Zeremii 36 - LAWA A BOO SONBORE 2011

Kii n Zeremii a sɛ́wɔ munii tiɛ̃

¹ Zoziasi a nɛgiĩ Zozakimu a kiibaa lɛ̀ siibaa ǹ wɔ li Zudaa gána nɛ, Dɛnaa Lawa boo da Zeremii ni á pɛ nɛ:

² «Kanna kəni, sɛ́wɔ munii saa, ki lɛa. Ma boo mɛn tumaa da n nɛ Izirayeli gána a paǹ li, Zudaa gána nɛ ka gána kɔsɔn dɔn nɛ, a kũ Zoziasi a waáraa ganaa a da pelo yaa, n bɛn tumaa kiɛ̃ la.

³ Kɔntan, Zudaa minin tá re a woo ǹ bǎã yii mà man die koe boe ǹ ganaa. Kɔntan, didie á re a giã ǹ gɔn baraa kiɛ, màn mɛn bɛ́ toɛ ma ǹ sii baraa laanka ǹ giã ǹ gɔn baraa toa ǹ nɛ.»

⁴ Zeremii lɛ dia Neriya a nɛgiĩ Baruku la, Dɛnaa Lawa boo mɛn tumaa da nɛ, á ǹ pɛ, Baruku kiɛ̃ sɛ́wɔ munii lɛ la, ki lɛa.

⁵ Zeremii tɔn zii kɔ Baruku la á pɛ kɛnɛn: «Ma dinmaa a boe la ma wo Lawa a kion wa.

⁶ Sɛnɛ, lɛ sɔɔ kɛa pinaa, nsɛ wo Lawa a kion, ma Lawa a boon mɛnɛn pɛ n nɛ n nə́ ǹ kiɛ̃, n nə ǹ pɛ ka lɛn gole ne zaman yɔrɔ-a ka min mɛn tumaa bɛ́ re goɛ̃ Lawa a kion lɛ nɛ, ǹ nə́ bɔ Zudaa kiwin ni.

⁷ Kɔntan, ǹ tumaa á re Dɛnaa Lawa nyankoe ka ǹ we ne, didie na a sii baraan kaa. A giala, Dɛnaa Lawa pɛ mà asɛ a foo yoo lɛ asɛ a zaman lɛ paǹ li, mà á gole á la yii ni.»

⁸ Zeremii boo mɛn tumaa pɛ Neriya a nɛgiĩ Baruku ni, Baruku ná a tumaa zɛnaa á kɔnpɛ. Á woo Lawa a kion, màn mɛn bɛ́ toɛ, Dɛnaa Lawa a boo bɛ́ kiɛ̃ nɛ sɛ́wɔ munii mɛn lɛ la, a bɛ pɛ.

⁹ Zoziasi a nɛgiĩ Zozakimu a kiibaa lɛ̀ soorobaa ǹ wɔ li Zudaa gána mìi la, a mui manangɔrɔbaa ǹ wɔ li, ǹ nə́ lɛawaa bɔ lɛ sɔɔ lɛawaa lɛa Dɛnaa Lawa yɔrɔ-a. Zeruzalɛmu minin tumaa goã ǹ tan ka min mɛn tumaa bɔ Zudaa kiwin ni ǹ nə́ daa Zeruzalɛmu.

¹⁰ Baruku Zeremii a boon lɛn pɛ sɛ́wɔ munii lɛ la ka lɛn gole ne Lawa a kion lɛ nɛ zaman tumaa yɔrɔ-a. A na á n toa sɛ́wɔ-kiɛ̃li Safan a nɛgiĩ Gemariya a kion nɛ kɛ nɛ á sɛ́wɔ lɛ pɛ: Bɛa kion nɛ lɛ n Lawa a kion a sumu dii kɛ nɛ, kunu kiɛnlɛ dii kɛ ganaa.

¹¹ Gemariya a nɛgiĩ, Safan a nɔ̀ɔn Mikaa Dɛnaa Lawa a boo lɛ ma Baruku pɛ sɛ́wɔ minii lɛ la.

¹² Bɛ kio, á kiɛ̃ á woo kii a kion, yǎa sɛ́wɔ-kiɛ̃li li. Á woo yaa kii a dí-nyali dadaran tumaa nə́ n lɛ sɔkɔn. Sɛ́wɔ-kiɛ̃li Elisamaa goã a tan, Semayia a nɛgiĩ Delazaa nɛ, Akibɔɔrɔ a nɛgiĩ Ɛlnaatan nɛ, Safan a nɛgiĩ Gemariya nɛ, Anania a nɛgiĩ Sedekiasi ni ka kii a dí-nyali gialakun tumaa nɛ.

¹³ Mikaa boo mɛn tumaa ma bɛ̀ Baruku bɛ́ sɛ́wɔ munii lɛ pii ka lɛn gole ne zaman tumaa yɔrɔ-a, á kɔ bɛn lɛ á pɛ ǹ nɛ.

¹⁴ Kii a dí-nyali dadaran lɛn nə́ tɔn Yewudi dia, ke Kuusi a nɔ̀ɔn fulupaa lɛa, Selemia a nɔ̀ɔn lɛa, Netania a nɛgiĩ lɛa, mà a wo pɛ Baruku ni, a daa, mà a sɛ́wɔ munii mɛn lɛ pɛ zaman lɛ yɔrɔ-a, mà a da ka bɛ dɔ nɛ a gɔn. Neriya a nɛgiĩ Baruku sɛ́wɔ munii lɛ saa, á daa ǹ li.

¹⁵ Ǹ nə́ pɛ nɛ: «Bǐɛ̃ kɔ n giã tán, n sɛ́wɔ munii lɛ pɛ wɔ nɛ!» Baruku bɔ á mɛ a pɛ la.

