Zeremii 31 - LAWA A BOO SONBORE 2011

¹ Dɛnaa Lawa a da ǹ boo á ke: «Biikoo á re doe, ma á re Izirayeli minin sumu lɛn tumaa a Lawa biɛ, ǹ dɔn tá re maa zaman biɛ.»

Izirayeli minin wusoo a da ǹ gána nɛ

² Dɛnaa Lawa n kɛ pii: Zaman mɛn nə kanbaa gɛ̀ ganaa, má maa bǐɛ̃baa nyaa bɛn manɛ diə gole ne. Izirayeli á re susui yii.

³ Zaman lɛ na á goã pii: «Dɛnaa Lawa nə́ n din nyaa wɔ nɛ tiã lɛ-a.» Ǹ lɛ si kɛnɛn: Man ka narɛ ka kɔn-narɛɛ nɛ, kɔn-narɛɛ mɛn nə́ ke a nyɛɛ duduu wa. Bɛ lɛ nɛ, ma á n gɔn parɛɛ ka ganaa.

⁴ Izirayeli zaman, ma á re n siɛ ma n da lon, ǹ wusoo ǹ nə n dɔ. N tá re wusii, n maà sonboren goa, n wo bɛ̀ baa kun ka zɔ́n zɛnaa wolen ne.

⁵ N tá re wusii doo, n *rezɛ̃ dan zumu Samarii kelen la, a zumii wolen tá re a nɛ niɛ.

⁶ Ǹ kɔn pinaa, wɔlɔ-lɛduə̃lin tá re n lɛ dii Efrayimu kele la ǹ pɛ: Ka yoo wɔ n ta *Siɔn, Dɛnaa Lawa wɔa Lawa li!

⁷ Dɛnaa Lawa n kɛ pii: Ka n nyanyaa, ka foo kɔɔ̃nbaa ǹ lɛ dɛ Zakɔba ganaa. Min mɛn bɛ́ tɔrɔn tumaa mìi la, ka n da bɛ lɛ, ka n nyanyaa ka pɛ: Dɛnaa Lawa na a zaman kirisibiɛ, Izirayeli minin mɛnɛn yii bɛ́ á goã koo.

⁸ A giala, man die boe ǹ ne gɔsɛ a lɛ̀gɔn la, ka gána sɔsɔɔn nɛ, ma ǹ sɔkɔn. Yii tere-an ne, bɔlɔkan nɛ, haalɛ lɔ nɔnɔan dinin laanka lɔn mɛnɛn nə nɛ yɛ sisia. Kɛ n zaman gole lɛa wusii die kànaa.

⁹ Maǹ wusii die bɛ̀ ǹ tá wuu pii, ǹ nə́ gòã kũ diɛ ma ganaa. Man miɛ ǹ nyɛɛnɛ ma á woe ǹ ne tà lɛ-a, piɛ̃-n ka mu ni. Zii mɛn bɛ́ foo n doa nɛ a ganaa, ma á re toɛ ǹ kɔ bɛ lɛ, màn mɛn bɛ́ toɛ, ǹ nyan bɔ ǹ mɛnaa wa. A giala, man Izirayeli a díi lɛa, Efrayimu n maa nɛgiĩ bibinaa lɛa.

¹⁰ Kasɛn, tɔrɔ kɔsɔn lɛn, ka n too kɔ Dɛnaa Lawa a boo li. Ka a boo da bǎã sɔsɔɔ dɛnan kɛn manɛ, ka pɛ: Dɛnaa Lawa din na á Izirayeli minin pɛsɛ̃ bǎã tumaa nɛ. Sisia, a nə ǹ soekɔn, á ǹ tamɛɛ, ká tɔɔn-lɛduə̃li á ke a tɔɔn lɛduĩ lɔn.

¹¹ Dɛnaa Lawa Zakɔba a minin kirisibaa. Zɔ́ɔ mɛn pàã bɛ́ á la ǹ nɛ, á ǹ si bɛ la, á ǹ kaa.

¹² Maǹ die, ǹ foo n kɔɔ̃nɛ, loe loe Siɔn kele la. Dɛnaa Lawa a bǐɛ̃baa ǹ mànan kɛn taman yii, ǹ yɔrɔ n tɛ pii, ǹ foo n kɔɔ̃nɛ: *Belee ne, duvɛ̃ nɛ, nyɔɔ buə̃ ne, sèren ne, bòen ne, diin ni. Maǹ die goɛ̃ ka dù gɔrɔ mɛn bɛ́ mu n boe sɔnbɔraa nɛ. Màn kɔn ba re nyaabiɛ ǹ ganaa wa.

¹³ Ǹ nɛlɔn tá re bɛ̀ biɛ ka foo kɔɔ̃n nɛ, nɛ tenən laanka min zizin tá re n nyɛnyɛɛ kun. Ma á re ǹ gɛ̀ koan bɔyɛɛ ma baa zɔ́n lɛa. Ǹ foo ziziɛ̃ gɔ́ɔ̃ nɛ ma á re ǹ foo wɛɛ, ma á re ǹ kiɛ̃ ka foo kɔɔ̃nbaa nɛ.

