Sofonii 2 - LAWA A BOO SONBORE 2011

Wusoo a wo Dɛnaa Lawa li

¹ Ka n lɛ sɔkɔn, ka kaa kun, kasɛn tɔrɔn sìi doɛ̃baã wolen kɛn lɛn,

² kiri pinaa kɛ laan bɛ̀ a n doe, lɛawaan laan bɛ̀ maǹ papaɛ̃ ka kaã bɛ́ lɔn kiɛ̃ piɛ̃ li, Dɛnaa Lawa a foo-yoo baraa kɛ laan bɛ̀ a n doe ka-a, Dɛnaa Lawa a foo-yoo pinaa kɛ laan bɛ̀ a n gisĩ ka la.

³ Kasɛn mɛnɛn bɛ́ din gisĩ wolen lɛa tán la, ka n pepere, ka ga Dɛnaa Lawa li. A din nə peperebaa mɛn koa, ka n yiri kɔ bɛ li. Ka ga din gisĩ li. Kɔntan, Dɛnaa Lawa a foo-yoo baraa lɛawaa lɛa pinaa ka á re kanbiɛ.

Lɛ̀nyɛɛn gɔn la wɔ paǹ li

⁴ Gaazaa kiwi kɛ gɔ́ɔ̃ kooro n die goɛ̃. Asikalɔn sɛ n die n bɔ̀n biɛ. Asidɔdi minin tá re n lui penleen tã. Ekrɔn kiwi kɛ sɛ n die n wurii.

⁵ Kasɛn mɛnɛn bɛ́ boe tà lɛ-a gánan nɛ, Kerɛti minin lɛa bɔ̀n nə kaa wɔ lɛa. Kiri mɛn bɛ́ Dɛnaa Lawa n die we ka ganaa, bɛ á ke: «Kanaan, Filisiti minin gána, man die n bɔ̀n biɛ, ma n minin si n la lenlen.

⁶ Ń gána paǹ mɛn bɛ́ dia-n yìsi mu la, ma á re bɛ biɛ tɔɔn buu sɔ̃ ǹ bǎã lɛa, tɔɔn-lɛduəlin kiɛ̃ ǹ bǎã lɛa, sèren kaa ǹ bǎã lɛa.»

⁷ Zudaa tɔrɔn mɛnɛn yii goã koo bǎã lɛ n die goɛ̃ bɛn wɔ lɛa. Maǹ die ǹ tɔɔn lɛduĩ walan, wasamiɛ̃nɛ, ǹ wo waa tán Asikalɔn a kionən kɛn nɛ. A giala, Dɛnaa Lawa, Zudaa tɔrɔn Lawa n die n yiri koɛ ǹ li, a wusoo doo, a bǐɛ̃ kɔ ǹ ganaa ka gɔn nyɔmiɛ̃ sonbore ne.

Lɛ̀giala gɔn la wɔ paǹ li

⁸ Má Moabu minin sɔ kɔn kɛn ma, ka Amɔnitin din koa ǹ boon kɛn nɛ. Maǹ nə́ sɔ kɔ maa zaman ganaa, ǹ nə́ ǹ dinin gána gole kɔ bɛ̀ ǹ tá maa zaman lɛ a bǎãn tɛnɛn sii ǹ la.

⁹ Bɛ lɛ nɛ, masɛ kanaa tumaa a Dɛnaa Lawa Pàãyiidɛnaa, Izirayeli a Lawa a da ǹ boo á ke: A ma toa ma yii n koo, Moabu n die n biɛ ka Sodɔmu kiwi bɛ́ lɔn, Amɔn minin kɛn man die goɛ̃ ka Gomɔɔrɔ kiwi bɛ́ lɔn, ǹ gána n die n biɛ nyan tewon lɛa, yìsi yala lɛa, ziziɛ̃-n miɛ̃ yǎa duduu. Maa zaman a min mɛnɛn yii goã koo, bɛn tá re ǹ gɔn dudui. Maa gána minin mɛnɛn yii bɛ́ koo, bɛn tá re ǹ biɛ kíɛ̃ lɛa.

¹⁰ Ǹ bɛ́ re màn mɛn yii ǹ din gole kɔ lɛ taman yii bɛ n ka kɛ lɛ nɛ. A giala, maǹ nə́ sɔ kɔ kanaa tumaa a Dɛnaa Lawa Pàãyiidɛnaa a zaman ganaa, ǹ nə́ yaa wɔ ǹ ganaa, ǹ nə́ ǹ dinin gána gole kɔ bɛ̀ ǹ tá maa zaman a bǎãn sii ǹ la.

¹¹ Dɛnaa Lawa n die kakaarɛ koe ǹ ganaa parsiini. A n die bɔ̀n diɛ ǹ dì kooron kɛn tumaa ganaa tán la. Gána mɛn tumaa wɔlɔ bɛ́ lui ni, bɛn tumaa n die n toɛ ǹ gána nɛ, ǹ nə n kuruməə tán-a a yɔrɔ-a.

Gusin a lɛ̀gɔn la wɔ paǹ li

¹² Kasɛn dɔn Etiopii minin lɛn man die ka bɔ̀n biɛ zia la!

Gɔsɛ a lɛ̀gɔn la wɔ paǹ li

¹³ Dɛnaa Lawa n die yui gɔsɛ a lɛ̀gɔn la gialaa. Á re Asiirii bɔ̀n biɛ lenlen, a Ninivu ziziɛ̃ a baa bǎã gere lɛa ka diə gole bɛ́ lɔn.

¹⁴ A n die tɔɔn waa tán-a ǹ bǎã biɛ. Tɔɔ tɔrɔ tumaa, kɔlɔn nɛ, tèlò bàanan nɛ, bɛn man die lɛ̀ wɛɛ ǹ kion a mɛnɛn mala. Bàanan lɛ á re boe ǹ fenɛtərən lɛ-a. Foo-ziziɛ̃ tá re goɛ̃ ǹ kiɛnlɛ-a, ǹ tá re ǹ bìbìn woɛ̃ ǹ zũ.

¹⁵ Ninivu n die goɛ̃ kɛnɛn lɛn, asɛ mɛn bɛ́ á goã foo kɔɔ̃nbaa la, ka là nyantoro ne, a n pii a gɔ́ɔ̃ nɛ: «Min kɔn ba ka wɔ bɛ́ lɔn wa!» Sɛnɛ, Ninivu kɛbɔlɔ baa á don siĩn duru ǹ bǎã baa. Min mɛn tumaa bɛ́ kiɛ̃ walan, maǹ puru diɛ a ganaa, ǹ nə́ n gɔn pɛsɛ̃.