Samayeli2 2 - LAWA A BOO SONBORE 2011

Davida a koa kii lɛa boo Zudaa gána mìi la

¹ Bɛa siin lɛn kiɛ̃ kio, Davida nɔ̀n da Dɛnaa Lawa la: «Ma á boe la ma wo Zudaa kiwin lɛn goon ne?» Dɛnaa Lawa ná a lɛ si: «Woo.» Davida wusoo á nɔ̀n da la kɛnɛn: «Ma doamaa nɛ ma wo maa?» Dɛnaa Lawa ná a lɛ si: «Wo Ebrɔn.»

² Davida woo walan kun ka a lɔ min paa kɛ nɛ: Ayinoamu mɛn bɛ́ boe Zizereyɛli, ka Abigayili mɛn bɛ́ á goã Karmɛli min Naabali a lɔ lɛa.

³ Davida ná a tá-kun wolen dɔn kũ á woo ǹ ne, didie laanka a kion minin ni, ǹ nə́ woo giã Ebrɔn lɛkoro-a ǹ kiwin ni.

⁴ Zudaa minin nə́ daa, ǹ nə́ nyɔɔ kaa Davida mìi-n walan, ǹ nə́ bɔ ǹ nə́ koa kii lɛa Zudaa gána mìi la. Ǹ nə́ daa pɛ Davida nɛ, mà Zabɛɛsi kiwi mɛn bɛ́ Galaati gána nɛ, mà bɛ lɛ a minin man nə́ Sayulu gere bĩ.

⁵ Davida minin dia Zabɛɛsi kiwi, Galaati gána nɛ, á pɛ ǹ nɛ: «Ka bǐɛ̃ mɛn zɛnaa kaa dɛnaagiĩ Sayulu ni, ka lɛ kɔ ka a gere dɔ bĩ, Dɛnaa Lawa die a barka da ka ganaa bɛa lɛa.

⁶ Kanna kəni, Dɛnaa Lawa die a bǐɛ̃ zɛnaa ka-n miɛ̃ duduu. Ka bǐɛ̃ mɛn zɛnaa ke, masɛ dɔ á re bɛa bǐɛ̃ lɛ miã zɛnɛɛ ka nɛ.

⁷ Kanna kəni, ka n gù we yii, ka n foo taã. Kaa dɛnaagiĩ Sayulu lɛ gã sɛn. Sɛnɛ, ka dɔ̃ mà Zudaa gána minin man nə́ masɛ bɔ, ǹ nə́ ma koa ǹ kii lɛa.»

Isbosɛti a Izirayeli gána a kii baa

⁸ Nɛɛrɛ a nɛgiĩ Abnɛɛrɛ mɛn goã Sayulu a zia-baalin goledɛnaa lɛa, bɛ na á goã á Sayulu a nɛgiĩ Isbosɛti kũ á woo ne Mahanayimu kiwi.

⁹ Á koa kii lɛa walan, Galaati gána mìi la, Asɛɛrɛ tɔrɔn nɛ, Zizireyeli kiwi ni, Efrayimu tɔrɔn nɛ, Bɛnzamɛn tɔrɔn nɛ, Izirayeli minin tumaa mìi la.

¹⁰ Sayulu a nɛgiĩ Isbosɛti bɛ́ Izirayeli gána a kii biɛ, bɛ̀ a lɛ̀ pusi ni. A na á kii dɔ baa lɛ̀ paa. Zudaa tɔrɔ minin dininsɔɔ̃nɔn man nə́ goã Davida kio.

¹¹ Davida biikoo mɛn zɛnaa Ebrɔn, Zudaa tɔrɔn lɛn kii lɛa, lɛ̀ sɔbaa ka mui sɔrɔ nɛ.

Zudaa minin laanka Izirayeli minin nə zia mɛn da Gabawɔ̃

¹² Nɛɛrɛ a nɛgiĩ Abnɛɛrɛ laanka Sayulu a nɛgiĩ Isbosɛti a dí-nyalin nə́ soo Mahanayimu ǹ nə́ Gabawɔ̃ zii saa.

¹³ Seruzaa a nɛgiĩ Zoabu laanka Davida a minin lɛn dɔn nə́ soo ǹ nə́ zii saa, ǹ nə́ woo kaa kɔn lɛ Gabawɔ̃ tà lɛ-a. Kɛn nə́ giã a paǹ kɛ li, kɛn dɔn nə́ giã a paǹ kɔsɔ li.

¹⁴ Abnɛɛrɛ tɔ́n pɛ Zoabu ni: «N tɔntɔraan lɛn laanka masɛ wɔn lɛn nə yoo ǹ kɔn kũ wɔ yɔrɔ-a.» Zoabu ná a lɛ si mà ǹ yoo le!

¹⁵ Ǹ nə́ yoo ǹ nə́ n zɔ̃ ǹ nə́ dɔ. Bɛnzamɛn tɔrɔ Sayulu a nɛgiĩ Isbosɛti wɔn man min fulupaa, Davida dɔ wɔn man min fulupaa.

¹⁶ Didie nə́ ǹ miã kũ a mìi ganaa, á gɔya sa dere a gànà nɛ, ǹ dinin tumaa bɔ ǹ nə́ kaa kun. Bɛ lɛ nɛ, ǹ nə́ bɛa bǎã lɛ bii mà "gɔya san wuru". Bɛa bǎã lɛ n Gabawɔ̃ kiwi.

