Samayeli2 13 - LAWA A BOO SONBORE 2011

Amnɔn laanka Tamaara

¹ Sii mɛn nə n zɛnaa bɛ kio bɛ á ke: Davida a nɛgiĩ Abusalɔn ǹ miãnɛn goon goã a tɔ n Tamaara. Á goã siĩni taãn-taãnɛ. Amnɔn mɛn dɔ bɛ́ Davida lɛ a nɛgiĩ lɛa, bɛ yii bɔ li.

² Tamaara sii na á Amnɔn kũ, yǎa á busu baa a ganaa. A giala, bɛa biikoo li, bɛ̀ Tamaara tɔn giĩ dɔ̃ wa. Bɛ lɛ nɛ, Amnɔn yɛ dɔn mà á kaka, asɛ boo la a sii kɔn zɛnaa nɛ.

³ Amnɔn a giaára goon goã a tɔ n Zonaadaabu. Davida n gologiĩ Simeya a nɛgiĩ ni. Zonaadaabu na á goã min lɛa, a yiri n wooro parsiini.

⁴ Bɛ́ tɔ́n nɔ̀n da Amnɔn la: «Wàa na á baa, n din kii a nɛ n pɛrɛ kɛnɛn, lɛawaa woo lɛawaa li? N ba a mìi pii masɛ-n wa?» Amnɔn tɔ́n pɛ nɛ: «Ma dɔɔ̃ngiĩ Abusalɔn ǹ miãnɛn Tamaara sii n ma ganaa. Ma yii na á bɔ li.»

⁵ Zonaadaabu tɔ́n pɛ nɛ: – Wo waa tán n piì la, n nə n din baa busulə lɛa. Bɛ̀ n di daa n yii kɔ n li, n die n pɛ-n kɛnɛn: «Bǐɛ̃ kɔ n toa, ma dɔɔ̃nlɔ Tamaara da màn-bii kɔ ma la. A toa a da màn-bii lɛ zɛnaa ma din yɔrɔ-a ma yɛ, a din saa ka a gɔn nɛ, a da kɔ ma la ma bii.»

⁶ Amnɔn waa tán á n din baa busulə lɛa. Kii Davida woo n yii kɔ a ganaa. Amnɔn tɔ́n pɛ nɛ: «Bǐɛ̃ kɔ n toa ma dɔɔ̃nlɔ Tamaara takɔlɔ màn paa da ma din yii ni, a din saa ka a gɔn nɛ a da kɔ ma la, ma sɔ̃.»

⁷ Davida min dia sumu gɔ́ɔ̃ nɛ, mà ǹ wo pɛ Tamaara nɛ mà a wo ǹ dɔɔ̃ngiĩ Amnɔn li, a màn-bii zɛnaa a kɔ la.

⁸ Tamaara woo ǹ dɔɔ̃ngiĩ Amnɔn li, á woo yaa waa-n tán. Tamaara wùsu saa á yia, á takɔlɔ munu a din yii ni, á zɛnaa.

⁹ Bɛ kio, á tàan lɛ saa á takɔlɔ lɛ binyəə á bɔ á nɛ, á da tán a giulun. Sɛnɛ, á n piã a sɔ̃ wa. Amnɔn bɛ́ re màn mɛn pii mà ǹ min tumaa loo, ǹ soo ǹ nə n bɔ asɛ li. Min mɛn tumaa goã a li, ǹ tumaa soo.

¹⁰ Amnɔn tɔ́n pɛ Tamaara nɛ: «Màn-bii lɛ saa n da kɔ ma la kion gɔ́ɔ̃ nɛ, ma á re bii.» Tamaara takɔlɔ mɛn lɛ da, á saa á woo kɔ ǹ dɔɔ̃ngiĩ Amnɔn la kion.

¹¹ Tamaara bɛ́ á dia la mà a si a sɔ̃, yǎa a Tamaara kũ. Á pɛ Tamaara nɛ: «Ma dɔɔ̃nlɔ Tamaara, da giã kun ka masɛ nɛ.»

¹² Tamaara ná a lɛ si: «Dɔɔ̃ngiĩ, haayii, n baran pàã nyaa ma-n wa. A giala, kɛ miã ba n zɛnɛɛ Izirayeli gána-n wa. N nyan toa n bɛa sìi da ǹ sii kɛ zɛnaa wa.

