Timəə dí-pɛn 1 - LAWA A BOO SONBORE 2011

Muizu a boo-laakaalaa bibinaa ( 1–4 )

¹ Muizu a boon man ka kɛn nɛ, á ǹ pɛ Izirayeli minin tumaa nɛ. Bɛa biikoo li, bɛ̀ maǹ Zurdɛ̃ tà kio don, nyankɔrɔ lɛ kɛ nɛ Suufu kiwi yɔrɔ-a, Paran laanka Tofɛli kiwi biin ni, Laban kiwi ni, Aserɔti kiwi laanka Di-Zahabu kiwi ni, bɛn nə́ ǹ paǹ kɔsɔ-a.

² Bɛ̀ ń nə́ n toa Horɛbu kele li, ń Seyiiri a kele yii zii kɛ saa, lɛawaa fulugoon tɔ nə n tá we, n tɔn dɔ Kadɛsi-Barneya kiwi.

³ Izirayeli minin lɛn soo Ezipti lɛ̀ pusi, a mui fulugoonbaa ǹ wɔ a lɛawaa bibinaa pinaa, Muizu boo da ǹ nɛ, á kɔnpɛ ka gɔn waa ǹ boon kɛn tumaa nɛ, Dɛnaa Lawa kɔ la, ǹ wɔ lɛa.

⁴ Bɛ á zɛnɛɛ bɛ̀ Muizu boo Amɔɔrɔ tɔrɔn kii Sihɔn kɛ la, ǹ mɛn lɛ goã giã-n Ɛsibɔn kiwi. Basanan kii Ɔgu mɛn dɔ goã giã-n Astarɔti kiwi, á boo bɛ dɔ la Edreyii kiwi.

⁵ Bɛ lɛ kio ne, ǹ bɛ́ Zurdɛ̃ tà kio Moabu gána nɛ, Muizu ná a giala kɔ, á dí-pɛ kɛa sii yɔrɔ nyaa, á pɛ:

Zii kɔ Izirayeli minin la boo

⁶ – Wɔ bɛ́ Horɛbu kele la, Dɛnaa Lawa, wɔa Lawa na á pɛ wɔ-n kɛnɛn: «Ka belebɔ bɛa kele lɛ la á la yii ni.

⁷ Ka n bɔyaa kəni, ka zii saa, ka wo Amɔɔrɔ tɔrɔn kele yii tɔrɔn kɛn tumaa nɛ: Nyankɔrɔ lɛ kɛ nɛ ǹ nə́ bíi Arabaa, kele yii kɛ nɛ, ka bǎã kɛ nɛ ǹ nə́ bii *Sefela, diə bǎã kɛ nɛ gusin a lɛ̀gɔn la, Yìsi mu gole lɛ-a basa kɛ nɛ, Kanaan minin gána laanka Liban gána nɛ, yǎa tà gole kɛ lɛ-a, Efrati tà lɛ.

⁸ Ka ga: gána kɛ lɛ ka nyɛɛnɛ, má kɔ ka la. Ka kaa a nɛ, ka si ka baa kaa wɔ lɛa. A giala, masɛ Dɛnaa Lawa nə n liɛ, má maa á re gána lɛ koe ka digolo Abrahamu la, Izaaki ni ka Zakɔba nɛ, ma kɔ ka tɔrɔn dɔn la ka kio.»

Sii yɔrɔ-bɔlen koa

⁹ Bɛa waáraa kɛ lɛ nɛ, má pɛ ka nɛ máa ma dinsɔɔ̃ a boe la, man toɛ̃ ka kaa sii-n wa.

¹⁰ A giala, Dɛnaa Lawa, kaa Lawa lɛ ka bulubɔ, ka á ke mɔnaa-n pelo, ka lon a leeren bɛ́ lɔn.

¹¹ Má pɛ dinin máa Dɛnaa Lawa, ka digolon Lawa lɛ die a kɛ miã kaa ka li doo gunyin duu goon, a barka da ka ganaa, ka a bɛ́ á n lɛ kɔ ka la lɔn.

