Samayeli2 21 - LAWA A BOO SONBORE 2011

Bòo ka Sayulu tɔrɔn dɛ

¹ Davida a kiibaa biikoo li, bòo babaraa kɔn bɔ lɛ̀ sɔɔ kɔn kio. Bɛ gɔ́ɔ̃ nɛ, Davida nɔ̀n da Dɛnaa Lawa la, Dɛnaa Lawa tɔ́n pɛ nɛ: «Sayulu laanka a kion minin nə gɛ̀n mɛnɛn dɛ, bɛ na á daa ka kɛ nɛ. A giala, á Gabawɔ̃ minin dɛ ǹ nə́ gã.»

² Kii Gabawɔ̃ minin lɛn bii á boo da ǹ nɛ. Gabawɔ̃ minin lɛn bie Izirayeli tɔrɔn lɛa wa. Sɛnɛ, Amɔɔrɔ tɔrɔn kɛn gialakunun manɛ. Izirayeli minin lɛn man nə́ goã ǹ nə́ n lɛ kɔ ǹ la, mà ǹsɛn tá re ǹ tamaɛ, mà ǹsɛn ba re ǹ dii wa. Sayulu sɛ na á n tã bɛ lɛ yii la, á goã giɛ ǹ li ǹ dii. A giala, a na á goã yɔ boe Parsiini, Izirayeli minin lɛn laanka Zudaa minin lɛn sii a wo nyɛɛnɛ a lɛa.

³ Davida tɔ́n nɔ̀n da Gabawɔ̃ minin lɛn la: «Ma doamaa-n ma wàa zɛnaa ka nɛ? Basaã mɛn nə n kɔ ka nɛ, ma doamaa nɛ ma wàa mɛn zɛnaa ma bɛ nya nɛ, màn mɛn bɛ́ toɛ, ka barka da Dɛnaa Lawa a zaman lɛ ganaa?»

⁴ Gabawɔ̃ minin lɛn ná a lɛ si: «Sii mɛn bɛ́ wɔsɛn bii ka Sayulu laanka a kion minin ni, wɔrɔ hinlaa sana bie bɛ yɔrɔ boe wa. Wɔ doamaa dɔ bie, wɔ Izirayeli min dɛ wɔ sii kɛ lɛ yɔrɔ bɔ-n wa.» Davida tɔ́n pɛ: «Bɛ̀ ka dinin nə́ pɛ mà màn mɛn, masɛ á re bɛ zɛnɛɛ ka nɛ.»

⁵ Ǹ nə́ pɛ kii ni: «Sayulu na á goã giɛ li a wɔsɛn papaã. A na á goã a taasiɛ nɛ, a wɔsɛn dɛ, wɔa min kɔn ná a goɛ̃ Izirayeli gána lɛ paǹ kɔn nɛ wa.

⁶ Ka a din lɛ tɔrɔ min sɔbaa kɔ wɔsɛn la. Wɔsɛn tá re bɛn lɛn bɔlɔ diɛ biɛ nɛ Dɛnaa Lawa yɔrɔ-a, Gibeya kiwi. Dɛnaa Lawa Sayulu mɛn bɔ á koa kii lɛa, bɛ na á goã giã-n walan.» Kii nə́ ǹ lɛ si mà asɛ á re bɛa min sɔbaa lɛ koe ǹ la.

⁷ Sɛnɛ, kii Mefibosɛti toa walan. Sayulu a nɛ Zonaatan a nɛgiĩ ni. Davida liɛ mɛn wɔ ka Dɛnaa Lawa tɔ nɛ, mà giaáraabaa n die goɛ̃ asɛ laanka Sayulu a nɛgiĩ Zonaatan bii, bɛ lɛ a lɛa nɛ, á Mefibosɛti toa walan.

⁸ Sɛnɛ, kii lɛ Armonii laanka Mefibosɛti kũ. Bɛa min paa kɛ n Ayia a nɛlɔ Rispaa kɛa nɛgiĩn lɛa, á ǹ yɛ Sayulu la. Sayulu a nɛlɔ Mikaali kɛ dɔ nɛgiĩ sooro mɛn yɛ Barzilayii a nɛgiĩ Adriyeli ganaa boe Meholaa kiwi, á bɛn dɔn kũ.

⁹ Davida bɛn lɛn kɔ Gabawɔ̃ minin lɛn la, ǹ nə́ ǹ bɔlɔ da biɛ nɛ kele la, Dɛnaa Lawa yɔrɔ-a. Bɛa min sɔbaa lɛ tumaa gã kun. Ǹ dɛ biikoo lɛ na á kɔnpɛ ka *ɔrzi kurii giala kɔ biikoo ne.