¹³ Masɛ n die yui man dɔ maa ka bɛa sìi kɛ nɛ. Maǹ die giɛ n din kɛ dɔ ganaa min kɔrɔ lɛa Izirayeli gána nɛ. Sabara baa n boo da ka kii ni. Ma á waa-n la, máa a ba re n piɛ̃, mà a ba ma koe n la lɔ lɛa wa.»

¹⁴ Sɛnɛ, Amnɔn lɛ kɔ á n too kɔ a lon wa. Á kũ ka pàã nɛ, á giã kun ni.

¹⁵ Bɛ kio, Tamaara tìĩ bɔ Amnɔn nyin ni ka kusikusi. Sonbore, a tìĩ bɔ a nyin ni lɔn, bɛ́ gole kɔ á la kɔn-narɛɛ kɛ nɛ á yɛ a wɔ paǹ li lɛlɛ. Amnɔn tɔ́n pɛ nɛ mà a yoo a n tá.

¹⁶ Tamaara ná a lɛ si: Ma a woe wa. Bɛ̀ ń ma loo dinin, bɛ á baraa á la sii kɛ nɛ ń zɛnaa masɛ nɛ. Sɛnɛ, a lɛ kɔ á n too kɔ a lon wa.

¹⁷ Nɛginin mɛn bɛ́ dí nyɛɛ nɛ, á lɛ dia bɛ la á pɛ nɛ: «Kɛ loo n da kanaa n bɔ ma yɔrɔ-a, n kiɛnlɛ sɔɔ.»

¹⁸ Dí-nyali lɛ loo á soo, á kiɛnlɛ lɛ kũ á sɔɔ a kio. Dɔnkɛ sɛsia sasa kɔn na á goã Tamaara ganaa. A giala, kiin nɛlɔn mɛnɛn bɛ́ ǹ tɔn giĩ dɔ̃ bɔrɔ wa, bɛn man nə́ goã bɛa dɔnkɛ lɛ tɔrɔ we.

¹⁹ Tamaara ton goa á kaa a din mìi ni, á ná a mɔnaa sɛsia lɛ kũ á toɛ̃, á n gɔnɔn kaa a mìi ni, á woo bɛ̀ a tá n lɛ dii ka gɛ̀ na á gã la.

²⁰ Ǹ gologiĩ Abusalɔn tɔ́n nɔ̀n da la: «N dɔɔ̃ngiĩ Amnɔn lɛ giã kunun n ni? Dɔɔ̃nlɔ, n lɛ tã bɔrɔ, a giala, n din dɔɔ̃ngiĩ ni. N nyan kɛ din koa n gɔ́ɔ̃ nɛ sii lɛa wa.» Tamaara nɔmaa á giã a dinsɔɔ̃ ǹ gologiĩ Abusalɔn a kion, a foo n ziziɛ̃ nɛ, min ba n mɔrɛ a ganaa wa.

²¹ Kii Davida bɛa sii kɛ lɛ tumaa boo ma, a foo yoo parsiini.

²² Abusalɔn boo goon da ǹ dɔɔ̃n Amnɔn nɛ doo wa. A pɛ mà á siĩn wa, a pɛ mà á baraa wa. A giala, Abusalɔn na á goã biɛ zɔ́ɔ ǹ miãnɛn Tamaara lɛ a ziziɛ̃ taman yii.

Amnɔn a gɛ̀ laanka Abusalɔn a baa-si

²³ Lɛ̀ paa bɛ kio, ǹ kɔn pinaa ǹ bɛ́ Abusalɔn a sèren ka kuri Baali-Asɔɔrɔ kiwi, kunu Efrayimu ganaa, Abusalɔn kii a nɛgiĩn lɛn tumaa bíi.

²⁴ Abusalɔn woo kii Davida li á pɛ nɛ: «Dɛnaagiĩ, á ke, minin tá maa sèren ka kuri. Ma nə n nyankoe, n bǐɛ̃ kɔ, n laanka n dí-nyalin nə wo ma da zii walan.»

²⁵ Kii ná a lɛ si: «Haayii, a siĩni wɔ tumaa woo wa. Wɔ ba li, a guĩ baa n mìi-n wa.» Abusalɔn nə́ n laa a ganaa, sɛnɛ, a lɛ kɔ mà á woe wa. Bɛ kio, á barka da Abusalɔn ganaa.