¹⁴ Ma á re siĩ nyɔɔnaa gigiã koe Lawa a wúlu-bɔlen la, ma màn sonbore gigiã kɔ maa zaman la. Dɛnaa Lawa a da ǹ boo ne.

¹⁵ Dɛnaa Lawa n kɛ pii: Ginii lɛ n boe Ramaa kiwi, lɛ-dɛ kɔsɛkɔsɛ nɛ. Raseli n wuu pii a nɛnyaanan la. A ba lɛ koe foo wɔraa ganaa wa, a giala, ǹ kɔn ba a yɔrɔ-a doo wa.

¹⁶ Sɛnɛ, Dɛnaa Lawa n kɛ pii: N nyan wuu pɛ doo wa, n lɛ tã! N tá re n nɔmaa a saraa yii. N nɛnyaanan tá re boe n zɔ́ɔn gána nɛ ǹ daa. Dɛnaa Lawa a da ǹ boo ne.

¹⁷ Foo doa tá n biɛ̃ ǹ ganaa. N nɛnyaanan tá re wusii ǹ da ǹ gána nɛ. Dɛnaa Lawa a da ǹ boo ne.

¹⁸ Má Efrayimu minin lɛ-dɛ ma taãn-taãnɛ, Maǹ pii: «Dɛnaa Lawa, ń wɔ doroo ka kakaarɛbaa nɛ, ka ǹ bɛ́ dii ten darɛɛ lɔn. Sɛnɛ, toa wɔ da n li, wɔ wusoo wɔ da n li taãn-taãnɛ. A giala, Dɛnaa Lawa n din ni wɔa Lawa lɛa.

¹⁹ Taãn nɛ, wɔ́ n wɔlɔ lui n ganaa. Sɛnɛ sisia, bɛ n busi wɔ ganaa. Wɔ́ wɔa sãn dɔ̃, wɔ́ na ǹ nɛ kanna. Wɔa yii gugurubaa nya, sìi nə n kɔ wɔ lɛ. Sonbore, wɔ́ sii baraa zɛnaa wɔa tenmaa waáraa. Bɛa nɔmaa n ke wɔ gialaa.»

²⁰ Efrayimu n maa nɛgiĩ lɛa, ma n narɛ taãn-taãnɛ. Ma á narɛ á la yii ni. Bɛ lɛ nɛ, biikoo tumaa li, bɛ̀ máa boo diɛ a ganaa, maa taasiɛ n doa nɛ a ganaa. A sii n ma foo-n parsiini. Sonbore a makara n ma ganaa taãn-taãnɛ. Dɛnaa Lawa a da ǹ boo ne.

²¹ Mànan wɔ tán n zii lɛkoro-a, mànan mɛnɛn bɛ́ a lɛ dan nyɛɛ foaãnɛ. N zii mɛn saa, yiri bɔ li, zii ke n ta la, yiri bɔ li. Izirayeli a zaman, ka n bɔyaa ka daa. Ka n bɔyaa ka da kaa kiwin ni.

²² Nɛlɔ piã-wole, ma n woe n mìi giala yǎa biĩ? Hiĩ, Dɛnaa Lawa sii soree lɛ bɔ tán la: Lɔ n die baa sii ǹ zuũ kio kanna.

Lɛ-kɔ dii Zudaa laanka Izirayeli wɔ lɛa

²³ Dɛnaa Lawa Pàãyiidɛnaa, Izirayeli a Lawa n kɛ pii: – Bɛ̀ má wusoo má Zudaa gána laanka a kiwin giã ǹ gɔn zizi kɛ kɔ ǹ la ǹ mɛn waáraa, minin tá re kɛa boon kɛn pii doo: «Peperebaa bɛ́ bǎã mɛn nɛ, kele sonbore, Dɛnaa Lawa barka da n ganaa.»

²⁴ Bɛa biikoo li kəni, Zudaa kiwi minin laanka a kiwi dadara minin ni, a buu-kɔsɔlin laanka a tɔɔ-lɛduə̃lin ni, ǹ tumaa á re giɛ̃ gána lɛ-n kun.

²⁵ Taãn nɛ, min mɛnɛn nə nɔmaa, ma á re mu koe bɛn la ǹ mi. Pàãwɛɛnaan kɛn, ǹ laadoo bɛ́ màn mɛn tumaa ganaa ma á re bɛ koe ǹ la.

²⁶ Bɛ kio, ma yii kaa, má yɛ máa maa nyuù sii bǐɛ̃ zɛnaa ma nɛ.

²⁷ Kànaa ka boɛɛn, man die minbuiin nɛn laanka tɔɔn pɛsɛ̃ Izirayeli laanka Zudaa gána nɛ ká ǹ bɛ́ màn tɔrɔ pɛsɛ̃ wuru-n lɔn. Dɛnaa Lawa a da ǹ boo ne.

