Suusun 20 - LAWA A BOO SONBORE 2011

¹ Duvɛ̃ nə min diɛ ǹ miãn yii puusə kɔ ganaa. Yɔ kaka n min diɛ sɛ̀ pɛ ganaa. Min mɛn bɛ́ mii á la a yii ni, bɛa sii-dɔ̃li biɛ wa.

² Bɛ̀ kii foo yoo, a n ka yàra bɛ́ lɔn wɔɔsiɛ̃. Bɛ̀ min mɛn màn da bɛa foo-yoo kɛ li, a nə n din nyin boe.

³ Min mɛn bɛ́ n piɛ̃ ka zia nɛ, a din tɔ bɔ ǹ sii ni. Sɛnɛ, baãnaan sɛn foo n yui.

⁴ Yoonaa a buu kɔsɛ a biikoo li wa. Bɛ̀ kaa-piɛ dɔ, a bɛ́ giɛ màn mɛn li a bɛ yii wa.

⁵ Muinbuiin nɛ a taasiɛn man ka tán giulun mu bɛ́ lɔn durii ni. Yiridɛnaa nə ǹ wɔlɔ yii.

⁶ Min gigiã n pii mà ǹsɛn man yiridɛnan lɛa, sɛnɛ, die n boe la a min bɔlɔgoondɛnaa yɛ a nyaa.

⁷ Min mɛnɛn bɛ́ sii bǐɛ̃ zɛnɛɛ, ǹ yiikoonaabaa n pepere. Nɛnyaanan mɛnɛn bɛ́ ǹ kio, bɛn foo á re kɔɔ̃n koe.

⁸ Bɛ̀ kii giã tán kiri wɔ ǹ bǎã nɛ, a n sii sonbore laanka sii baraa tumaa bɔkɔnlɛ doɛ̃.

⁹ Die n boe la a pɛ: «Má n gɔ́ɔ̃ baa fu. Maa sii baraan nə́ n pii ǹ nə́ n bɔ ma ganaa.»

¹⁰ Koɛɛ̃n wɔ ka màn zɔɔ̃ ǹ mànan nɛ n Dɛnaa Lawa soɛ̃ lɛa.

¹¹ Haalɛ nɛ ten, a zɛnaa ǹ siin man a sonborebaa laanka a peperebaa nyɛɛ.

¹² Toon man boo miɛ, yiin man wɔlɔ yii, Dɛnaa Lawa na á ǹ zɛnaa.

¹³ Bɛ̀ n nyuù narɛ, n tá re doobaa biɛ. N yii toa koo, n tá re màn bii n kã.

¹⁴ Màn-piili n pii: «A giɔ̀mɔ á kaka á la yii ni!» Sɛnɛ, bɛ̀ á n moɛ̃, a foo n kɔɔ̃nɛ ka màn kɛ lɛ nɛ á pii.

¹⁵ Sana wɛɛ bie wa, gii giɔ̀mɔ kakaa dɔ á mɔnaa nɛ. Sɛnɛ, doroo ǹ boo sonbore bɛ́ soe lɛ mɛn nɛ, bɛ giɔ̀mɔ á kaka á la ǹ tumaa nɛ.

¹⁶ N bɛ́ n ba min mɛn doɛ̃ wa, bɛ̀ min kɔsɔ daa n mìi paraa n ganaa, mà n wɔrɔ dɔnbii la, a dɔnkɛ si n koa n li siére lɛa. Bɛa siérebaa ǹ màn kɛ lɛ koa taãnɛ, a giala mà bɛa min kɛ lɛ na á n mìi paraa n ganaa min kɔsɔ a lɛa, n nə́ n ba ǹ dɛnaa doɛ̃ wa.

¹⁷ Màn-bii koã n kɔɔ̃n lɛ-n, bɛ̀ n tá a koã giala koe. Sɛnɛ, bɛ̀ n lɛ daa á pã, a n ka kɔlɔ bɛ́ lɔn.

¹⁸ Bɛ̀ n tá sii lɛ boe, nɔ̀n da doroo li. N yɔrɔ bɔ n tɔn wo zia la.

¹⁹ Min mɛn bɛ́ n miãn tɔ baraa pii bǎã tumaa nɛ, a nə ǹ boo duriin dɔn pii. N parabaa ka boo da a la yii-n wole ne.

²⁰ Bɛ̀ min liɛ baraa wɔ ǹ di laanka ǹ dan nɛ, a yiikoonaabaa n die nimi ka bolon bɛ́ lɔn tèlò-n.

²¹ Naforo mɛn bɛ́ yii fufuu a giala kɔ waáraa, bɛa laadoo bǐɛ̃ koe biɛ̃ wa.

²² N nyan pɛ: «Man die baraa sarɛɛ ka baraa nɛ.» Sɛnɛ, n foo doa Dɛnaa Lawa ganaa, á re n kirisibiɛ.

²³ Màn zɔɔ̃ yɔrɔ paa la a kɔɔ̃n Dɛnaa Lawa ganaa wa. Koɛɛ̃n wɔ ka kilo ne á siĩn wa.

²⁴ Minbuiin nyin nə Dɛnaa Lawa gɔn. A n siɛ lɔn a na a woo ǹ bǎã dɔ̃.

²⁵ Min mɛn bɛ́ pii ka baãnaabaa nɛ mà «Dɛnaa Lawa wɔ n ka kɛ nɛ», a n lɛ kɔ we a ná a ba n taasɛ wa, a n kan koe a din ni.

²⁶ Kii sii-dɔ̃li n sii baraa-zɛnaalin lui ǹ wo sɔsɔɔ, a tɔn dɔlɔ bɔ ǹ ganaa.

²⁷ Minbuiin nɛ yiri kɛ n ká bolon bɛ́ lɔn Dɛnaa Lawa kɔ la, a n wɔlɔ fúli yǎa a gɔ́ɔ̃ nɛ.

²⁸ Sonborebaa laanka bɔlɔgoondɛnaabaa n kii tamɛɛ. Sonborebaa na a kiibaa gòã we tán.

²⁹ Pàã n nɛ tenən nyaǹ màn lɛa. Mìi ka fulii n min zizin tɔ boe

³⁰ Busulɛ n min baraa a dagòã lɛa. Mandɛ dɔ n boe la a min gɔ́ɔ̃ *yoreen kɔ.