Zakarii 14 - LAWA A BOO SONBORE 2011

Dɛnaa Lawa n kii biɛ tán tumaa la

¹ Á ke, Dɛnaa Lawa a lɛawaa diri. Zeruzalɛmu minin lɛn, ǹ tá re die kaa naforo gii kɔn ka yii giulun.

² Ma á re tɔrɔn tumaa soekɔn ǹ yoo kaa kiwi gialaa. Ǹ tá re Zeruzalɛmu kiwi kuĩ, ǹ na a gɔn mànan kokoo a kionən ne. Ǹ tá re ǹ lɔn kuĩ ka pàã nɛ. Ǹ tá re ǹ zaman talɛɛ goɛ ǹ wo ǹ ne, sɛnɛ, ǹ gialakun kɛ á re goɛ̃ kiwi lɛ nɛ.

³ Dɛnaa Lawa tɔn zia baa tɔrɔn gialakunun kɛn ganaa, ka a bɛ́ zia biɛ lɔn lɛlɛ, zia biikoo li.

⁴ Bɛa pinaa, a n die gisĩ Olivə kele la, kunu Zeruzalɛmu kiwi ganaa, a lɛ̀giala gɔn la. Olivə kele lɛ n die wɔsɛ a bii ni, a nyankɔrɔ gole goon bɔ, a kũ lɛ̀giala ganaa a wo lɛ̀nyɛɛn yaa. Kele lɛ paǹ goon nə woe gɔsɛ a lɛ̀gɔn la, goon dɔ wo gusin a lɛ̀gɔn la.

⁵ Bɛa nyankɔrɔ lɛ kɛ lɛ kelen lɛn bii ni, ka n die baa sii ka bɔ ka bɛ lɛ nɛ, a giala, a n woe yǎa Asali. Ka n die baa sii, ka ka digolon wɔ bɛ́ lɔn, Zudaan kii Oziasi a waáraa, tán a bìn diɛ pinaa. A da yaa, Dɛnaa Lawa, maa Lawa n die die ka a lon a dia dí-a wolen kɛn tumaa nɛ.

⁶ Bɛa pinaa, laadoo ba re doe wɔlɔ fúlu ganaa wa. Nyan ba re boe doo wa, mu á re nyuù we tán la doo wa.

⁷ Ǹ kɔn pinaa, Dɛnaa Lawa dinsɔɔ̃ n bɛ doɛ̃, lɛawaa n die goɛ̃ a tan duduu. Min ba re lɛawaa a bɔ kɔnlɛ doɛ̃ ka tèlò-n wa. Haalɛ wasamiɛ̃nɛ, wɔlɔ n tɛ pii.

⁸ Bɛa pinaa lɛ nɛ, mu fu paɛ̃paɛ̃ tá re pìã woɛ̃ tán Zeruzalɛmu. A mu lɛ a talɛɛ n die baa sii a wo Yìsi mu kɔsɛ kɔsɛ ganaa, a talɛɛ kɔsɔ ke, bɛ n die woe Yìsi mu gole ganaa, a baa si lɛ̀ tumaa gɔ́ɔ̃ nɛ, taãlan laanka bɔ̀nɔn.

⁹ Dɛnaa Lawa n die kii biɛ tán tumaa la. Bɛa pinaa, Dɛnaa Lawa n die goɛ̃ goon toto, a tɔ dɔ n die goɛ̃ goon toto.

¹⁰ Bǎã mɛn din tumaa bɛ́ Zeruzalɛmu lɛnpɛnɛ, bɛn tumaa á re n bɔyɛɛ ǹ bɔmɔ lɛ baa, a kũ Gebaa ganaa gɔsɛ a lɛ̀gɔn la, a wo Rimɔn yaa gusin a lɛ̀gɔn la. Zeruzalɛmu á re goɛ̃ lon a la bǎã kɔsɔn kɛn manɛ. Kiwi lɛ á re n lɛ boe, a saa Bɛnzamɛn tɔrɔn kiɛnlɛ kɛ ganaa, a wo yǎa kiɛnlɛ bibinaa bǎã kɛ li, yǎa gùrù pusu ǹ kiɛnlɛ kɛ li, a kũ Hanaaneyeli a sanabolo kɛ ganaa, yǎa kii a rezɛ̃ mu bɔ ǹ bǎã kɛ nɛ.

