Samayeli2 16 - LAWA A BOO SONBORE 2011

Davida laanka Siibaa

¹ Davida bɛ́ á kele mìi lɛ na boɛɛn nɛ, Mefibosɛti a kion dí-nyali Siibaa daa n da lɛ ka dundun màn paa nɛ, guĩ gigiã nə́ ǹ dɔ̀ɔ̃ nɛ: Buuru mìi biɛpaa (200) nɛ, rezɛ̃ laa san paabiɛ nɛ, gɔ́rɔ tɔrɔ kɔn a nɛ paabiɛ nɛ, ka duvɛ̃ bɔnaa goon ne.

² Kii nɔ̀n da Siibaa la: «Ma n die kɛ tumaa biɛ lɔn?» Siibaa ná a lɛ si: «Dundunun kɛn, bɛn manə n din a kion minin wɔn lɛa, ka tá re dii ǹ la. Buuru kɛ laanka gɔ́rɔ nɛ ke, bɛ á die tɔntɔraan lɛn màn-bii biɛ. Duvɛ̃ ke, min mɛnɛn bɛ́ re nɔmiɛ̃ don lɛ nɛ, bɛn tá re bɛ mii.»

³ Kii tɔ́n nɔ̀n da la: «N dɛnaagiĩ Sayulu a nɔ̀ɔn Mefibosɛti lɛ á maa?» Siibaa kii lɛ si: «Á ke, a na á giã Zeruzalɛmu. A giala, a n taasɛ mà pelo, mà Izirayeli minin lɛn tá re asɛ digole Sayulu a kiibaa lɛ koe asɛ la.»

⁴ Kii lɛ tɔ́n pɛ Siibaa nɛ: «Màn mɛn tumaa goã Mefibosɛti wɔ lɛa lɛlɛ, n din wɔ n ka bɛ-n kanna.» Siibaa tɔ́n pɛ: «Bɛa kaa tán nə́ ke. Masɛ a dɛnaagiĩ kii ganaa, bǐɛ̃ kɔ masɛ-a kɛnɛn miɛ̃.»

Simeyii a lɛn baraa bíi Davida li

⁵ Kii Davida bɛ́ doe Bawurimu kiwi, bɛ̀ giĩ goon dɔ n soe kiwi lɛ nɛ. Sayulu a kion minin kɛn tanlɛ min ni. A tɔ n Simeyii, Geraa a nɛgiĩ ni. A bɛ́ soe, a na á goã lɛn baraa bíi.

⁶ A na á goã kɔlɔ kaã boe kii Davida laanka a dí-nyalin lɛn tumaa ganaa. A da yaa, zaman lɛ tumaa tan, ka zia-baali foo taãnaan lɛn tumaa nɛ, kɛn ná a gusin, kɛn ná a gɔsɛ.

⁷ Simeyii goã màn mɛn diɛ a lɛn babaraa bíi lɛ gɔ́ɔ̃ nɛ, bɛ n ka kɛ nɛ: «Woo n nə n bɔ kànaa, woo n nə n bɔ kànaa, min babaraa, gɛ̀-dɛle.

⁸ Ń Sayulu a kion minin mɛnɛn dɛ, ń giã a kiibaa la, Dɛnaa Lawa n bɛ lɛ a dɔlɔ boe n ganaa. Dɛnaa Lawa na á kiibaa lɛ si n la, á kɔ n nɛgiĩ Abusalɔn la. N din nə́ ke nɔmaa gɔ́ɔ̃-n kəni. A giala, gɛ̀-dɛle nə n ne.»

⁹ Seruzaa a nɛgiĩ Abisayii tɔ́n pɛ kii ni: «Maa dɛnaagiĩ kii ganaa, wàa na á baa n tá toɛ, gin kooro kɛ n lɛn baraa bíi n li? Toa ma kiɛ̃ ma wo a mìi kuru.»

¹⁰ Sɛnɛ kii pɛ nɛ: «Seruzaa a nɛnyaanan lɛn, kaa wàa mɛn sii n maa sii ni? Bɛ̀ a tá lɛn baraa bíi, a bíi. Bɛ̀ Dɛnaa Lawa na á pɛ nɛ mà a wo lɛn baraa bíi Davida li, die n boe la a pɛ nɛ mà wàa na á baa á kɛ zɛnaa?»

