Zeremii 10 - LAWA A BOO SONBORE 2011

Dɛnaa Lawa á re dìn papaɛ̃

¹ Izirayeli minin lɛn, ka n too kɔ Dɛnaa Lawa a boo kɛ li.

² A da ǹ boo á ke: «Ka nyan nə n saa tɔrɔ kɔsɔn li wa. Ka nyan nyɛ́ɛ baa sii-nyaan kɛn man boe lon wa. Maǹ nyɛ́ɛ diɛ tɔrɔn kɔsɔn ganaa.

³ Sonbore, tɔrɔ kɔsɔn landan kɛn man sii kooron lɛa. Maǹ gɔn kuri daã nɛ, gɔn-sɛlɛli dì nyín sɛlɛ la.

⁴ Maǹ a nyaǹ koe sana hinlaa wɔrɔ nɛ. Maǹ dere ka kiɛn nɛ, màn mɛn bɛ́ toɛ a golee lon.

⁵ Bɛa dìn lɛn man ka nyɛ́ɛ da ǹ mànan bɛ́ lɔn, gì wuru-n. Ǹ ba boo diɛ doɛ̃ wa, maǹ nə ǹ guĩ, a giala, ǹ ba boe tɔ we la wa. Ka nyan nyɛ́ɛ baa ǹ nɛ wa. Ǹ ba boe baraa zɛnaa la wa, ǹ ba boe bǐɛ̃ dɔ din la ǹ zɛnaa wa.»

⁶ Min kɔn ba ka n bɛ lɔn ma Dɛnaa Lawa. N tá gole, n pàã n tɔ golebaa koe n la.

⁷ N doamaa-n ka gugurubaa nɛ tán tumaa a Dɛnaa. Bɛ lɛ nə n wɔ gii lɛa. Sii-dɔ̃lin tumaa bii tán la, ǹ gánan tumaa bii, min kɔn ba ka n bɛ lɔn wa.

⁸ Bɛa minin lɛn tumaa n baãnaan lɛa, yiriwɛɛnaan lɛa, Ǹ dìn lɛn ba boe la ǹ ta ǹ darɛɛ sii kɔn ganaa wa. Maǹ gɔn lɛa.

⁹ Gɔn-sɛlɛli nə́ ǹ sɛlɛ, Zan-kaali nə́ ǹ nyaǹ kɔ ka Tarsisi wɔrɔ nɛ, hinlaa ka Ufaazi sana nɛ. Bɛ kio, ǹ tɔn mɔnaa wɔ ǹ ganaa, mɔnaa wùsu tã hinlaa a koreeboree lɛa. Bɛ tumaa n gɔn dí-nyalin màn zɛnaa lɛa.

¹⁰ Sɛnɛ, Dɛnaa Lawa n Lawa taãn lɛa. Lawa Yiikoonaa nɛ. A n kii lɛa yǎa duduu. Bɛ̀ a foo yoo, tán nə bìn diɛ. Tɔrɔn ba boe sii kɔn la ǹ zɛnaa a foo-yoo gɔ́ɔ̃-n wa.

¹¹ Ka doamaa bɛ ka boo mɛn da ǹ nɛ, á ke: lawan mɛnɛn bɛ́ ǹ lon zɛnaa wa, ǹ tán zɛnaa wa, bɛn tá re n lui ǹ nə n bɔ tán la, ǹ papaã ǹ nə n bɔ kanaa.

¹² Dɛnaa Lawa tán zɛnaa ka a pàã nɛ, á kanaa koa ka sii-doɛ̃ nɛ, á lon lɛ bɔ ka yiridɛnaabaa nɛ.

¹³ Bɛ̀ á gini, mu pìãn manə n soekɔn lon. A n labaran soekɔn tán lɛ dan ganaa. A n la diɛ tɛ pɛ ganaa màn mɛn bɛ́ toɛ la kaa. A n piɛ̃ boe a duru ǹ bǎãn nɛ a soo ne.

¹⁴ Bɛ lɛ nɛ, minin tá bii-a baãnaan lɛa, ǹ ba sii kɔn giala miɛ wa. Sìi n zan-kaalin kɛn tumaa ganaa, ǹ dìn kɛn taman yii. Bɛa nyínin lɛn man yiri siɛ̃: Yiikoonaabaa goon din ba ǹ nɛ wa.

¹⁵ Ǹ ba màn kɔn lɛa wa. Maǹ yaa dinsɔɔ̃ diɛ. Ǹ dɔlɔ pinaa, ǹ tumaa á re papaɛ̃.

¹⁶ Sɛnɛ, kanaa tumaa a zɛnaali ke, Zakɔba wɔ gii lɛa, bɛ ba ka ǹ bɛ́ lɔn wa. A wɔ n ka Izirayeli tɔrɔn nɛ. A tɔ n "Dɛnaa Lawa Pàãyiidɛnaa".

Koe diri Zeremii

¹⁷ Zeruzalɛmu, ǹ yoo nsɛ mɛn gialaa, n mànan goa.

¹⁸ Taãn nɛ, Dɛnaa Lawa a da ǹ boo á ke: «Kanna kəni, man die gána lɛ a minin zuĩ sɔsɔɔ ma ganaa. Man die dɔlɔ boe ǹ ganaa, ǹ ba re n boe a-n wa.

Zeruzalɛmu

¹⁹ Ebe, wàa koe n ka kɛ nɛ ma ganaa! Maa baayɛrɛ a nyɛɛ wa. Man má goã pii máa maa fuu lɛ lɛ á basiɛ̃ nɛ, máa ma á boe la ma si ma ganaa.

²⁰ Sɛnɛ, maa mɔnaa kion lɛ ziziɛ̃. A biɛn tumaa nana. Maa nɛnyaanan nə woo ǹ nə́ ma toa walan. Min kɔn banban a maa kion lɛ dɔ wa, a maa giã ǹ bǎã kɛ zɛnaa wa.»

Zeremii

²¹ Zaman-lɛduə̃lin nə́ baãnaabaa zɛnaa. Ǹ ga Dɛnaa Lawa li wa. Bɛ lɛ nɛ, ǹ sii kɔn yɔrɔ yɛ wa. Ǹ bɛ minin mɛnɛn mìi la, ǹ tumaa pɛsɛ̃.

²² Ka n too kɔ màn wuu kɛ-a die. Sii lɔlɔkɔn gole ne boe gɔsɛ a lɛ̀gɔn la. A n die Zudaa kiwin biɛ kɛbɔlɔ lɛa, tolokan susu ǹ bǎã lɛa.

Zeremii n Lawa nyankoe a zaman a lɛa

²³ Dɛnaa Lawa, máa doɛ̃, máa minbuiin nɛ nyin ba a din gɔn, a boo la a sii yɔrɔ bɔ a din ni wa.

²⁴ Doroo kɔ ma la Dɛnaa Lawa, sɛnɛ, a kɔnpɛ ka ma nɛ. N foo nyan yoo wa, bɛ bie wa, n tá re ma yɔyɔrɛ.

²⁵ Tɔrɔn mɛnɛn bɛ ǹ ba n doɛ̃ wa, ka min mɛnɛn bɛ́ ǹ ba n tɔ bíi wa, n foo n siĩni a yoo bɛn li. A giala, ǹ nə́ n zaman lɛ kokoo, Zakɔba ǹ nə́ n ziziɛ̃ lenlen. Ǹ nə́ ǹ gána lɛ ziziɛ̃.