Uruti 1 - LAWA A BOO SONBORE 2011

Naomii laanka Uruti boo

¹ Sii yɔrɔ-bɔlen bɛ́ pàã la ǹ mɛn waáraa, bòo gole kɔn bɔ gána lɛ nɛ. Zudaa tɔrɔn bǎã nɛ, Bɛtlehɛmu kiwi, giĩ goon ne, a laanka a lɔ nɛ, ka a nɛgiĩ min paa nɛ, ǹ nə́ yoo mà maǹ woe gùli koe Moabu gána nɛ.

² Bɛa giĩ lɛ tɔ n Elimelɛki, a lɔ tɔ n Naomii, a nɛ lɛ a goon tɔ n Maalɔn, goon tɔ n Kiliyɔn. Efrataa tanlɛ minin manɛ Bɛtlehɛmu kiwi, Zudaa tɔrɔn bǎã nɛ. Ǹ bɛ́ ǹ nə́ dɔ Moabu gána lɛ nɛ, ǹ nə́ giã walan.

³ Naomii ǹ zuũ Elimelɛki daa á gã. A dinsɔɔ̃ nɔmaa á goã kun ka a nɛgiĩ min paa lɛ nɛ.

⁴ A nɛgiĩn lɛn sɛn nə́ Moabu tɔrɔn wɔ lɔn lɛa. Goon tɔ n Ɔrpaa, goon tɔ n Uruti. Ǹ nə́ giã walan yǎa lɛ̀ fù kɛ miã.

⁵ Bɛ kio, Maalɔn laanka Kiliyɔn nɛ, bɛn dɔn paanan gã, Naomii bɔ̀n baa ka a nɛnyaan min paa lɛ laanka ǹ zuũ ni.

⁶ Bɛ kio, Naomii bɛ́ á ma, mà Dɛnaa Lawa wusoo á bǐɛ̃ kɔ a tɔrɔ minin lɛn ganaa á màn-bii kɔ ǹ la, á yoo, a laanka ǹ manaan nɛ, ǹ nə́ wusoo ǹ nə́ woo Zudaa gána nɛ.

⁷ Bɛ lɛ nɛ, á soo á n bɔ a giã ǹ bǎã lɛ nɛ kun ka ǹ manaa min paa lɛ nɛ. Ǹ nə́ zii saa kəni, mà maǹ woe Zudaa gána nɛ.

⁸ Naomii tɔ́n pɛ ǹ manaa min paa lɛ-n kɛnɛn: A bɛ́ miɛ̃, didie wusoo a wo ǹ dan li. Ka bǐɛ̃ gole mɛn zɛnaa masɛ laanka woo wolen kɛn manɛ, Dɛnaa Lawa die a zɛnaa ka dɔn man miɛ̃.

⁹ Dɛnaa Lawa die a toa didie wusoo a mìi susu ǹ bǎã yɛ zuũ kion. Á n sɔɔ ǹ nɛ. Bɛ kio, ǹsɛn nə́ kaa wuu ni.

¹⁰ Ǹ nə́ tɔ́n pɛ nɛ kɛnɛn: Wɔ ba wusii wa, wɔsɛn man woe kunun n ni yǎa n tɔrɔ minin li.

¹¹ Naomii tɔ́n pɛ ǹ nɛ: «Maa nɛlɔn lɛn, ka wusoo. Ka n woe wàa pii kun ka ma nɛ. Nɛgiĩn tá boe masɛ gɔ́ɔ̃-n doo bɛn nə boo la ǹ ka zuũn baa?

¹² Maa nɛlɔn lɛn, ka wusoo ka wo kaa bɔ ǹ bǎã nɛ. Masɛ zizi kɔ á la yii ni, wusoo a wɔ giĩ li ganaa. Ta masɛ n we giĩ li pelo tèlò kɛ nɛ, ma yiri ná a ganaa máa ma á re nɛgiĩn yii,

¹³ ka á re n yii diɛ bɛn gole kɔ la? Ka á re n piɛ̃ ka giĩ-n bɛa lɛa? Haayii maa nɛlɔn lɛn. A giala, sii kɛ lɛ din a lɛ kɔɔsɛbaa á gole masɛ ganaa á la kaa wɔ nɛ. Dɛnaa Lawa din na á kɛ da masɛ mìi ni.»

¹⁴ Ǹ nə́ wusoo ǹ nə́ kaa wuu-n doo. Ɔrpaa fòo da ǹ zuũ dan lɛ nɛ, á tɔ́n nə n na a ganaa. Sɛnɛ, Uruti sɛ nə n dama a ganaa.

¹⁵ Naomii tɔ́n pɛ Uruti ni: «N miã lɛ bɛ́ ke á wusoo á woo a tɔrɔ minin li, á woo a dìn kio, n dɔ wusoo n na a kio saa.»

¹⁶ Uruti tɔ́n pɛ: «N baran fuu saa ma li, mà ma n toa walan ma wusoo mà wo bǎã sɔsɔɔ̃-n wa. A giala, n bɛ́ re woe bǎã mɛn nɛ, ma dɔ n die woe walan, n bɛ́ re wɛɛ bǎã mɛn nɛ, ma dɔ n die wɛɛ walan. N tɔrɔn tá re ma tɔrɔn biɛ, n Lawa á re maa Lawa biɛ.

¹⁷ N bɛ́ re giɛ̃ bǎã mɛn nɛ, ma dɔ n die giɛ̃ walan ǹ ma bĩ walan. Bɛ̀ á n bɔ gɛ̀ nɛ bɛ̀ sii kɔsɔ wɔ toɛ̃ kɔn, Dɛnaa Lawa dɔlɔ babaraa bɔ ma ganaa.»

¹⁸ Naomii bɛ́ á yɛ mà Uruti nə n laɛ mà yǎa a woe kun ka asɛ nɛ, á nɔmaa á n lɛ tã, a boo da-n doo wa.

¹⁹ Ǹ dinin min paa tɔ wɔ kun yǎa ǹ nə́ woo dɔ Bɛtlehɛmu kiwi. Ǹ bɛ̀ ǹ nə́ dɔ Bɛtlehɛmu, kiwi minin lɛn tumaa nə́ n kaãbaa ǹ sii ganaa: lɔn man nə́ goã pii kɛnɛn: «E! Naomii din nə ke?»

²⁰ Sɛnɛ, asɛ na á goã pii ǹ ni: «Ka baran masɛ bíi Naomii doo wa, ka ma bíi Maaraa, a giala, Pàãyiidɛnaa na á kanaa kɔsɛ masɛ ganaa á la yii ni.

²¹ Masɛ bɛ́ woe, bɛ̀ màn tá ma gɔn. Sɛnɛ, Dɛnaa Lawa na á toa masɛ nə́ n bɔyaa ka ma gɔn kooro ne. Wàa na á baa, ka n tɔn masɛ bǐi Naomii? A da yaa, Dɛnaa Lawa din na á yoo masɛ gialaa, Pàãyiidɛnaa na á koe bɔ masɛ ganaa.»

²² Naomii na á daa ka bɛa yɔrɔ kɛ lɛ nɛ, kun ka ǹ manaa Uruti ni. Uruti lɛ n Moabu tɔrɔ lɛa, boe Moabu gána nɛ. Ǹ bɛ́ doe Bɛtlehɛmu kiwi, bɛ̀ *ɔrzi-kurii biikoo ne.