¹¹ Davida pɛ Abisayii laanka a dí-nyalin tumaa nɛ: «Bɛ̀ maa nɛgiĩ, masɛ din a yɛ ǹ nɛ tá giɛ li a ma nyin bɔ, sanparɛ ka Bɛnzamɛn tɔrɔ min kɔsɔ kɛ nɛ? Bɛ̀ Dɛnaa Lawa na á pɛ nɛ, mà a lɛn baraa lɛ bíi, ka toa a bíi.

¹² Kɔntan, Dɛnaa Lawa á re giɛ maa nɔmaa kɛ ganaa, a wusoo a yii-nyɛɛ kɔ ma la, Simeyii a lɛn babaraa bíi kɛ lɛ bǎã nɛ.»

¹³ Davida laanka a minin lɛn nə́ kiɛ̃ ka ǹ zii ni. Bɛa biikoo li, Simeyii na á goã koe kele lɛ wàã lɛ, n diɛ ǹ para li, bɛ̀ á n lɛn baraa bíi, kɔlɔ kaã boe Davida ganaa, á n tii goɛ sui lon.

¹⁴ Kii laanka a tá-kun wolen lɛn tumaa bɛ́ doe ǹ woo ǹ bǎã nɛ, bɛ̀ maǹ nɔmaa nɛ. Ǹ nə́ giã tán walan ǹ nə́ n susu.

Abusalɔn sii mɛn zɛnaa Zeruzalɛmu

¹⁵ Abusalɔn laanka Izirayeli zaman lɛ tumaa wɔ Zeruzalɛmu. Ayitofɛli dɔ́ goã kun ni.

¹⁶ Davida a giaáraagiĩ, Arkaan giĩ Usayii woo á dɔ Abusalɔn li, á pɛ nɛ: «Kii ganaa, n Lawa die a n gɔn belebɔ a nɛ! Lawa die a n gɔn belebɔ a nɛ!»

¹⁷ Abusalɔn tɔ́n pɛ Usayii ni: «N dɔ a tá-kun sii n ka kɛ nɛ, ń zɛnaa n giaára lɛ nɛ? Wàa na á baa n wo kun ka n giaáragiĩ lɛ-n wa?»

¹⁸ Usayii Abusalɔn lɛ si: «Haayii! Dɛnaa Lawa laanka zaman kɛ tumaa, ka Izirayeli minin kɛn tumaa bɛ́ ǹ nə́ min mɛn bɔ, masɛ n giɛ li ma goã bɛa dɛnaa wɔ lɛa, masɛ n giɛ li ma giã kun ka bɛa dɛnaa nɛ.

¹⁹ Bɛ tumaa woo a n tiləə, masɛ n die dí nyɛɛ die kɔsɔ nɛ, bɛ̀ maa giaáragiĩ a nɛgiĩ kɛ ná a bie wa. Ma bɛ́ má dí nya n di-n lɛlɛ lɔn, man die dí nyɛɛ n dɔ-n miɛ̃ sisia.»

²⁰ Bɛ kio, Abusalɔn pɛ Ayitofɛli ni: «Ka dinin nə kɔn yɛ. Wɔsɛn doamaa bɛ́ nɛ wɔ màn mɛn zɛnaa, ka bɛ pɛ.»

²¹ Ayitofɛli tɔ́n pɛ Abusalɔn nɛ: «N di na a lɔ kɔsɔn mɛnɛn toa piɛ, mà ǹ ga kion lɛ walan, wo waa kun ka bɛn lɛn nɛ. Bɛ̀ ń bɛ zɛnaa, Izirayeli minin tumaa á re doɛ̃ mà a na á n din tìĩ bɔ ǹ di nyin ni, màn tá re miɛ̃ n kiodɛnan lɛn tumaa dɔ a foo taãbaa li.»

²² Ǹ nə́ mɔnaa kion goon doa Abusalɔn wɔ lɛa kala-n. Abusalɔn woo n dɔ bɛ lɛ nɛ, á giã kun ka ǹ di a lɔ kɔsɔn lɛn nɛ, Izirayeli minin tumaa yii ni.

²³ Ayitofɛli goã doro ǹ boon mɛnɛn koe bɛa biikoo li, minin màn nə́ goã ǹ sii ka Lawa dinmaa na á ǹ pɛ. Ayitofɛli a minin doro ǹ boon lɛn tumaa na á goã miɛ̃. Ta a nə ǹ koe Davida la, ta a nə n koe Abusalɔn la, a din goon ne.