Timote1 4 - LAWA A BOO SONBORE 2011

Minin daraa soɛ boon ganaa wolen boo

¹ Yiri Fu n pii foaãnɛ, mà lɛawaan mɛnɛn bɛ́ die, mà minin tɛnɛn tá re n piɛ̃ ka Lawa a zii tɔ-wɔ nɛ. Mà ǹ tá re n parɛɛ yiri sã ǹ boon ganaa, ka nɔ̀ɔnɔn minin daraa ǹ boon ne.

² Soɛ-bɔlen mɛnɛn bɛ́, ǹ yiri ná a ba ǹ goe sii-n doo wa, maǹ die n siɛ bɛn lɛn minin yiri sã ǹ boo li ǹ papaã.

³ Bɛa minin lɛn man pii, mà Lawa-nyankɔlen doamaa bie ǹ kɔn wɔ wa, mà ǹ doamaa bie ǹ màn tɛn dɔ bii wa. A da yaa, Lawa na á màn-bii tumaa da wɔa wɔ lɛa, mà wɔ bii. Min mɛnɛn bɛ́ goleemali wolen lɛa, ǹ nə́ sonbore doɛ̃, bɛa dɛnan tá boe la ǹ bɛa mànan lɛn bii, bɛ̀ ǹ nə́ Lawa nyankɔ, ǹ nə́ barka da nɛ.

⁴ A giala, Lawa màn mɛn tumaa zɛnaa, a tumaa á siĩni, ǹ kɔ́n ba daa ǹ màn lɛa wa. Sɛnɛ, yǎa wɔ barka diɛ Lawa nɛ wɔ tɔn bii.

⁵ A giala, Lawa a boo laanka Lawa-nyankɔ n màn-bii lɛ kɔɔ̃n koe Lawa ganaa.

Yezu Krita a dí-nyali sonbore boo

⁶ N doa n dɔɔ̃nɔn lɛn daraa bɛ tumaa ganaa. Bɛ̀ n zɛnaa miɛ̃, n tá re Yezu *Krita a dí-nyali sonbore biɛ. N bɛ́ n kɔ goleemali boon laanka daraa sonbore mɛn lɛ ka n parsii ni, n din telenboen too ka bɛn lɛn nɛ.

⁷ Sɛnɛ, yii wɔ Lawa la ǹ boo zizin kɛn, boo kooron lɛa, n piã ka bɛn nɛ. N daraa nyɛ́ɛ baa Lawa n ganaa, bɛ á soɛ.

⁸ Din gù-kaa dɔ n daraa lɛa, a là tan sii tɛn gɔ́ɔ̃-n sɛn. Sɛnɛ, nyɛ́ɛ baa Lawa-n a là tan sii tumaa gɔ́ɔ̃ nɛ. Bɛ lɛ n toɛ Lawa wɔa wɔ bǐɛ̃ kɔ pelo, ka biɛ̃ nɛ.

⁹ Min tumaa doamaa nɛ, a waa boo kɛ la, a si taãn lɛa.

¹⁰ Bɛ̀ n yaa wɔ á dí nyɛɛ, wɔ á yɔ kaka boe, wɔ foo bɛ́ doa-n Lawa yiikoonaa mɛn ganaa, bɛa lɛa nɛ, asɛ mɛn bɛ́ giɛ li a min tumaa kirisibaa, sanparɛ min mɛnɛn foo bɛ́ doa nɛ a ganaa.

¹¹ N doamaa nɛ n bɛ tumaa pɛ n laa, n minin daraa a ganaa.

¹² N nyan toa min kɔ́n nə n yii puusə kɔ n nɛnyaanbaa kɛ taman yii wa. Sɛnɛ, da ǹ boo ne, tɔ wɔ ǹ gɔn nɛ, kɔn-narɛɛ nɛ, goleemali laanka *yoreenbaa nɛ, toa n goã bɛn yɔrɔ-nyaali lɛa golee Lawa li wolen manɛ.

¹³ Ma laan bɛ̀ ma daa, n doa n Lawa a boo lɛ pɛ min tumaa yɔrɔ-a, n na a laakalaa ǹ nɛ, n nə ǹ daraa a ganaa.

¹⁴ Lawa a bǐɛ̃baa ǹ màn mɛn bɛ́ n lon, n nyan bɛ da n gɔn para li wa. A din lɛ na á n kɔ n la, á kɔnpɛ ka Lawa a boo gii-dalin da ǹ boo ne, bɛ̀ ga Lawa a sɔmɔ walan wolen bɛ́ ǹ nə́ n gɔn da n la ǹ mɛn pinaa.

¹⁵ N doa n bɛa dí lɛ nya, n nə n we bɔ li parsiini, màn mɛn bɛ́ toɛ, min tumaa dɔ̃ mà n tá woe nyɛɛnɛ.

¹⁶ N yiri kɔ n din laanka n minin daraa li. Sii si n ganaa a gɔ́ɔ̃ nɛ. Bɛ̀ n zɛnaa miɛ̃, n tá re n dinmaa kirisibiɛ. Min mɛnɛn dɔn bɛ́ n too koe n lon, n tá re bɛn dɔn kirisibiɛ.