na á goã a tan kiĩni ka duvɛ̃ bɛ́ dɔrɛɛ a bù la lɔn. Ǹ bin da màn tɔrɔ kɔsɔ-n wa. Bɛ lɛ nɛ, a kɔɔ̃nbaa kɛ laanka a gìĩ kɔɔ̃n kɛ goã a nɛ.

¹² Dɛnaa Lawa pɛ: – Bɛ lɛ nɛ, biikoo á die, man die minin diɛ, ǹ da saa n da màn kɔsɔ nɛ. A bɛ́ doon mɛnɛn nɛ, ǹ tá re binyii ǹ bɔ walan, ǹ bɛa doon lɛn yuyu. Dɛnaa Lawa a da ǹ boo ne.

¹³ Ka bɛ-n kəni, Moabu á re sìi koe dì Kemɔɔsi ganaa ka Izirayeli zaman bɛ́ á sìi kɔ Betɛli ganaa lɔn, a n foo doa ǹ mɛn lɛ la.

¹⁴ Moabu minin, a n siɛ lɔn ka á pii: «Wɔ ǹ sɔraasi foo taãn-an lɛa, zia-baali taãn-taãnan lɛa?»

¹⁵ Moabu ziziɛ̃, Maǹ we a kiwin kuĩ. Maǹ woe ka a nɛ tenən lɛn nɛ bɔlɔ kuru ǹ bǎã nɛ. Kii ke a tɔ n Dɛnaa Lawa Pàãyiidɛnaa, bɛa da ǹ boo á ke:

¹⁶ Kànaa ka boɛɛnɛ, ǹ tá re Moabu ziziɛ̃. Koe á re n koe lɛ fufuu.

¹⁷ Ka gɛ̀ fòo da nɛ, kasɛn tɔrɔn kɛn ǹ miãkɛnɛn lɛa. Ka mɛnɛn bɛ́ a tɔ golebaa doɛ̃, ka pɛ: «Bɛa kiwi pàãdɛnaa ke ǹ miã ná a banban, bɛ́ sàabaa. Bɛ na á saa lɔn kəni?»

¹⁸ Dibɔn a zaman, gisĩ n nə n tɔ golebaa kɛ toa walan. Giã tán bǎã gere ne. A giala, Moabu a basaã-kɔle kɛ n die n gialaa, màn mɛn bɛ́ toɛ n kungɔnɔn kɛn tamaa nɛ a bɛn ziziɛ̃.

¹⁹ Aroɛɛrɛ zaman, wo zii gialaa, n kuu kɔ. Nɔ̀n da baa-silin kɛn la, ka mìi fɔ̃ wolen kɛn nɛ mà wàa na á baa?

²⁰ Ǹ tá re n lɛ sii kɛnɛn: «Moabu yɔyɔrɛ! Sìi nə́ n kɔ lɛ!» Ka n lɛ dɛ, ka gú da! Ka n lɛ dɛ Arnɔn tà lɛ-a ka pɛ: «Moabu ziziɛ̃!»

²¹ Dɛnaa Lawa n dɔlɔ boe wurun gána kɛ ganaa, ka Holɔn kiwi ni, Yaasi ni, ka Mefaati ni,

²² Dibɔn nɛ, Neboo ne, Bɛti-Diblatayimu ni,

²³ Kiritayimu ni, Bɛti-Gamuli ni, Bɛti-Mehɔn nɛ,

²⁴ Keriyɔti ni ka Bosraa nɛ. A Moabu gána a kiwi kɔn lɛ boe wa, ta a bǎã n kunu hinlaa ta a n lui ni.

²⁵ «Moabu pàã nya, a nyàa yiɛ.» Dɛnaa Lawa a da ǹ boo ne.

²⁶ Moabu na á taasɛ, mà asɛ a golebaa la Dɛnaa Lawa nɛ. Ka duvɛ̃ kɔ la a mi, yǎa a pisii. Bɛa biikoo li kəni, min tumaa á re yaa we a ganaa.

²⁷ Moabu, nsɛ bie n goã yaa we Izirayeli ganaa wa? A da yaa, Izirayeli ba wurumu lɛa wa. Sɛnɛ, a n siɛ lɔn bɛ̀ n tá a boo diɛ, n nə́ yaa we a ganaa bɛ̀ n tá n mìi papasɛ?

²⁸ Moabu minin, ka soo ka n bɔ kaa kiwin ni, ka wo giã kele yalan nɛ. Ka n dinin baa ka don zɛrɛkatoan bɛ́ lɔn, a kii n kele yalan nɛ, nyankɔrɔ zuzulu mìi la.

²⁹ Wɔ́ Moabu a din gole kɔ boo ma. A din gole kɔ la yii ni, a din narɛ kɛ nɛ, a foo doa a din ganaa nɛ, a yaa wɔ minin ganaa nɛ, ka a din koa nɛ!

³⁰ Masɛ Dɛnaa Lawa a da ǹ boo á ke: Ma tá a taasiɛn doɛ̃. Sɛnɛ, a bɛ́ boo mɛn diɛ, nɛ ba a-n wa, là ba a zɛnaa ǹ siin ganaa wa.

³¹ Bɛ lɛ nɛ, ma á gɛ̀ loe loe Moabu gána la, ma á gú diɛ a zaman tumaa a lɛa. Man gini Kiiri-Erɛsi minin taman yii.