¹¹ Minin tá re giɛ̃ kiwi lɛ nɛ, a ba re n yui doo wa. Minin tá re giɛ̃ a nɛ yii-nyɛɛ la.

¹² Tɔrɔn mɛnɛn nə wo Zeruzalɛmu zia baa, Dɛnaa Lawa bɛ́ re koe mɛn diɛ ǹ mìi ni, á ke: Ǹ gɔ̀nɔn siĩ á re boɛ̃, a ǹ toa ǹ yii n koo. Ǹ yiin tá re boɛ̃ ǹ yii yalan nɛ, ǹ lɛwɔn nə bɔɔ̃ ǹ lɛ-n.

¹³ Bɛa pinaa lɛ nɛ, Dɛnaa Lawa á re nyín-soo gole diɛ ǹ ganaa. Ǹ tá re yui kɔn gialaa, didie tumaa laanka ǹ miãkɛn.

¹⁴ Zudaa minin tá re zia biɛ Zeruzalɛmu kiwi. Ǹ tá re ǹ miãkɛnɛn naforon tumaa sii ǹ la: Sana nɛ, wɔrɔ nɛ, ka mɔnaa damata nɛ.

¹⁵ Koen mɛnɛn nə bɔ minbuiin nɛn ganaa, a din koen lɛn man die boe ǹ tɔɔn tumaa ganaa ǹ giã ǹ bǎã nɛ: Ǹ sùin laanka ǹ dundun sùin ni, ǹ nyɔɔmaan laanka ǹ dundunun ni, a din koe goon lɛ-n boe ǹ ganaa.

¹⁶ Bɛa waáraa kəni, tɔrɔn mɛnɛn nə zia da Zeruzalɛmu ganaa, bɛn min mɛnɛn yii bɛ́ tɔn koo, lɛ̀ woo lɛ̀, ǹ tá re woe Zeruzalɛmu kiwi, ǹ kaa tán a kii, Dɛnaa Lawa Pàãyiidɛnaa giulun ǹ *giã siã giulun zɔ́n zɛnaa.

¹⁷ Bɛ̀ tán a tɔrɔn kɛn goon wo Kii Dɛnaa Lawa Pàãyiidɛnaa guguru kɔ Zeruzalɛmu wa, la á re kiɛ ǹ gána-n wa.

¹⁸ Bɛ̀ Ezipti minin nə́ n piã ǹ wo Zeruzalɛmu wa, koe á re ǹ yii, koe mɛn bɛ́ Dɛnaa Lawa n die diɛ tɔrɔn kɛn mìi ni, ǹ mɛnɛn bɛ́ ǹ ba re woe giã siã giulun zɔ́n lɛ zɛnɛɛ wa.

¹⁹ Bɛ n die dɔlɔ biɛ Ezipti gána ganaa, ka tɔrɔn mɛnɛn bɛ́ ǹ ba re woe bɛa zɔ́n lɛ zɛnɛɛ wa.

²⁰ Bɛa pinaa, haalɛ toolon mɛnɛn bɛ́ sùin bɔlɔ-a, ǹ tá re kiɛ̃ bɛn ganaa: "Dɛnaa Lawa wɔn". Donkolon mɛnɛn bɛ́ Lawa a kion, bɛn dɔn tá re màn sonboren biɛ ka mà pɛsɛ̃ ǹ taãnan kɛn bɛ́ lɔn, *wúlu bɔ ǹ bǎã yɔrɔ-a.

²¹ Donkolonon mɛnɛn bɛ́ Zeruzalɛmu ka Zudaa gána nɛ, bɛn tumaa n die goɛ̃ Dɛnaa Lawa Pàãyiidɛnaa wɔ lɛa. Min mɛnɛn bɛ́ re die wúlu boe, bɛn tá re ǹ siĩ kɔrɛɛ ǹ nɛ. Bɛa pinaa lɛ nɛ, pii-kɔle goon din ba re yii Dɛnaa Lawa Pàãyiidɛnaa a kion wa.