Samayeli2 14 - LAWA A BOO SONBORE 2011

Abusalɔn a wusoo a da Zeruzalɛmu

¹ Seruzaa a nɛgiĩ Zoabu yɛ mà kii Davida a taasiɛ nə́ n bɔyaa Abusalɔn wɔ paǹ li.

² Á tɔ́n minin dia woe giɛ Tekoa kiwi a lɔ sii-dɔ̃li kɛ li. Lɔ lɛ bɛ́ á daa, á pɛ nɛ: «Bǐɛ̃ kɔ, n nə n din baa ká gɛ̀ na á gã n la, n gɛ̀ koa ǹ mɔnaan wɔ. N baran nyɔɔ giĩ kɔɔ̃n lɔ n din ganaa wa. N din baa ka lɔ mɛn nə́ ke min a gɛ̀ wuu pii haalɛ bibi.

³ Bɛ kio, wo dɔ kii lɛ li, n boo da nɛ kɛnɛn.» A doamaa bɛ́ nɛ a boo mɛn da, Zoabu bɛ da á wɔ a lɛ-n.

⁴ Tekoan lɔ lɛ woo dɔ kii li. Á na á kaa tán a giulun a guguru kɔ ǹ sii lɛa. Á pɛ kii ni: «Kii ganaa, n dɔ ma lɛ.»

⁵ Kii tɔ́n nɔ̀n da la: «Ma n giɛ wàa li?» Á kii lɛ si: – Lɔ giɔɔrɔ din taãn nɛ ka masɛ nɛ, ma zuũ gã.

⁶ Nɛgiĩ paa na á goã ma lon. Ǹ kɔn pinaa, ǹ dinin paanan zia da don, min kɔn yɛ, á ǹ waa kɔn wa, goon nə́ ǹ miã dɛ á gã.

⁷ Bɛ lɛ n ke tanlɛ minin lɛn tumaa tá ma gialaa. Ǹ nə́ pɛ ma nɛ: «Wɔ dɔɔ̃n-dɛle lɛ kɔ. Wɔ dɔɔ̃n lɛ, á ná a nyin bɔ, wɔ n giɛ li, wɔ a dɔ dɛ bɛ lɛ taman yii, wɔ a kíɛ̃-saali dɔ dɛ gɔrɔ.» Goon mɛn goã, bɛ̀ ǹ nə́ bɛ dɔ dɛ, maǹ die ma zuũ tɔ laanka a tɔrɔ papaɛ̃ ǹ bɔ kanaa.

⁸ Kii tɔ́n pɛ lɔ lɛ nɛ: «Wo piɛ, ma á re dí koe maa dí-nyalin la n wɔ paǹ li.»

⁹ Tekoan lɔ lɛ wusoo á pɛ kii ni: «Maa dɛnaagiĩ kii ganaa, sii kɛ lɛ a dɔlɔ die a ma din laanka ma dikion minin kũ. Zɛ̀rɛ ba kii-a a kiibaa kɛ gɔ́ɔ̃-n wa.»

¹⁰ Kii tɔ́n pɛ nɛ: «Min mɛn bɛ́ re wusii a yoo n gialaa kɛ kio, a kũ n da kɔ ma la, a re wusii a ti ǹ miã ganaa biɛ̃ wa.»

¹¹ Lɔ lɛ pɛ doo: «Kii ganaa, Dɛnaa Lawa mɛn bɛ́ n Lawa lɛa, ma nə n nyankoe n ga bɛ ganaa, màn mɛn bɛ́ toɛ gɛ̀ dòo-bɔle lɛ baran maa nɛgiĩ kɛ dɛ, a wusoo a màn da maa bɔ̀n li wa.» Kii tɔ́n pɛ: «Ká Lawa yiikoonaa kɛ tɔ nɛ, n nɛgiĩ lɛ mìi ka goon ba re papaɛ̃ wa.»

¹² Lɔ lɛ pɛ doo: «Maa dɛnaagiĩ kii, bǐɛ̃ kɔ, n toa ma boo goon da n nɛ doo.» Kii ná a lɛ si: «A da.»

¹³ Lɔ lɛ tɔ́n pɛ nɛ: – Wàa na á baa, n tá bɛ miã sii kɛa taasiɛ we Lawa a zaman wɔ paǹ li. N boo mɛn da sisia ke, a n goon ka ma nə n din a sã pii. A giala, n min mɛn na ń bɔ n din ganaa, ń wusoo ń lɛ dia la wa.

¹⁴ Minbuiin nɛ tumaa doamaa nɛ a gã sɛn. Bɛ̀ minbuiin nɛ dɔ́ gã, a n goon ka mu na á kaa tán, a ba n goɛ wa. Sɛnɛ, Abusalɔn wɔ kɛ bɛ́ a bie gɛ̀ lɛa wa. Á bɛ́ á min mɛn na á bɔ n ganaa, Lawa n giɛ li, bɛ nyan goã kanaa wa.

¹⁵ Maa dɛnaagiĩ kii, bɛ̀ ń yia má daa bɛa boo kɛ lɛ pɛ n nɛ, zaman lɛ na á nyɛ́ɛ da ma ganaa. Bɛ lɛ n ke má tɔ́n pɛ: «Máa re woe boo diɛ kii ni, kɔntan, á re koe maa boo lɛ.

¹⁶ Min mɛn goã mà a tá maa nɛ laanka ma din dii, a tá wɔ boe Lawa a zaman kɛ bii, n din kii nə ń lɛ kɔ, mà n tá re wɔsɛn sii bɛ la.»