³² Sibumaa a zaman, man wuu pii n la, á la Zazɛɛrɛ minin wɔ nɛ. Ma nə́ n kɔn bɔ ka *rezɛ̃ da nɛ. N nə́ n gùrùn nyɔmaa ń yìsi mu la bɔ nɛ, yǎa ń Zazɛɛrɛ yìsi mu la bɔ nɛ. Sɛnɛ, basaã-kɔle lɛ daa kɔ n rezɛ̃ lɛ, n kaa-piɛ mànan kɛn.

³³ Foo kɔɔ̃n laanka nyɛnyɛɛ mɛn goã Moabu a wurun laanka Moabu gána tumaa nɛ, bɛ papaã. Duvɛ̃ kaa ǹ màn nɛ, duvɛ̃ banban. Min banban á n rezɛ̃ tɔrɛ bɛ̀ a n loe loe wa, ǹ loe foofoon kɛn lɛ kuru.

³⁴ Ɛsibɔn minin man gú diɛ. Ma nə n toɛ Elaalee ka Yaasi n nə ǹ lɛ ma, Sowara nɛ, Oronayimu ni, ka Eglati-Selesia nɛ. Nimurimu a mu bǎã kɛ din diə gole baa.

³⁵ Dɛnaa Lawa a da ǹ boo á ke: «Moabu minin mɛnɛn tumaa bɛ́ woe ǹ wúlu mànan koe ǹ nə́ da yon gìĩ kɔɔ̃n koe ǹ dìn la kelen la, ma á re bɛn tumaa dii.

³⁶ Bɛ lɛ nɛ ma á gini Moabu la, maa ginii n ka pìi bɛ́ lɔn, man gini Kiiri-Erɛsi la, maa ginii n ka pìi bɛ́ lɔn: Ǹ naforo mɛn yii sɔkɔn, a yii bɔ̀n baa.

³⁷ Giĩn nə́ n mìi kɔɔ̃, ka ǹ lɛtoro ka nɛ. Ǹ nə́ n gɔ̀nɔn tɔtoɛ̃, ǹ nə́ gɛ̀ koa ǹ mɔnaan wɔ.

³⁸ Moabu a banbaran tumaa la, a bǎã dadaran tumaa nɛ, gɛ̀ koa ǹ loe dinsɔɔ̃ lɛ n boe. Má Moabu yu ka donkolon mɛn nə́ ke là ba a ganaa wa. Dɛnaa Lawa a da ǹ boo ne.

³⁹ Wàa! Moabu yɔyɔrɛ! Ka gini! Moabu nə́ n dɔ̀ɔ̃ wɔ! Sìi nə́ n kɔ lɛ. Ǹ miãkɛnɛn man diɛ yaa lɛa. Nyɛ́ɛ nə ǹ ganaa.»

⁴⁰ Dɛnaa Lawa n kɛ pii: «Zɔ́ɔ n ka zèwo bɛ́ lɔn, piɛ̃, á n nyàan lɛ bɔ Moabu kiwi lalan.»

⁴¹ Ǹ nə́ Keriyɔti kiwi kũ, Bǎãn mɛnɛn bɛ́ tamaa nɛ, ǹ nə́ bɛn si la. Nyɛ́ɛ n Moabu a zia-baali foo-taãn-an ganaa ka lɔ bɛ́ lɔn a nɛ yɛ biikoo li.

⁴² Moabu minin nə́ ziziɛ̃, ǹ ba zaman lɛa doo wa. Maǹ nə́ taasɛ mà ǹsɛn tá gole ǹ nə́ la Dɛnaa Lawa nɛ.

⁴³ Nyɛ́ɛ nɛ, nyankɔrɔ zuzulu ni ka kanan nɛ, bɛn tumaa n kasɛn wɔ lɛa Moabu minin lɛn. Dɛnaa Lawa a da ǹ boo ne.

⁴⁴ Min mɛn bɛ́ baa sii nyɛ́ɛ taman yii, bɛa dɛnaa n die mɛnɛɛ nyankɔrɔ zuzulu ni. Bɛ̀ á boo la á soo, kan kũ. Taãn nɛ, ma bɛ́ re yui Moabu gialaa lɛ̀ mɛn-a, man die kɛa sii kɛ lɛ tumaa diɛ a mìi ni. Masɛ Dɛnaa Lawa a da ǹ boo ne.

⁴⁵ Min mɛnɛn bɛ́ baa sii, pàã ba bɛn lon wa. Ǹ nə́ golee Ɛsibɔn. Sɛnɛ, tɛ kũ kiwi lɛ nɛ, kii Sihɔn a kion. Tɔrɔn mɛnɛn bɛ́ ǹ ba giɛ̃ kiĩn wa, tɛ lɛ bɛn gána kũ, a saa a gèlè ganaa, yǎa gána lɛ bii.

⁴⁶ Wàa koe n ka kɛ nɛ n ganaa Moabu! Dì Kemɔɔsi minin, á ke ka papaã! Ǹ nə́ n nɛgiĩn laanka n nɛlɔn kũ kòso nɛn lɛa.

⁴⁷ «Sɛnɛ, ǹ kɔn pinaa, ma á re Moabu a lɛlɛ ǹ giã ǹ gɔn koe la.» Dɛnaa Lawa a da ǹ boo ne. Moabu a kiri wɔmaa nə n lɛ doɛ kànaa.