²⁸ Má goã má yoo ǹ gialaa, má ǹ woɛ̃, má ǹ ziziɛ̃, má ǹ wuru, má bɔ̀n da ǹ ganaa. Sɛnɛ sisia, man die sii tumaa zɛnɛɛ ǹ nɛ, màn mɛn bɛ́ toɛ ma wusoo ma ǹ dɔ, ma ǹ zumu. Ma din Dɛnaa Lawa a da ǹ boo ne.

²⁹ Ka bɛ-n kəni, min kɔn ba re kɛa suusu kɛ diɛ doo wa: «Díin man nə́ da nɛ burun sɔ̃, sɛnɛ, ǹ nɛnyaanan sɔ piã.»

³⁰ A giala, bɛ̀ min da nɛ burun sɔ̃, a dinmaa sɔ n piɛ̃. Didie n giɛ̃ a sii baraan lɛa.

³¹ «Ǹ kɔn pinaa, man die lɛ kɔ kɔn la dii we ka Izirayeli minin laanka Zudaa minin ni. Dɛnaa Lawa a da ǹ boo ne.

³² Ma lɛ kɔ kɔn la mɛn wɔ ǹ digolon ne bɛ̀ ma bɛ́ má ǹ kũ ǹ gɔn ganaa Ezipti gána nɛ má soo ǹ ne, á re goɛ̃ totoro ka bɛ nɛ. Ǹ nə́ bɛa lɛ kɔ kɔn la lɛ ziziɛ̃. A da yǎa ma din nə ǹ Dɛnaa lɛa. Ma din Dɛnaa Lawa a da ǹ boo ne.»

³³ Dɛnaa Lawa n pii doo: – Ma bɛ́ re lɛ kɔ kɔn la mɛn we ka Izirayeli minin ni bɛa waáraa lɛ nɛ, á ke. Ma á re maa dí-pɛn kɛn we ǹ yiri ni, ma wɔ ǹ foo ne. Ma á re ǹ Lawa biɛ, ǹ dɔn tá re maa zaman biɛ.

³⁴ Min kɔn ba re ǹ miã hinlaa ǹ dɔɔ̃n darɛɛ a pɛ-n kɛnɛn wa: «Ka n daraa Dɛnaa Lawa doɛ̃ ganaa!» A giala, min tumaa á re ma doɛ̃. A kũ nɛnyaanan ganaa, a wo min zizin yaa. Ma á re ǹ sãn toɛ ǹ nɛ, ma yiri bɔ ka ǹ sii baraan nɛ. Dɛnaa Lawa a da ǹ boo ne.

Lɛ kɔ kɔn la mɛn bɛ́ a nyɛɛ duduu wa

³⁵ Die na á wasa da lon màn mɛn bɛ́ toɛ a wɔlɔ fúlu? Die n pii mui laanka leeren manɛ mà ǹ folon kaa tèlò ne Die n bìn diɛ yìsi mu gole ganaa, bɛ̀ a wuu bɔ? Dɛnaa Lawa Pàãyiidɛnaa nɛ. A tɔ n miɛ̃. Dɛnaa Lawa Pàãyiidɛnaa a da ǹ boo ne.

³⁶ «Bɛ̀ má lɛ kɔ bɛa siin kɛn lɛn sàabaa ganaa ǹ mɛn pinaa, a din pinaa lɛ nɛ Izirayeli tɔrɔn ba re maa zaman biɛ doo duduu wa.» Dɛnaa Lawa a da ǹ boo ne.

³⁷ Dɛnaa Lawa n kɛ pii: «Bɛ̀ min boo la á lon a wo lon zɔɔ̃, á tán a zuzulubaa zɔɔ̃, ma dɔ á re Izirayeli minin tii, ǹ sii baraan taman yii!» Dɛnaa Lawa a da ǹ boo ne.

³⁸ Lɛawaa á re doe, Dɛnaa Lawa a da ǹ boo ne, Zeruzalɛmu kiwi lɛ á re wusii a n dɔ ma din wɔ lɛa, a kũ Hanaaneyeli a sanabolo kɛ ganaa, a wo gùrùn kiɛnlɛ kɛ yaa.

³⁹ Kiwi lɛ a gèlè dii n die siɛ lɛ̀nyɛɛn gɔn la a wo Garɛbu a kele li, a tɔ nə n pɛnɛ yǎa Goa.

⁴⁰ Geren nyankɔrɔ basa kɛ nɛ, tonən wɔ nɛ, ka bǎã mɛn tumaa bɛ́ siɛ Sedrɔn ganaa a wo gùrù kɛ ganaa sùin kiɛnlɛ-a lɛ̀giala gɔn la, bɛn tumaa á re maa wɔ biɛ. Màn kɔn ba re n woɛ̃ walan, a ziziɛ̃ bɛa bǎã lɛ-n doo wa.