¹² Sɛnɛ, ma dinsɔɔ̃ a boe la, man toɛ̃ ka kaa sii yɔrɔ bɔ nɛ, má n ka laadoon bǐɛ̃ koe, má n kaa zian nyɛɛ ka bii wa.

¹³ Bɛ lɛ nɛ, má pɛ ka nɛ, máa ka giĩn kɔnɔn bɔ kaa tɔrɔn lɛn gogoonmaa bii, giĩn mɛnɛn bɛ́ sii doɛ̃, yiri nə́ ǹ lon, ǹ tɔ bǐɛ̃ dɔ n minin lɛ-n. Ma á re bɛn lɛn koɛ ka mìi la.

¹⁴ Ká tɔ́n ma lɛ si ká pɛ mà ma bɛ́ mà kasɛn nə sii mɛn zɛnaa, mà á siĩni.

¹⁵ Má nɔmaa má tɔrɔ gogoonmaa a mìilandɛnan sɔkɔn, giĩn lɛa, sii doɛ̃, ǹ tɔ bǐɛ̃ dɔ n minin lɛ-n. Má bɛn lɛn koa ka mìi la. Ǹ tɛnɛn man min duu goon a mìilandɛnan lɛa, ǹ tɛnɛn man min paabiɛ wɔn lɛa, ǹ tɛnɛn man min posooro wɔn lɛa, ǹ gialakunun man min fù wɔn lɛa. Má ǹ gialakunun dɔn koa pàãdɛnan lɛa, ka tɔrɔn lɛn bii ni.

¹⁶ Bɛa waáraa lɛ nɛ má pɛ má laa kaa sii yɔrɔ-bɔlen lɛn ganaa kɛnɛn: «Bɛ̀ ka dɔɔ̃nɔn lɛn mɛnɛn nə́ daa ka ǹ sii ni ka li, ka n too kɔ ǹ lon. Bɛ̀ sii tá Izirayeli minin mɛnɛn bii, hinlaa ta a n Izirayeli min laanka gùli bii, ǹ mɛn bɛ́ giã nɛ a kion, ka didie a sii yɔrɔ bɔ a peperebaa li.

¹⁷ Sii yɔrɔ bɔ gɔ́ɔ̃ nɛ, ka nyan toa ka minin bɔkɔnlɛ wɔ wa. Ka n too kɔ doobaa lon, ka ka bɛ́ n too koe pàãma dɔ lon lɔn, ka baran nyɛ́ɛ baa min kɔn yii-n wa. A giala, sii yɔrɔ bɔ n Lawa a sii lɛa. Bɛ̀ sii mɛn a yɔrɔ bɔ la ka pàã nɛ, ka da a yɔrɔ pɛ ma nɛ, ma ga a ganaa.»

¹⁸ Ka doamaa bɛ́ ka sii mɛn tumaa zɛnaa, má pɛ má laa ka ganaa bɛa waáraa lɛ nɛ.

Izirayeli minin Lawa bɔlɔ tii

¹⁹ Bɛ kio, wɔ́ kiɛ̃ wɔ́ n bɔ Horɛbu kele li, ka wɔa Lawa, Dɛnaa Lawa lɛ goã á pɛ á laa wɔ-a lɔn. Wɔ don gangabiɛ mɛn yɛ a sii n nyɛ́ɛ diɛ, wɔ́ bɛ lɛ wɔsɔ kɔn, wɔ́ Amɔɔrɔ tɔrɔn kele yii zii kɛ saa, wɔ́ daa yǎa Kadɛsi-Barneya.

²⁰ Walan lɛ nɛ má pɛ ka-n kɛnɛn: «Ka á ke ká dɔ Amɔɔrɔ tɔrɔn kele yii lɛ-n kəni, ǹ mɛn lɛ bɛ́ Dɛnaa Lawa, wɔa Lawa lɛ n koe wɔ la.

²¹ Ka ga, kaa Lawa, Dɛnaa Lawa na á gána kɛ lɛ koa tán ka yɔrɔ-a. Ka woo, ka si ka baa kaa wɔ lɛa, ká ka digolon Lawa, Dɛnaa Lawa lɛ goã á n lɛ kɔ ka la ka a sii-n lɔn. Ka baran nyɛ́ɛ baa wa, ka gù baran gã wa.»

