Suusun 11 - LAWA A BOO SONBORE 2011

¹ Kiri kɔkɔrɔ tìĩ n boe-n Dɛnaa Lawa nɛ. Sɛnɛ, a foo sii n ka kiri pepere ne.

² Din gole kɔ n die ka din tìĩ bɔ nɛ. Sɛnɛ, din gisiĩ n die ka sii-doɛ̃ nɛ.

³ Peperebaa n tɛ fúlu lɛa min sonbore a zii la. Sɛnɛ bɔnɛɛbaa n min baraa dii.

⁴ Gɛ̀ pinaa, naforo là banban. Sɛnɛ, giã ǹ gɔn sonbore n min sii gɛ̀ la.

⁵ Giã ǹ gɔn sonbore n min diɛ zii pepere la. Sɛnɛ, baraabaa n min baraa daɛ.

⁶ Giã ǹ gɔn sonbore n toɛ min goã a din gɔn wìi a lɛa. Sɛnɛ min baraan foo sii n kan lɛa ǹ dinin ganaa.

⁷ Min baraan man giɛ̃ ka ǹ gɔ́ɔ̃gɔ́ɔ̃ ǹ taasiɛ nɛ. Ǹ foo bɛ́ doa-n mànan mɛnɛn ganaa, bɛn dɔn man bɔ̀n biɛ.

⁸ Min sonbore n kanbiɛ fuu ganaa. Sɛnɛ, min baraa n fuu yii a dòo.

⁹ Min baraa nə ǹ miã ziziɛ̃ ka a lɛ nɛ. Sɛnɛ, min sonboren sii-doɛ̃ nə ǹ sii sii la.

¹⁰ Min sonboren là nyantoro n nyɛnyɛɛ lɛa kiwi ganaa. Sɛnɛ, min baraan gɛ̀ n foo kɔɔ̃n lɛa ǹ ganaa.

¹¹ Màn nə miɛ kiwi li min peperen bǐɛ̃ taman yii. Sɛnɛ, sii baraa-zɛnaalin man kiwi yui ka ǹ boon ne.

¹² Min mɛnɛn bɛ́ ǹ miãn pɔpɔsɛ, yiriwɛɛ nə ǹ ganaa. Yiridɛnaa nə n lɛ tiɛ̃.

¹³ Min mɛn bɛ́ soɛ diɛ ǹ miãn la, a n sii durii dɔ pii. Sɛnɛ, min mɛn bɛ́ yiridɛnaa lɛa, a ba boo diɛ wa.

¹⁴ Bɛ̀ taasiɛ sonboren ba gána nyɛɛnaadɛnan yiri-n wa, gána lɛ a woe nyɛɛnɛ wa. Sɛnɛ, bɛ̀ a yiri-kɔlin tá mɔnaa nɛ, a n gɔ̀lɔ̀baa yii.

¹⁵ Bɛ̀ n yɔrɔ dɔn bii min la n nə n ba ǹ dɛnaa doɛ̃ wa, n wɔ n ka yirilɔlɔ kɔn nɛ. Min mɛn bɛ́ a ba n sii we bɛ miã-n wa, á re goɛ̃ yii-nyɛɛ la.

¹⁶ Lɔ siĩn nə yii gugurubaa yii. Min kaka n naforo yii.

¹⁷ Min mɛn bɛ́ bǐɛ̃ zɛnɛɛ, a n zɛnɛɛ a din ni. Sɛnɛ, min baraa n koe boe a din ganaa.

¹⁸ Min mɛnɛn bɛ́ sii baraa zɛnɛɛ, maǹ dí kooro nyɛɛ. Sàabaa ba la wa, bǐɛ̃-zɛnaalin man saraa sonbore yii.

¹⁹ Bɛ̀ min mɛn gole bǐɛ̃ zɛnaa li, a yii á re goɛ̃ koo. Min mɛn bɛ́ baa sii sii baraa kio, bɛ n die giɛ̃.

²⁰ Min mɛnɛn gɔ́ɔ̃ bɛ́ tì, ǹ tìĩ n boe-n Dɛnaa Lawa nɛ. Sɛnɛ, a n min peperen narɛ.

²¹ Sàabaa ba la wa, sii baraa zɛnaa wole wɔ n ka dɔlɔ nɛ. Sɛnɛ, min mɛnɛn bɛ́ sii sonbore zɛnɛɛ, bɛn tá re kirisibiɛ.

²² Lɔ mɛn bɛ́ siĩni sɛnɛ yiriwɛɛnaa lɛa, bɛ na á kɔnbɔ ka birii ni ǹ nə́ sana kaaran da a nyin ni.

²³ Min peperen taasiɛ n ka sii sonbore zɛnaa nɛ. Sɛnɛ, min baraan wɔ n ka foo yoo ne.

²⁴ Bɛ̀ min gɔn tá siɛ parsiini, màn nə miɛ a naforo li. Min mɛnɛn gɔn bɛ́ kaka, màn nə miɛ ǹ dɔn doobaabaa li.

²⁵ Min mɛn bɛ́ bǐɛ̃ biɛ, á re bǐɛ̃ gigiã yii. Min mɛn bɛ́ mu boro nyɛɛ a bɔ min ganaa, ǹ tá re a dɔ a mu boro nyɛɛ.

²⁶ Min mɛn bɛ́ a *belee toɛ koa nɛ, zaman tá re n liɛ li. Sɛnɛ ǹ mɛn bɛ́ soe ne á n siɛ̃, zaman tá re Lawa bǐɛ̃ bíi li.

²⁷ Sii bǐɛ̃-zɛnaali n kɔɔ̃n Lawa ganaa. Sii baraa-zɛnaali tá re koe yii.

²⁸ Min mɛnɛn foo bɛ́ doa nɛ naforo ganaa, ǹ tá re mɛnɛɛ. Sɛnɛ, min mɛnɛn bɛ́ sii sonbore zɛnɛɛ, bɛn tá re gole koe ka da bɛ́ lɔn.

²⁹ Min mɛn bɛ́ a din a kion lɔlɛkɔn, yiriwɛɛnaa nɛ. Gàãnaa á re sii-dɔ̃li a bɛ̀rɛ biɛ.

³⁰ Min pepere a nya ǹ dín man ka yiikoonaabaa ǹ da bɛ́ lɔn, Sii-dɔ̃li n yiikoonaabaa koe.

³¹ Min mɛnɛn bɛ́ sii sonbore zɛnɛɛ, maǹ a saraa yii. Min bɔnɛɛn laanka sii baraa-zɛnaalin dɔn nə kɔn bɔ ka màn mɛn nɛ, ǹ tá re bɛ yii.