Suusun 27 - LAWA A BOO SONBORE 2011

¹ N nyan nə n din kalaa biɛ̃ ǹ taman yii wa. A giala, sii mɛn bɛ́ re n zɛnɛɛ pelo n ba bɛ doɛ̃ wa.

² Toa min kɔsɔn nə n tɔ bɔ. Toa tiin nə zɛnaa, a nyan nə n din baa.

³ Kɔlɔ gole á guguru, nyɔɔsɔ̃ boroo dɔ á guguru. Sɛnɛ, baãnaa a min foo yoo á guguru doo á la bɛn manɛ.

⁴ Kakaarɛbaa n nyɛ́ɛ da ǹ sii lɛa. Foo yoo n ka tà bɛ́ lɔn á pã á pisi. Die n boe la a gole foo yoo nyɛɛnɛ.

⁵ Tɔ pɛ ma yii-n tá soɛ giaáraa baa ka durii-n ni.

⁶ Bɛ̀ n giaára sɛ̀ pɛ n ganaa, bɛ n nyɛɛ mà a tá n narɛ. Bɛ̀ n zɔ́ɔ giaárabaa ǹ sii zɛnaa n nɛ, a nə n yiri siɛ̃.

⁷ Mankiɛ̃ wole din tá n piɛ̃ ka zoo ne, bòo bɛ́ min mɛn ganaa, màn-bii kɔɔsɛ n kɔɔ̃n bɛ lɛ-n.

⁸ Tii mɛn wɔlɔ bɛ́ sɔsɔɔ a gána ganaa, a n ka bàan mɛn nə́ ke a wɔlɔ sɔsɔɔ kɔ a kii ganaa.

⁹ Nyɔɔ laanka màn gìĩ kɔɔ̃n nə foo kɔɔ̃n koe. Giaára a sonborebaa á soɛ n din doroo ǹ boon kɛn manɛ.

¹⁰ N nyan nə n na n giaáran ganaa kɔnlɛ ka n di á giaáran nɛ wa. Bɛ̀ nɔmaa tá n mìi ni, n nyan wo n dɔɔ̃n li wa. Miãkɛn sonbore á soɛ dɔɔ̃n mɛn bɛ́ dɔmɔla nɛ.

¹¹ Maa nɛ, toa n goã sii-dɔ̃li lɛa, ma foo á re kɔɔ̃n koe. Bɛ̀ min sɔ kɔ ma-a, ma á re a lɛ si ǹ boo yii.

¹² Bɛ̀ koe á die, sii-dɔ̃li nə mìi duri. Sɛnɛ, baãnaa sɛ n tɔn zii siɛ yǎa sii yii.

¹³ A mɔnaa si la, a giala a na á n lɛ koa min a giɔ̀mɔ siere lɛa, giɔ̀mɔ lɛ koa ǹ màn si, a giala a na á siére baa tii lɔ wɔ paǹ li.

¹⁴ Bɛ̀ n gunun da n miãkɛn nɛ baayɛlɛ yiisoone ka paraa nɛ, a n goon ka ma n sɔ koe a ganaa.

¹⁵ Lɔ zia-dali n goon ka tɔlɔ mɛn bɛ́ mu boe la a kaa pinaa, a ba n lɛ kuri wa.

¹⁶ Bɛ̀ ń zoɛ̃ li mà n kurəə, a n goon ka ma n zoɛ̃ piɛ̃ kurəə li ma n zoɛ̃ li n nyɔɔ kũ n gɔn.

¹⁷ Fɔlɔ n fɔlɔ lɛ boe lɔn, a din yɔrɔ goon la, minbuiin nɛ nə ǹ miã yiri fuli.

¹⁸ Bɛ̀ n nə́ n da gɔnɔn kũ, ń tá re a nɛ bii. Dí-nyali mɛn bɛ́ a mìilandɛnaa guguru koe, ǹ tá re a tɔ boe.

¹⁹ Mu bɛ́ damalen lɛa yɔrɔ-a lɔn, muinbuiin nɛ dɔ a taasiɛn man miɛ̃ a yɔrɔ nɛ.

²⁰ Geren piɛ laanka nyankɔrɔ zuzulu a piɛ̃ wa. A din yii goon nɛ, muibuiin nɛ dɔ foo sii á nyɛɛ wa.

²¹ Tɛ n sana laanka wɔrɔ yoreen koe. Maǹ min a sonborebaa doɛ̃ ǹ miãn da ǹ boo li.

²² Ta n baãnaa zũ ka ǹ bɛ́ wii zuĩ lɔn, a baãnaabaa lɛ n damaɛ a ki ganaa.

²³ Ga n sèren lɛn gogoomaa ganaa sonbore-a nɛ, n nə n yiri kɔ n sère kuru li,

²⁴ a giala, naforo bie duduu wɔ lɛa wa, golebaa dɔ bie yɛ a da yaa lɛa wa.

²⁵ Ka bɛ n kəni buu kuru, bɛ̀ buu buruu pã, wo buu gere goa kele mìi ni.

²⁶ Sèren too n nə ǹ ka tã mɔnaa lɛa n wɔ n ganaa, butumun too n nə ǹ sã n wuru dii pii ni.

²⁷ Boen too gigiã, màn mɛn bɛ́ toɛ n bɔ̀nyaa yɛ mɔnaa nɛ, á re n toe kɔnlɛ ka n kion minin laanka n dí-nyalin ni.