²² Sɛnɛ ka tumaa nə́ n zɔ̃ ká dɔ ma li, ká pɛ ma nɛ mà wɔ minin dia wɔ nyɛɛnɛ, bɛn nə ga gána lɛ-a wɔa lɛa. Wɔ bɛ́ re boe la wɔ zii mɛn saa, wɔ bɛ́ re boe kiwin mɛnɛn nɛ, ǹ da bɛ pɛ wɔ nɛ.

²³ Má ga bɛa sii lɛ ganaa, ka a n siĩni. Má tɔ́n min fulupaa bɔ ka bii, tɔrɔ gogoonmaa a min goon.

²⁴ Bɛn nə́ n bɔyaa, ǹ nə́ kele yii zii kɛ saa, ǹ nə́ daa yǎa Ɛsikɔli a nyankɔrɔ basa kɛ nɛ, ǹ nə́ ga bɛ ganaa.

²⁵ Ǹ nə́ gána lɛ a da nɛ na, ǹ nə́ gũ ǹ gɔn, ǹ nə́ daa kɔ wɔ la. Ǹ nə́ ǹ zii tɔ lɛ a boo laakalaa wɔ nɛ ǹ nə́ pɛ: «Wɔa Lawa, Dɛnaa Lawa bɛ́ gána mɛn lɛ koe wɔ la, gána sonbore ne.

²⁶ Sɛnɛ, ká kaa Lawa, Dɛnaa Lawa lɛ a da ǹ boo tii, ká n piã, ká mà ka a woe wa.»

²⁷ Ká zùzùũ si kaa mɔnaa kionən ne ká pɛ kɛnɛn: «Wɔ sii bɛ́ a ba kɔɔ̃n Dɛnaa Lawa ganaa wa, bɛ lɛ nɛ á wɔ waa, á wɔ bɔ Ezipti gána nɛ. A n giɛ li, a wɔ kɔ Amɔɔrɔ tɔrɔn kɛn la, bɛn nə wɔ dɛ lenlen.

²⁸ Wɔ n die woe maa? Wɔ dɔɔ̃nɔn lɛn dɔn nə́ wɔ foo biɛ na, bɛ̀ ǹ bɛ́ ǹ nə́ pɛ: Gána lɛ a minin tá didi ǹ nə́ la wɔ nɛ, ǹ tá kaka dɔn, ǹ nə́ la wɔ nɛ. A kiwin tá dadara, kungɔnun nə́ ǹ lɛnpɛnɛ, sasa lon ka piwɔɔn! Anaaki ke, á goã sasa gegere, wɔ bɛ tɔrɔn yɛ walan.»

²⁹ Masɛ Muizu tɔ́n pɛ ka-n kɛnɛn: «Ka gɔ̀nɔn baran bìn da wa, ka baran nyɛ́ɛ baa ǹ nɛ wa.

³⁰ Kaa Lawa, Dɛnaa Lawa mɛn lɛ á ke ka nyɛɛnaan boe, bɛ lɛ á re zia biɛ kaa lɛa, ka a bɛ́ á zɛnaa ka-n lɔn, ka dinin yii ni, Ezipti gána nɛ,

³¹ ka diə gole kɛ dɔ gɔ́ɔ̃ nɛ. Ka dinin bɛ́ ká yɛ. Ka zii tɔ mɛn tumaa wɔ ká tɔ́n dɔ bǎã kɛ lɛ nɛ, kaa Lawa, Dɛnaa Lawa lɛ na á ka tamaa bɛ gɔ́ɔ̃ nɛ, ka min bɛ́ a nɛgiĩ siɛ, bɛ̀ a tamaa a kolo-n lɔn.»

³² Sɛnɛ a laanka bɛ nɛ, ka n foo doa kaa Lawa, Dɛnaa Lawa ganaa duduu wa.

³³ A da yaa, ka zii mɛn saa ká n tɔ we la, a din Lawa lɛ na á goã ka nyɛɛnaan boe ka tɛ fúlu ni tèlò-n, ka tɛmaa bara nɛ lɛawaa li, bɛ̀ a ga giã ǹ bǎã li, bɛ̀ a kɔ ka la.

