Timote2 2 - LAWA A BOO SONBORE 2011

Yezu a dí-nyali a kɔnbɔ ka sɔraasi-n boo

¹ N din wɔ paǹ li, nsɛ mɛn bɛ́ maa nɛ lɛa, wɔ bɛ́ Lawa a bǐɛ̃ mɛn giulun, wɔa tá kun ka Yezu *Krita-n lɛ gɔ́ɔ̃ nɛ, n dɔ nə n gɔn paraa bɛ lɛ ganaa, n nə n gù we yii.

² N màn mɛn ma ma lɛ-n siére gigiã yii ni, min mɛnɛn bɛ́ bɔlɔgoondɛnan lɛa, ǹ dɔn nə́ boe la, ǹ min kɔsɔn daraa a ganaa, a yɔrɔ nyaa bɛn manɛ.

³ Lɛ kɔ nɔmaa ganaa ka masɛ bɛ́ lɔn, n nə n baa Yezu Krita a sɔraasi sonbore lɛa.

⁴ Bɛ̀ min tá woe sɔraasibaa ǹ bǎã nɛ, bɛ̀ a tá li a sii kɔɔ̃n kɔ a goledɛnaa ganaa, a ba n taasɛ kanaa kɛ a siin ni wa.

⁵ Bɛ̀ minin tá n zoɛ̃ kɔn ka baa nɛ, a din goon ne. Bɛ̀ ń baa-sili mɛn yaa gɛ̀lɛ yii, a na á baa si á kɔnpɛ ka a yɔrɔ nɛ.

⁶ Buu-kɔsɔli mɛn bɛ́ á dí nya á nɔmaa, bɛ lɛ n die a wɔ gii yii bibinaanɛ.

⁷ Ma bɛ́ màn mɛn pii n ni, toa n nə n taasɛ a ganaa, a giala, Dɛnaa á die yiri koe n la, n bɛ tumaa giala ma.

⁸ N yiri nyan bɔ ka Yezu Krita-n wa. A kɔnpɛ ka Boo Tii Kɔɔ̃n kɛ-n ma á pii, a din lɛ yii na á kaa á n bɔ geren bii, a din lɛ n kii Davida tɔrɔ lɛa.

⁹ Bɛa Boo Tii Kɔɔ̃n kɛ lɛ a lɛa nɛ, ma á nɔmiɛ, minin nə́ fɔlɔ biɛn kiɛ ma ganaa, ka man má sii la. Sɛnɛ, ǹ bɛ́ ǹ nə́ masɛ yii lɔn, Lawa a boo bɛ́ a yii-n miɛ̃ wa!

¹⁰ Bɛ lɛ na á toa, Lawa min mɛnɛn bɔ, man sii tumaa sii ma ganaa bɛn lɛn taman yii, màn mɛn bɛ́ toɛ, Yezu Krita bɛ́ kirisibaa mɛn koe, ǹ dɔn nə bɛ lɛ yɛ, ǹ gugurubaa nyabaã wole dɔ yɛ bɛ lɛ gɔ́ɔ̃ nɛ.

¹¹ Kɛ n boo lɛa, min doamaa bɛ́ a waa boo mɛn la: «Bɛ̀ wɔ́ gã kun Krita nɛ, wɔ yii á re goɛ̃ koo kun ni.

¹² Bɛ̀ wɔ́ nɔmaa si wɔ ganaa, wɔ á re kii biɛ kun ni. Bɛ̀ wɔ́ n piã nɛ, a dɔ á re n piɛ̃ ka wɔ dɔn nɛ.

¹³ Ta wɔ a bɔlɔgoondɛnan lɛa wa, asɛ á die goɛ̃ bɔlɔgoondɛnaa lɛa, a giala, a boe la a n piã ka a din bɔlɔ-n wa.»

Dí-nyali sonbore boo

¹⁴ Boo kɛ tumaa pɛ, n minin yiri da a nɛ, n laa ǹ ganaa Lawa yɔrɔ-a, mà ǹ baran kɔn lɛ baã boon ganaa wa. Bɛa kɔn lɛ baãn kɛn lɛn ba sii kɔ́n bǐɛ̃ koe wa. Min mɛnɛn bɛ́ n too koe li, a n bɛn ziziɛ̃ dinin.