¹⁶ A ǹ toa n too koe, nyɛ́ɛ kii a dí-nyali dadaran lɛn kũ. Ǹ nə́ ga kɔn ganaa, ǹ nə́ pɛ Baruku ni: «Yǎa wɔ kɛ tumaa kalɛɛ kii ni.»

¹⁷ Ǹ nə́ tɔn nɔ̀n da Baruku la mà a na á saa lɔn á kɛ tumaa kiɛ̃, mà Zeremii na á ǹ pɛ nɛ?

¹⁸ Baruku pɛ ǹ nɛ, mà hiĩ, mà Zeremii na á ǹ pɛ, asɛ nə́ ǹ kiɛ̃ ka kaã nɛ sɛ́wɔ munii la.

¹⁹ Kii a dí-nyali dadaran lɛn nə́ tɔn pɛ Baruku ni, mà a wo n duru, a laanka Zeremii ni, ǹ nyan toa min nə ǹ duru ǹ bǎã yɛ wa.

²⁰ Kii a dí-nyali dadaran nə́ sɛ́wɔ munii lɛ toa sɛ́wɔ-kiɛ̃li Elisamaa a dí nya ǹ kion. Bɛ kio, ǹ nə́ kiɛ̃ ǹ nə́ woo kii li kii kion a sumu-n. Sii mɛn tumaa nə n zɛnaa, ǹ na a tumaa pɛ nɛ.

²¹ Kii tɔn Yewudi dia mà a wo sɛ́wɔ munii lɛ saa. Á woo saa Elisamaa a dí nya ǹ kion, á bɔ á mɛ la á n pii ka lɛn gole ne kii yɔrɔ-a ka a dí-nyali dadaran nɛ, ǹ mɛnɛn bɛ kun ni walan.

²² Lɛ̀ a mui manangɔrɔbaa ǹ wɔ nɛ, kion mɛn bɛ́ ǹ nə́ dɔ nyan waáraa wɔ lɛa, kii na á goã walan n gɔ̀nɔn wɛɛ̃ tɛ ganaa.

²³ Bɛ̀ Yewudi sɛ́wɔ lɛ a paǹ mɛn pɛ á nya, kii lɛ n bɛ kukuri ka gɔya boɛɛn nɛ a zũ tɛ-n. A zɛnaa miɛ̃ yǎa sɛ́wɔ munii lɛ nya lenlen.

²⁴ Sɛnɛ, kii laanka a gána nyɛɛnaandɛnan nə́ boo lɛ tumaa giala ma. Sɛnɛ a nyɛ́ɛ goon din da ǹ ganaa wa, ǹ foo ziziɛ̃ boɛɛn dinin wa.

²⁵ A da yaa, Ɛlnaatan nɛ, Delazaa nɛ, ka Gemariya nɛ, bɛn nə kii lɛ nyankɔ mà a nyan sɛ́wɔ munii lɛ tã wa. Sɛnɛ, a n too kɔ ǹ lon wa.

²⁶ Á zii kɔ a nɛgiĩ Zerameyeli la, Azireyeli a nɛgiĩ Seraya nɛ, ka Abdeyeli a nɛgiĩ Selemia nɛ mà ǹ sɛ́wɔ-kiɛ̃li Baruku kũ ka Lawa a boo gii-dali Zeremii ni. Sɛnɛ, Dɛnaa Lawa nə́ ǹ koa tamaa-n bǎã sonbore ne.

²⁷ Kii bɛa sɛ́wɔ munii lɛ tã ka Zeremii a boon lɛn nɛ Baruku kiɛ̃ ǹ la. Bɛ kio, Dɛnaa Lawa boo da Zeremii ni á pɛ:

²⁸ – Sɛ́wɔ munii kɔsɔ saa, n sɛ́wɔ munii bibinaa lɛ a boon kiɛ̃ la, Zudaan kii Zozakimu nə ǹ mɛn lɛ tã.

²⁹ N tá re pii Zudaan kii Zozakimu ni mà Dɛnaa Lawa n kɛ pii: «Zeremii goã á kiɛ̃ mà sàabaa ba la wa mà Baabiloniin kii á re die gána kɛ ziziɛ̃, a na a minbuiin nɛn laanka a tɔɔn dɛ. N nə́ n Zeremii zɛ̀rɛbaa ka bɛ lɛ nɛ, n tɛ da sɛ́wɔ munii lɛ ganaa.»

³⁰ Kanna kəni, Dɛnaa Lawa n kɛ pii Zudaan kii Zozakimu a paǹ li: «Davida a gána nɛ, Zozakimu a sumu min kɔn ba re yii a kio, a giã pàã la wa. Bɛ̀ á gã, a gere á re goɛ̃ tán sɛ̀fuu li, ka tèlò a nyan nɛ.

³¹ Ma á re yui a gialaa, a nɛnyaanan nɛ, ka a nɔ̀ɔnɔn nɛ. Ma á re yui a gána nyɛɛnaandɛnan dɔn gialaa. Ma á re ǹ sãn lɛn dɔlɔ boe ǹ ganaa. Ma koen mɛnɛn boo da ǹ nɛ ǹ nə́ ǹ golee li wa, man die bɛn lɛn diɛ ǹ mìi ni, Zeruzalɛmu minin ni ka Zudaa minin ni.»

³² Zeremii sɛ́wɔ munii kɔsɔ saa, á kɔ Neriya a nɛgiĩ sɛ́wɔ-kiɛ̃li Baruku la. Zeremii goã boon mɛnɛn pii ni, á bɛn kiɛ̃ la: Sɛ́wɔ munii bibinaa kɛa boon manɛ Zudaan kii Zozakimu nə́ ǹ tã, ka a kɔnboe kɔsɔn dɔn nɛ.