³⁴ Dɛnaa Lawa kaa da ǹ boon lɛn ma. A foo yoo, á tɔ́n nə n liɛ á pɛ:

³⁵ «Min babaraan mɛnɛn nə soo Ezipti gána nɛ, ma n liɛ, máa ma á re gána sonbore mɛn lɛ koe ǹ digolon la, ǹ goon gòã ba re miɛ a-n wa,

³⁶ yǎa Yefunee a nɛgiĩ Kalɛbu ke. Bɛ yii á re yii. A tɔ wɔ á bɔ gána mɛn lɛ nɛ, ma á re koe a din laanka a nɛnyaanan la. A giala, á kɔ masɛ Dɛnaa Lawa lɛ, ka a parsiini.»

³⁷ Haalɛ ma dɔ din, Dɛnaa Lawa foo yoo ma li, ka dinin kɛn lɛn lɛa. Á pɛ ma-n kɛnɛn: «N dɔ dinmaa gòã a re miɛ gána lɛ-n wa!

³⁸ Sɛnɛ, Nunu a nɛgiĩ Zozoe ke n kiodɛnaa lɛa, bɛ á re we. Bɛ foo taã, a giala, a din lɛ n die gána lɛ koe Izirayeli minin lɛn la, ǹ kíɛ̃ lɛa.»

³⁹ Kaa nɛnyaanan kɛn lɛn ká goã pii, mà kaa boomala wolen tá re ǹ goɛ ǹ wo ǹ ne, kaa nɛgiĩn mɛnɛn lɛn nə́ ke, ǹ ba sii bǐɛ̃ laanka a baraa bɔkɔnlɛ doɛ̃ bɔrɔ wa, bɛn tá re we. Man die gána lɛ koe bɛn la, bɛn man die gána lɛ sii, ǹ baa ǹ wɔ lɛa.

⁴⁰ Sɛnɛ, kasɛn kɛn, ka Sawɛɛ tà kɛa zii saa, ka wusoo, ka wo don.

⁴¹ Ká tɔ́n ma lɛ si ká pɛ ma nɛ, mà kasɛn nə́ sii baraa zɛnaa Dɛnaa Lawa nɛ! Ká mà kasɛn tá re woe ka zia baa, a kɔnpɛ ka kaa Lawa, Dɛnaa Lawa a boo ne, a màn mɛn tumaa pɛ, á laa ka ganaa. Kaa didie ná a ziabaa ǹ mànan goa, bɛ̀ ká n taasɛ, mà ka á re kele yii bǎã kɛ kuĩ nanaa.

⁴² Dɛnaa Lawa tɔ́n pɛ ma nɛ, mà ma pɛ ka-n kɛnɛn: «Ka baran wo zia lɛ baa wa. A giala, ma a kun ka-n wa. Ka baran wo ka dinin kɔ kaa zɔ́ɔn la, ǹ ka dɛ kooro wa.»

⁴³ Má bɛ lɛ yɔrɔ pɛ ka nɛ. Sɛnɛ, ka n too kɔ ma lon wa. Ká n piã ka Dɛnaa Lawa a da ǹ boo ne. Kaa din gole kɔ lɛ gɔ́ɔ̃ nɛ, ká woo kele yii lɛ nɛ.

⁴⁴ Amɔɔrɔ tɔrɔn mɛnɛn bɛ́ kele yii lɛ nɛ, bɛn nə́ tɔ́n soo ǹ nə́ n da ka lɛ, ǹ nə́ kaa ka bii ka zoo nɛn bɛ́ lɔn, ǹ nə́ ka loo. Ǹ nə́ ka dɛ miɛ̃, a kũ Seyiiri kiwi ganaa, yǎa Ɔrmaa kiwi.

⁴⁵ Ka bɛ́ ká n bɔyaa, ká tɔ́n wuu pɛ Dɛnaa Lawa ganaa. Sɛnɛ, a n too kɔ ka lon wa, á n piã a kaa lɛ dɛ ma wa.

⁴⁶ Bɛ lɛ nɛ, ká tɔ́n giã Kadɛsi kiwi, ká belebɔ walan taãn-taãnɛ.