¹⁷ Zia lɛ wɔ̃ bɛa pinaa lɛ-n taãn-taãnɛ. Davida laanka a minin nə́ boo Abnɛɛrɛ laanka Izirayeli minin lɛn la.

¹⁸ Seruzaa a nɛgiĩ min sɔɔ lɛ goã walan: Zoabu ni, Abisayii ni ka Azayeli ni. Azayeli gòã yii na á goã fuu ka don a woree wɔ bɛ́ lɔn.

¹⁹ Azayeli bɔ á mɛ Abnɛɛrɛ kio á loo, á kɔ lɛ miɛ̃, a kanaa á woo gusin wa, a kanaa á woo gɔsɛ wa.

²⁰ Abnɛɛrɛ nə́ n yii bɔyaa á ga a kio á pɛ: «N din lɛ n Azayeli lɛa?» Á ná a lɛ si mà asɛ din ni.

²¹ Abnɛɛrɛ tɔ́n pɛ nɛ: «Kanaa n wo gusin hinlaa gɔsɛ n tɔntɔraan kɛn goon kũ, n na a ziabaa ǹ mànan si la.» Sɛnɛ, Azayeli lɛ kɔ á kanaa á n bɔ a kio wa.

²² Abnɛɛrɛ wusoo á pɛ Azayeli ni doo: «Kanaa, n nə n bɔ ma kio, n masɛ a loo lɛ da. Hinlaa ma n giɛ li masɛ nə n dɛ ma n da tán. Bɛ̀ má bɛ zɛnaa, ma bɛ́ ma a re boe la man mìi saa lon n dɔɔ̃n Zoabu yɔrɔ-a doo wa.»

²³ Sɛnɛ, Azayeli lɛ kɔ á kanaa wa. Bɛ lɛ nɛ, Abnɛɛrɛ ná a sɛmiɛ̃ giala dere a nɔ̀ nɛ, á fɔ̃ á soo a kio. Azayeli bɔ á mɛnaa tán a din bǎã nɛ á gã. Azayeli mɛnaa bǎã mɛn nɛ á gã, bɛ̀ min woo min dɔ walan, a n golee.

²⁴ Zoabu laanka Abisayii yoo ǹ nə́ Abnɛɛrɛ kio loo. Ǹ bɛ́ doe Amma kele la, bɛ̀ wasa n miɛ̃. Amma kele lɛ n Giyia a lɛ̀giala gɔn la, Gabawɔ̃ don zii la.

²⁵ Bɛnzamɛn tɔrɔn lɛn nə́ kaa Abnɛɛrɛ kio, ǹ nə́ n baa zia-baali kuru goon lɛa, ǹ nə́ woo golee kele goon mìi ni.

²⁶ Abnɛɛrɛ tɔn nə n lɛ dɛ Zoabu ganaa á pɛ nɛ: «Gɔya sa n die goɛ̃ gɛ̀ dii miɛ?̃ N ba doɛ̃ mà kɛa giala-nyɔmiɛ̃ á die yɔrɔ-kɔsiɛ biɛ wa? Biĩ ni kəni, n tá re pii n minin lɛn manɛ, mà ǹ nə ǹ dɔɔ̃nɔn lɛn loo lɛ da?»

²⁷ Zoabu tɔ́n pɛ: «Ká Lawa yiikoonaa kɛ tɔ nɛ, bɛ̀ n bie ń boo da wa, bɛ̀ minin kɛn ba ǹ dɔɔ̃nɔn kɛn loo lɛ diɛ wa, yǎa biɛ̃ baayɛlɛ.»

²⁸ Zoabu bɛn pɛ. Zaman lɛ tumaa golee. Ǹ nə́ Izirayeli minin lɛn loo lɛ da. Ǹ zia baa kɔn ganaa doo wa.

²⁹ Abnɛɛrɛ laanka a minin lɛn nə́ tɔ wɔ Zurdɛ̃ a nyankɔrɔ basa kɛ nɛ bɛa tèlò tumu lɛ gɔ́ɔ̃ nɛ. Ǹ nə́ Zurdɛ̃ tà kuru, ǹ nə́ Bitrɔn bǎã kɛ tumaa wɔsɔ kɔn, ǹ nə́ dɔ Mahanayimu kiwi.

³⁰ Zoabu bɛ́ á Abnɛɛrɛ a loo lɛ da, á zaman lɛ tumaa sɔkɔn. Ǹ bɛ́ ǹ nə́ ǹ tɔn bii, min fulu manangɔrɔ dinsɔɔ̃ na a goã a tan Davida a minin lɛn bii wa, ka Azayeli ni.

³¹ Davida a minin lɛn sɛn man nə́ goã ǹ nə́ min biɛsɔɔ ka pɔsɔrɔ dɛ Bɛnzamɛn tɔrɔn laanka Abnɛɛrɛ a minin lɛn bii.

³² Ǹ nə́ Azayeli gere saa. Ǹ nə ǹ di bĩ yala mɛn nɛ Bɛtlehɛmu kiwi, ǹ nə́ woo a dɔ bĩ walan. Zoabu laanka a minin lɛn nə́ tɔ wɔ tèlò tumu gɔ́ɔ̃ nɛ, lɛ̀ laan bɛ̀ a n wɛɛ, bɛ̀ maǹ Ebrɔn kiwi.