¹⁰ Ayia a nɛlɔ Rispaa mɔnaa kəkə saa á naa tán gɛ̀fu la. Á giã walan, a saa ɔrzi kurii waáraa ganaa, yǎa la wusoo á kaa, á daa nɛnyaanan lɛn gere yaa tán. Bɛ̀ lɛ̀ waa, a toɛ bàanan tá miɛ̃ ǹ gere la wa. Tèlò-n, a na á goã don màn babaraan lui ǹ gere ganaa.

¹¹ Ayia a nɛlɔ Rispaa kɛ lɛ á goã Sayulu a lɔ lɛa, bɛ sii mɛn zɛnaa, ǹ ná a boo da Davida nɛ.

¹² Davida yoo, á woo Sayulu laanka a nɛgiĩ Zonaatan wen si Zabɛsi kiwi a pàãdɛnan kɛn la, Galaati gána nɛ. Sonbore, Filisiti minin bɛ́ ǹ nə́ Sayulu dɛ Gilboa ǹ mɛn pinaa, maǹ ná a laanka Zonaatan gere lɔɔ lon bii-a Bɛti-Seyan kiwi. Zabɛsi minin lɛn dɔn man nə́ woo ǹ geren lɛn koã walan.

¹³ Davida Sayulu laanka a nɛgiĩ Zonaatan wen lɛn waa Zabɛsi á woo ǹ ne. Ǹ min sɔbaa mɛn dɔ dɛ, ǹ nə́ bɛn dɔn wen waa,

¹⁴ ǹ nə́ ǹ kaa kun ka Sayulu laanka a nɛgiĩ Zonaatan wɔn nɛ, ǹ nə́ ǹ bĩ Sayulu ǹ di Kiisi a yala-n Selaa kiwi, Bɛnzamɛn tɔrɔn kɛn gána nɛ. Kii lɛ dí mɛn tumaa pɛ, ǹ ná a tumaa nya. Bɛ lɛ kio ne, Lawa tɔn nə n yɔrɔ bǐɛ̃ da gána lɛ la.

Zian mɛnɛn nə n baa Filisiti minin ganaa

¹⁵ Zia kɔsɔ wusoo á yoo Filisiti minin lɛn laanka Izirayeli minin lɛn bii doo. Davida laanka a zia-baalin nə́ woo Filisiti minin lɛn gialaa. Bǎã goon ne, Davida yɛ mà asɛ nɔmaa.

¹⁶ Yiisibii-Benɔbu mɛn bɛ́ Harafaa tɔrɔn kɛn min goon lɛa, a na á goã bɛ gɔ́ɔ̃ nɛ, mà a Davida dɛ. Gɔya sà dii na á goã a ganaa ka sɛmiɛ̃ nɛ. Bɛa sɛmiɛ̃ lɛ nàn na á n zɛnaa ka zan nɛ, a gugurubaa á doe kilo sɔɔ.

¹⁷ Sɛnɛ, Seruzaa a nɛgiĩ Abisayii daa n dɔ Davida lɛ, á Filisiti min lɛ dɛ á gã. Bɛ kio, Davida a zia-baalin nə́ n liɛ nɛ ǹ nə́ pɛ nɛ mà a ba woe ziabaa ǹ bǎã-n kun ka ǹsɛn nɛ doo, n Izirayeli minin yaa kiɛ̃ goɛ̃ kii wɛɛ̃ nɛ ǹ kɔn pinaa wa.

¹⁸ Bɛ dɔ kio, ǹ nə́ zia kɔsɔ baa Filisiti minin lɛn ganaa Gɔbu kiwi. Sibekayii na á Usaa tɔrɔ Saafu dɛ bɛa zia lɛ gòã wuu li. Saafu lɛ n Harafaa tɔrɔ min goon lɛa.

¹⁹ Bɛ kio, zia kɔsɔ wusoo á n baa Filisiti minin lɛn ganaa doo Gɔbu kiwi. Yaare mɛn bɛ́ boe Bɛtlehɛmu, bɛa nɛgiĩ Ɛlkanan Gaatin Goliati dɛ ka sɛmiɛ̃ nɛ. A sɛmiɛ̃ lɛ a gɔn na á goã ka kurunbiriin ka kɔ̀rɔ gɔn bɛ́ lɔn.

²⁰ Zia kɔsɔ dɔ́ yɛ Gaati kiwi. Giĩ sasa gegere goon goã walan, zawaa lɛa. Gòon sɔsɔrɔ na a gɔnɔn ganaa, sɔsɔrɔ na a gòãn ganaa. Ǹ tumaa a kaa kun nə fuəwensii. A dɔ na á goã Harafaa tɔrɔ lɛa.

²¹ Bɛa giĩ lɛ yoo á da Izirayeli minin lɛn ganaa. Davida ǹ gologiĩ Simeya a nɛgiĩ Zonaatan bɛ dɛ.

²² Bɛa min sii kɛ lɛ na á goã Gaati min Harafaa tɔrɔn lɛa. Davida laanka a zia-baalin lɛn man nə́ bɛn lɛn dɛ.