Suusun 28 - LAWA A BOO SONBORE 2011

¹ Min baraa n baa la, a da yaa min kɔn dɔ ba a kio lui wa. Min pepere n ka yàra nɛ bɛ́ lɔn a foo n doa nɛ.

² Bɛ̀ gána á gòãn dii la, a kiin man mɔnaa nɛ. Sɛnɛ, bɛ̀ a nyɛɛnaandɛnaa goon sii dɔ̃, yiridɛnaa lɛa, a kiibaa gòã n we tán.

³ Pàã zɛnaali mɛn bɛ́ mɛnɛɛ doobaan la, a n ka kaa-piɛ waáraa la bɛ́ lɔn màn tumaa ziziɛ̃.

⁴ Min mɛnɛn bɛ́ ǹ ba koe dí-pɛn lɛ wa, maǹ min baraan laakalɛ. Sɛnɛ, min mɛnɛn bɛ́ koe dí-pɛn lɛ, bɛn manə n gòãn dii ǹ ganaa.

⁵ Min baraa ba boo kɔn giala miɛ dí-pɛn gɔ́ɔ̃-n wa. Sɛnɛ, min mɛnɛn bɛ́ giɛ Dɛnaa Lawa li, bɛn ta a tumaa giala miɛ.

⁶ Doobaa mɛn a giã ǹ gɔn bɛ́ pepere, á soɛ pàãma mɛn bɛ́ koe zii kɔkɔrɔ lɛ nɛ.

⁷ Nɛnyaan mɛn bɛ́ koe dí-pɛn lɛ, yiridɛnaa nɛ. Sɛnɛ, n mɛn bɛ́ koe sii baraa zɛnaa wolen lɛ, a n sìi diɛ ǹ di ganaa.

⁸ Min mɛn bɛ́ wɔrɔ giɔ̀mɔ diɛ minin ganaa ka là gole-n la, ta á pàãma baa, a gɔn màn lɛ n die min kɔsɔ wɔ biɛ, min mɛn bɛ́ doobaa makara doɛ̃.

⁹ Min mɛn bɛ́ n too tiɛ̃ màn mɛn bɛ́ toɛ a nyan dí-pɛn ma wa, a Lawa nyankɔ dɔ din nə sii bɔbɔnɛɛ lɛa.

¹⁰ Min mɛn bɛ́ min peperen siɛ̃ ǹ kiɛ sii baraa nɛ, a nyankɔrɔ mɛn fɔ̃, a din nə die n doe a nɛ. Sɛnɛ, min sonboren tá re là nyantoro yii.

¹¹ Pàãma n taasɛ mà asɛ n sii-dɔ̃li lɛa. A da yaa doobaa mɛn bɛ́ yiridɛnaa lɛa, bɛ á doɛ̃ taãn nɛ a bɛ màn mɛn lɛa sonbore.

¹² Min mɛnɛn bɛ́ sii bǐɛ̃ zɛnɛɛ, bɛ̀ ǹ nə́ gɔ̀lɔ̀baa yɛ, a n zɔ́n gole lɛa. Sɛnɛ, min mɛnɛn bɛ́ sii baraa zɛnɛɛ, bɛ̀ bɛn nə́ pàã saa, min tumaa nə n duri.

¹³ Min mɛn bɛ́ a siɛ̃n duri, a sii a bǐɛ̃ koe wa. Min mɛn bɛ́ a siɛ̃n doɛ̃, a nə́ ǹ toɛ walan, maǹ makara boe bɛ ganaa.

¹⁴ Min mɛn bɛ́ yiri boe a din li, bɛ wɔ na á bǐɛ̃ kɔ. Sɛnɛ, laa sii-a wole wɔ n ka koe ne.

¹⁵ Nyɛɛnaadɛnaa baraa mɛn bɛ́ boe doobaa zaman yii ni, bɛ n goon ka yàra mɛn bɛ́ wɔɔsiɛ̃, ka gòon màn gole mɛn bɛ́ parɛ.

¹⁶ Nyɛɛnaandɛnaa yiriwɛɛnaa a dí n ka minin koã nɛ. Sɛnɛ, bɛ̀ min mɛn nə́ n piã ka mɛnaa minin la nɛ, á re nyin sasa yii.

¹⁷ Gɛ̀-dɛle á re baa sii yǎa a yala ganaa. Min nyan kurəə wa.

¹⁸ Min mɛn a giã ǹ gɔn bɛ́ pepere, á re yiikoonaabaa yii. Sɛnɛ, min mɛn a giã ǹ gɔn bɛ́ yɔrɔ paa la, a nyin nə die goɛ̃ a goon ne.

¹⁹ Min mɛn bɛ́ a wuru kɔsɛ, màn-bii a re nyaabiɛ a ganaa wa. Sɛnɛ, màn mɛn bɛ́ là ba a ganaa wa, min mɛn bɛ́ n parɛɛ bɛ-a, á re goɛ̃ doobaa lɛa duduu.

²⁰ Barka n die n diɛ bɔlɔgoondɛnaa ganaa. Sɛnɛ, min mɛn bɛ́ n nanaɛ̃ mà asɛ pàãma baa, ǹ ta re dɔlɔ diɛ a mìi ni ǹ kɔn pinaa.

²¹ Bɔnbii-a wɔ a siĩn wa. Sɛnɛ, bǐɛ̃ boɛɛn tá boe la a min bɔyaa a bɔ a peperebaa la.

²² Min mɛn bɛ́ baa sii naforo kio, a ba doɛ̃ mà doobaabaa á re yii wa.

²³ Sɛ̀-pɛma-a á soɛ laakalaa nɛ.

²⁴ Min mɛn bɛ́ ǹ di laanka ǹ dan koɛ̃, a n pii mà: «Sii baraa bie wa,» a soɛ denzuu n wa.

²⁵ Min mɛn foo bɛ́ wuu pii, a n zia yiɛ. Sɛnɛ, min mɛn bɛ́ n foo doɛ Dɛnaa Lawa ganaa, á re pàãma biɛ.

²⁶ Min mɛn foo bɛ́ doa nɛ a din ganaa, yiriwɛɛnaa nɛ. Sɛnɛ min mɛn bɛ́ sii-dɔ̃lin giã we, á re kirisibiɛ baraa ganaa.

²⁷ Min mɛn bɛ́ doobaan goe, màn kɔn ba nyaabiɛ a ganaa wa. Sɛnɛ, min mɛn bɛ́ n yii tiɛ̃ ǹ ganaa, lɛn baraa bíi na a kio.

²⁸ Bɛ̀ min baraan nə́ pàã saa, min tumaa nə n duri. Bɛ̀ ǹ nə́ gã, bǐɛ̃-zɛnaali n mɔnɛɛ.