Tesaloniki2 3 - LAWA A BOO SONBORE 2011

Pooli bɛ́ mà ǹ Lawa nyan mɛn kɔ ǹsɛn lɛa

¹ Bɛ tumaa kio, dɔɔ̃nɔn lɛn, ka Lawa nyankɔ wɔa lɛa, màn mɛn bɛ́ toɛ, Dɛnaa a boo kɛ wo nyɛɛnɛ, a guguru kɔ, ka a bɛ́ n zɛnɛɛ ka li lɔn.

² Ka Lawa nyankɔ wɔa lɛa dɔn, màn mɛn bɛ́ toɛ, wɔ kanbaa min babaraa naarɛn kɛn ganaa; a giala, golee Lawa li ba min tumaa lon wa.

³ Dɛnaa n bɔlɔgoondɛnaa lɛa. A din tá re n doe ka lɛ, a ka kanbaa *Sɛtaan baraa kɛ ganaa.

⁴ Wɔ́ foo tãbaa yɛ Dɛnaa li kasɛn wɔ gɔn la; a giala, wɔ bɛ́ pii ka nɛ wáa ka sii mɛn zɛnaa, ka n bɛ zɛnɛɛ, a din lɛ-n kaa tɔn a gialaa zɛnɛɛ.

⁵ Dɛnaa die a Lawa narɛ ǹ foo wɔ ka nɛ, a *Krita a sii simaa kɔ ka la.

Dí-nyɛɛ a là boo

⁶ Dɔɔ̃nɔn lɛn, min mɛnɛn bɛ́ ǹ ba woe sii yɔrɔ li wa, wɔ doroon mɛnɛn kɔ ka la, ǹ nə́ ǹ ba tɔ we á kɔnpii ka bɛn nɛ wa, wɔ ǹ pii wɔ á laɛ ka ganaa ka wɔa Dɛnaa Yezu Krita tɔ nɛ, wáa ka n wɔlɔ lui bɛn ganaa.

⁷ Kasɛn doamaa bɛ́ ka wɔ gòɛ̃ saa lɔn, ka dinin tá bɛ doɛ̃ parsiini; wɔ bie wɔ́ giã ka bii, wo sii yɔrɔlibaã wolen lɛa wa.

⁸ Wɔ màn mɛn bii, wɔ bie wɔ́ a nyankɔ min kɔ́n la wa. Sɛnɛ, wɔ dinin man wɔ́ dí nya penleen laanka tèlò ne, wɔ́ fuu yɛ wɔ́ nɔmaa, màn mɛn bɛ́ toɛ, wɔ baran goã guĩ lɛa min kɔ́n mìi-n wa.

⁹ A bie ka wɔ doamaa bie ka kaa dɔmalɛ-n wa, sɛnɛ, wɔ ǹ wɔ́ kɛ zɛnaa, wɔ n giɛ li wáa ka dɔn nə zɛnaa miɛ̃.

¹⁰ A giala, wɔ bɛ́ wɔ́ goã ka li, wɔ́ goã wɔ́ pɛ ka nɛ, wáa «bɛ̀ min mɛn ba li a dí nya wa, ǹ dɛnaa baran màn dɔ bii wa.»

¹¹ Wɔ á miɛ mà minin tá ka bii, ǹ ba woe dí yɔrɔ li wa, yǎa sii-lɔlɔkɔn dinsɔɔ̃.

¹² Wɔ ǹ pii bɛa dɛnan lɛn manɛ, wɔ á laɛ ǹ ganaa ka wɔa Dɛnaa Yezu Krita tɔ nɛ, wáa ǹ bɛ lɛ da, ǹ di nya baraabaraa, ǹ nə ǹ dininmaan sɛ̀fuu màn bii.

¹³ Dɔɔ̃nɔn lɛn, kasɛn baran nɔmaa ka sii sonbore zɛnaa-n wa.

¹⁴ Wɔ bɛ́ boo mɛn pii sɛ́wɔ kɛ nɛ, bɛ̀ min mɛn ba sii wa, ka n yiri koa bɛa dɛnaa li, ka baran n mɔrɔ a ganaa duduu wa, màn mɛn bɛ́ toɛ, sìi kũ.

¹⁵ Ka bɛ din yii ni, ka baran baa zɔ́ɔ wa, sɛnɛ, ka n gɔn waa nɛ ka dɔɔ̃nbaa nɛ.

Lawa bǐɛ̃ bíi laanka fòo-diɛ

¹⁶ Dɛnaa mɛn din bɛ́ là nyantoro kɔle lɛa, a dinmaa die a là nyantoro kɔ ka la, biikoo tumaa li ka yɔrɔ din tumaa nɛ. Dɛnaa die a goã ka dinin tumaa li.

¹⁷ Ma din Pooli gɔn na á fòo-diɛ kɛ kiɛ̃. Ma gɔn bǎã n ka bɛ nɛ, maa sɛ́wɔn dinin tumaa nɛ; ma din a sɛ́wɔ kiɛ̃ nɛ.

¹⁸ Wɔa Dɛnaa Yezu Krita a bǐɛ̃ die a dɔ ka dinin tumaa ganaa.