²⁶ Abusalɔn tɔ́n pɛ: «Bɛ̀ n din ba re doe wa, lɛ sɛ kɔ ma dɔɔ̃ngiĩ Amnɔn wo wɔ da zii.» Kii tɔ́n pɛ nɛ: «A woo mìi n ka wàa nɛ?»

²⁷ Abusalɔn bɛ́ á n laa a ganaa, kii tɔ́n toa Amnɔn laanka a nɛnyaan gialakunun lɛn tumaa woo kun ni.

²⁸ Abusalɔn pɛ a dí-nyalin manɛ: Ka n yiri koa Amnɔn li parsiini. Bɛ̀ yɔ da foo kɔɔ̃nbaa ganaa ǹ mɛn waáraa, ma á re pii ka nɛ: «Ka Amnɔn dɛ.» Ka baran nyɛ́ɛ baa wa, ka dɛ a gã, ma din tá golee ka a sii ni. Ka n gù we yii, ka n foo taã.

²⁹ Abusalɔn màn mɛn pɛ a dí-nyalin lɛn manɛ, maǹ nə́ bɛ lɛ zɛnaa: «Ǹ nə́ Amnɔn dɛ.» Bɛ nə n zɛnaa lɔn, kii a nɛgiĩn lɛn tumaa yoo, didie dii a dundun sùi la, ǹ nə́ baa si.

³⁰ Ǹ bɛ́ tɔn zii la, a boo dɔ Davida li mà Abusalɔn na á kii a nɛgiĩn lɛn tumaa dɛ, mà ǹ goon din goã wa.

³¹ Kii yoo a ná a mɔnaan tɔtoɛ̃, á na á waa tán foo ziziɛ̃ gɔn. A dí-nyalin tumaa goã golee-n walan, ǹ mɔnaan nə́ tɔtoɛ̃ nɛ.

³² Davida ǹ golo Simeya a nɛgiĩ Zonaadaabu tɔ́n boo saa á pɛ: «Dɛnaagiĩ ganaa, n nyan taasɛ, mà maǹ nə́ n nɛgiĩ tɔntɔraan lɛn tumaa dɛ wa. Haayii, Amnɔn dinsɔɔ̃ na á gã. A kɔnpɛ ka Abusalɔn din a da ǹ boo ne, ǹ miãnɛn lɛ a ziziɛ̃ biikoo li, a na á goã, mà yǎa asɛ sii kɛ lɛ zɛnɛɛ.

³³ Maa dɛnaagiĩ kii baran taasɛ, mà a nɛnyaanan lɛn tumaa na á gã wa. Haayii, Amnɔn dinsɔɔ̃ na á gã.»

³⁴ Abusalɔn nə́ n gòã da baa nɛ. Ǹ tɔntɔraa mɛn koa mà a bǎã lɛduə̃, bɛ nə́ n yii saa á ga. Zii mɛn bɛ́ a kio, dia-n woe kele kɛ la, bɛ̀ zaman gigiã á ke boe walan die.

³⁵ Zonaadaabu tɔ́n pɛ kii ni: «Kii ganaa, n nɛgiĩn lɛn nə́ ke die. Ma pɛ n nɛ lɔn, a tumaa na á n zɛnaa miɛ̃.»

³⁶ Zonaadaabu á boo diɛ nyɛɛ kɛnɛn, bɛ̀ kii a nɛgiĩn lɛn bɛ́ ǹ nə́ dɔ. Ǹ nə́ kaa wuu-n kɔsɛ kɔsɛ. Kii laanka a dí-nyalin lɛn dɔn nə́ wuu pɛ parsiini.

^37-38 Abusalɔn na á goã á baa si á woo Amiwudu a nɛgiĩ Gesuurun kii Talmayii li, á giã walan yǎa lɛ̀ sɔɔ. Bɛa biikoo lɛ tumaa gɔ́ɔ̃ nɛ, Davida na á goã a nɛgiĩ Amnɔn lɛ a gɛ̀ wuu pii baraabaraa.

³⁹ Sɛnɛ, kii Davida foo bɛ́ á daa á basã Amnɔn a gɛ̀ lɛ kio, á n susu a wo Abusalɔn gialaa wa.