¹⁵ N doa n yɛ Lawa yɔrɔ-a dí-nyali sonbore lɛa, dí-nyali mɛn bɛ́ a sìi koe a nya ǹ dí ganaa wa, á n sonbore boo kɛ pii ka a peperebaa nɛ.

¹⁶ Golee Lawa li baã boo kooron kɛn, n nyɛnaa bɛn manɛ. A giala, min mɛnɛn bɛ́ n laɛ ǹ ganaa, màn nə miɛ bɛa dɛnan golee Lawa li baã li.

¹⁷ Ǹ da ǹ boo lɛ n basaã koe, ka baayɛrɛ bɛ́ gɔ̀nɔn siĩ gialakun ziziɛ̃ lɔn. Bɛ miã sɛ̀ kooro pɛlen lɛn man ka Imenee laanka Filetɔsi ni.

¹⁸ Ǹ nə́ sonbore zii da, ǹ nə́ min tɛnɛn golee Lawa li ziziɛ̃ ka ǹ da ǹ boo ne, mà geren yii kaa á nya.

¹⁹ Sɛnɛ, Lawa din kion giala mɛn daa, bɛ lɛ n goɛ̃. Boon kɛn man kiɛ̃ nɛ a ganaa gɔn bǎã lɛa kɛnɛn: «Dɛnaa din tá a wɔn doɛ̃.» Á n pɛ dɔn: «Min mɛn tumaa bɛ́ mà asɛ n Dɛnaa wɔ lɛa, bɛ nə n bɔ sii baraa wɔlɔ li.»

²⁰ Kion gole gɔ́ɔ̃ nɛ, sana mànan laanka wɔrɔgiala mànan dininsɔɔ̃nɔn bie ǹ tan wa. Màn tɛn tan gɔn lɛa, ǹ tɛn dɔ tan gì lɛa. Ǹ tɛn a nya ǹ dí na a tan a tɔ-a. Maǹ dí tumaa nyɛɛ ka ǹ tɛn dɔ nɛ.

²¹ Bɛ̀ min mɛn nə n din kũ, bɛa boo kooron lɛn ganaa, bɛa dɛnaa á die dí nya ǹ màn sonbore biɛ. A giala, a n Dɛnaa wɔ lɛa, á n sii bǐɛ̃ koe Dɛnaa nɛ, á n boe la a zɛnaa ǹ sii sonbore tumaa zɛnaa.

²² N bɔ tɔntɔraabaa ǹ foo sii babaraan wɔlɔ li. Min mɛnɛn bɛ́ Dɛnaa tɔ bíi ka gɔ́ɔ̃ fubaa nɛ, n doa n ga peperebaa laanka goleemali li kun ka bɛn nɛ, ka kɔn-narɛɛ laanka là nyantoro ne.

²³ Sɛnɛ, n nyan lɛ kɔ yiri baãnaan liere kɔ kooron kɛn ganaa wa. N doɛ̃ mà bɛn lɛn man die ka zia nɛ.

²⁴ A giala, Dɛnaa a dí-nyali doamaa bie a goã zia-dali lɛa wa. A foo doamaa nɛ a goã basiɛ̃-n min tumaa wɔ paǹ li. A doamaa nɛ a boo minin daraa la, á n sii sii a ganaa.

²⁵ Min mɛnɛn bɛ́ a boo liere koe, a doamaa nɛ, a bɛn doroo ka sabarabaa nɛ. Kɔntan, Lawa á die n doe ǹ lɛ, ǹ wusoo ǹ zɛnaa ǹ siin kio, ǹ sonbore dɔ̃.

²⁶ *Sɛtaan nə kan mɛn koa ǹ nɛ, á ǹ kũ, á ǹ baa a din foo sii zɛnaalin lɛa, ǹ dɔn tá boe la ǹ yiri yɛ, ǹ nə n si bɛ la.