¹⁷ Bɛ lɛ n ke má tɔ́n pɛ ma din gɔ́ɔ̃ nɛ: «Lawa die a toa maa dɛnaagiĩ kii a boo lɛ yii-nyɛɛ kɔ ma la. A giala, maa dɛnaagiĩ n goon ka Lawa a lon a dia dí-a wole bɛ́ lɔn.» A tá sii bǐɛ̃ laanka a baraa a bɔkɔnlɛ doɛ̃. Dɛnaa Lawa mɛn bɛ́ a Lawa lɛa, Bɛ die a n dɔ lɛ.

¹⁸ Kii ná a lɛ si á pɛ nɛ: «Bɛ̀ masɛ nɔ̀n da n la, n nyan toa n sii kɔn duru ma la wa dɛ!» Lɔ lɛ tɔ́n pɛ nɛ: «Maa dɛnaagiĩ kii, yǎa n din bǐɛ̃ kɔ n boo da.»

¹⁹ Kii tɔ́n pɛ nɛ: «Zoabu din bie n diɛ sii kɛ lɛ tumaa a zɛnaa ganaa wa le?» Lɔ lɛ ná a lɛ si: «Maa dɛnaagiĩ kii, ma laanka Lawa nɛ, boo kɔn din ba n wɔ la kuri wa. Sonbore ne. N din a dí-nyali Zoabu na á masɛ dia. Ma doamaa bɛ́ nɛ ma boo mɛn da, a din na a bɛ tumaa pɛ masɛ nɛ.

²⁰ N dí-nyali Zoabu n giɛ li, a sii lɛ bɔyaa ka yɔrɔ kɔsɔ nɛ, bɛ lɛ na á toa á kɛ zɛnaa. Sɛnɛ, maa dɛnaagiĩ bɛ́ sii doɛ̃ ka lon a dia dí-a wole bɛ́ lɔn, sii mɛn tumaa bɛ́ n zɛnɛɛ tán la, n tá bɛ tumaa doɛ̃.»

²¹ Bɛ kio, kii tɔ́n pɛ Zoabu ni: «N bɛ́ giɛ màn mɛn li, á yɔrɔ bɔ. Wo tɔntɔraagiĩ Abusalɔn lɛ kũ n da-n kəni.»

²² Zoabu na á kaa tán, kii lɛ a guguru kɔ ǹ sii lɛa, á barka da nɛ. Zoabu tɔ́n pɛ: «Masɛ nə n dí-nyali lɛa. Má dɔ̃ pelo, máa maa sii á kɔɔ̃nɛ n ganaa. A giala, ma màn mɛn pɛ maa dɛnaagiĩ kii ni, á lɛ kɔ á bɛ zɛnaa.»

²³ Zoabu yoo á zii saa, á woo Gesuuru kiwi, á Abusalɔn kũ á daa nɛ Zeruzalɛmu.

²⁴ Kii tɔ́n pɛ: «Abusalɔn, wo piɛ, n nyan toa n da ma yɔrɔ-a wa.» Abusalɔn woo n dɔ a kion, a soo kii yɔrɔ-a doo wa.

²⁵ Izirayeli gána tumaa nɛ, min kɔn goã siĩni ka Abusalɔn bɛ́ lɔn wa, ǹ goã min kɔn laakalɛɛ ka Abusalɔn bɛ́ lɔn wa. A saa a gòã lasa ganaa a wo a baãbii yaa, wɔ̀lɔ̀ kɔn goã a ganaa wa.

²⁶ Bɛ̀ ń yaa n mìi koɛ̃, lɛ̀ na á bɔ. Bɛa biikoo li, a mìi ka lɛn guguru a ganaa á la yii ni. Bɛ lɛ n ke bɛ̀ a kɔɔ̃. A mìi ka lɛ a gugurubaa na á goã kii a màn zɔɔ̃ ǹ màn kɛa kilo paa.

²⁷ Abusalɔn na á nɛgiĩ sɔɔ yɛ, ka nɛlɔ goon ne. Nɛlɔ lɛ sɛ tɔ n Tamaara, a yɔrɔ goã siĩni á là yii ni.

²⁸ Abusalɔn giã Zeruzalɛmu lɛ̀ paa, a ná a soe kii yɔrɔ-a wa.

²⁹ Bɛ kio, á Zoabu nyankɔ mà a n diɛ kii li, sɛnɛ, Zoabu lɛ kɔ á daa a piɛ wa. A paabaa ǹ wɔ doo, Abusalɔn lɛ dia la, sɛnɛ, a lɛ kɔ á daa wa.

³⁰ Abusalɔn tɔ́n pɛ a dí-nyalin manɛ: «Táa ka yii tá Zoabu a wuru kɛ ganaa kunu masɛ wɔ li, *ɔrzi tá a nɛ. Ka wo tɛ da a ganaa.» Abusalɔn a dí-nyalin nə́ woo tɛ da wuru lɛ ganaa.

³¹ Bɛ kio, Zoabu yoo á woo dɔ Abusalɔn li, á nɔ̀n da la: «Wàa na á baa n dí-nyalin nə́ tɛ da maa wuru kɛ ganaa?»

³² Abusalɔn tɔ́n pɛ Zoabu ni: «A giala, má goã má lɛ dia n la máa n da kànaa, màn mɛn bɛ́ toɛ, ma n dia woe pii kii ni máa wàa na á baa má bɔ Gesuuru má daa piɛ. Bɛ̀ man tɔn walan, bɛ̀ á soɛ ma ganaa. Kanna, man giɛ li ma kii lɛ yɛ. Bɛ̀ á daa yaa má sii kɔn la, a ma dɛ.»

³³ Zoabu woo dɔ kii li, a ná a yɔrɔ pɛ nɛ. Kii lɛ dia Abusalɔn la, Abusalɔn bɛ́ á dɔ a li, á kaa tán a giulun, a guguru kɔ ǹ sii lɛa. Kii dɔ́ nə́ n sɔɔ a nɛ.