Samayeli2 1 - LAWA A BOO SONBORE 2011

Davida Sayulu a gɛ̀ boo ma ka yɔrɔ mɛn nɛ

¹ Sayulu a gɛ̀ kio ne, Davida nə́ n bɔyaa á daa giã Siklagi kiwi lɛawaa paa. Bɛ á zɛnɛɛ, bɛ̀ á Amalɛki tɔrɔn kɛn dɛ.

² A lɛawaa sɔɔbaa ǹ wɔ pinaa, bɛ̀ giĩ goon nə́ ke boe Sayulu li, ziabaa ǹ bǎã nɛ die. A mɔnaan tumaa na á goã pɔpɔsiɛ nɛ, a mìi yii n tii lɛa. A bɛ́ á daa á dɔ Davida li, á na á kaa tán, á n mìi zuməə tán.

³ Davida tɔ́n nɔ̀n da la: «Ma n boe maa?» Giĩ lɛ ná a lɛ si: «Man má baa si Izirayeli minin ziabaa ǹ bǎã nɛ.»

⁴ Davida wusoo á nɔ̀n da la: «Sii lɛ na á n baa lɔn? Bǐɛ̃ kɔ, n na a yɔrɔ pɛ ma nɛ.» Giĩ lɛ tɔ́n pɛ: «Zia-baalin lɛn nə́ baa da zaman lɛ gòã li. Zaman lɛ din a gigiã gã. Sayulu laanka a nɛgiĩ Zonaatan dɔ din gã.»

⁵ Tɔntɔraagiĩ mɛn da boo lɛ pɛ, Davida wusoo á nɔ̀n da bɛ la kɛnɛn: «Ma n siɛ lɔn ń tá doɛ̃ mà Sayulu gã, ka a nɛgiĩ Zonaatan dɔ nɛ?»

⁶ Tɔntɔraagiĩ lɛ tɔ́n pɛ nɛ: – Sii lɛ bɛ́ n zɛnɛɛ, bɛ̀ masɛ n Gilboa kele la. Ma bɛ́ giɛ, bɛ̀ Sayulu á ke walan n din we a sɛmiɛ̃ lɛ, zɔ́ɔn ziabaa ǹ wotoron laanka sùidɛnan nə́ giɛ li ǹ nə́ doe a ganaa.

⁷ A bɛ́ á n yɔrɔ bɔyaa á masɛ yɛ, a na á lɛ dia ma la. Má a lɛ si máa ma á ke!

⁸ Á nɔ̀n da ma la: «Die-n ka nsɛ nɛ?» Má tɔ́n pɛ nɛ máa man Amalɛki tɔrɔ lɛa.

⁹ Bɛ kio, á pɛ ma-n kɛnɛn: «Bǐɛ̃ kɔ, n zɔ̃ n nə n mɔrɔ, n golee n ma nyin bɔ. A giala, yii-tii n ma gialaa, haalɛ ta á daa yaa maa fɔ̀foã tumaa tá ma-n bɔrɔ.»

¹⁰ Bɛ lɛ nɛ, ma golee a li má dɛ. A giala, ma á doɛ̃ má a re liɛ a mɛnaa kɛ kio wa. Kii bafolo mɛn goã a mìi ganaa, zan mɛn dɔ goã a gɔn ganaa, ma bɛn waa má daa ǹ kɔ maa dɛnaagiĩ la kànaa.

¹¹ Foo ziziɛ̃ gɔn, Davida ná a mɔnaan kũ á ǹ tɔtoɛ̃. A tá-kun wolen tumaa zɛnaa miɛ̃.

¹² Ǹ nə́ gɛ̀ lɛ koa. Ǹ nə́ wuu pɛ, ǹ nə́ n lɛ sɔɔ yǎa wasa mɛ, Sayulu laanka a nɛgiĩ Zonaatan taman yii, Dɛnaa Lawa a zaman kɛ taman yii, ǹ mɛnɛn tumaa bɛ́ Izirayeli minin lɛa, ǹ nə́ gã zia la.

¹³ Tɔntɔraagiĩ mɛn da boo lɛ pɛ Davida nɛ, Davida wusoo á nɔ̀n da la: «Ma n boe maa?» Á ná a lɛ si mà asɛ n Amalɛkin giĩ goon a nɛgiĩ lɛa, asɛ di n gùli lɛa gána kɛ nɛ.

¹⁴ Davida tɔ́n pɛ nɛ: «Kɛ na á saa lɔn? Dɛnaa Lawa kii mɛn bɔ á koa, wàa na á baa, n nyɛ́ɛ baa bɛa dɛ-n wa?»

¹⁵ Bɛ kio, Davida lɛ dia a dí-nyali goon la, á pɛ nɛ: «N zɔ̃ n dɔ, n dɛ.» Bɛ́ Amalɛki tɔrɔ lɛ dɛ á gã.

¹⁶ Ǹ bɛ́ dii, Davida na á goã pii ni: – N gɛ̀ lɛ a koen nə goã n din mìi ni. A giala, n din lɛ na á n da sii ni. A na á pɛ kɛnɛn: «Dɛnaa Lawa kii mɛn bɔ á koa, ma din ni má dɛ.»

Davida wuu mɛn pɛ Sayulu laanka Zonaatan a gɛ̀ li

¹⁷ Davida tɔ́n loe kɛ lɔ Sayulu laanka a nɛgiĩ Zonaatan li.

¹⁸ Sa koa ǹ loe ne, á pɛ mà ǹ Zudaa tɔrɔn daraa a ganaa. Ǹ bɛ́ sɛ́wɔ mɛn bíi "min sonbore a sɛ́wɔ", bɛa loe lɛ á kiɛ̃-n walan kɛnɛn:

¹⁹ E, Izirayeli, n tɔ lɛ papaã n kelen la, giĩ foo taãnaan lɛn nə́ bɔ ǹ nə́ kaa zia la.

²⁰ Ka nyan kɛ laakalaa Gaati kiwi wa, ka nyan kɛ boo da Asikalɔn ziin kɛn la wa. Bɛ bie wa, Filisiti nɛnɛn kɛn tá re n nyɛnyɛɛ. Soroman kɛn nɛnɛn tá re paparɛ foo kɔɔ̃nbaa gɔn.

²¹ Gilboa kelen lɛn, pele nyan kɔ ka la doo wa, la nyan kaa ka la doo wa. Wuru nyan yɛ walan doo, ǹ màn lɛ bibinaa bɔ a-n wa. A giala, walan lɛ nɛ, zia-baalin goóro *gɔ̀ baa. Sayulu a goóro ke, nyɔɔ goã n loe a ganaa wa,

²² yǎa zɔ́ɔn mà, yǎa zia-baalin kɛn nyɔɔ. Zonaatan a sa goã n nyɛnɛɛ min ni wa, Sayulu a gɔya sa kɛ goã n bɔyɛɛ gere wa.

²³ Sayulu laanka Zonaatan sii goã kɔɔ̃n minin ganaa parsiini. Yiikoonaabaa gɔ́ɔ̃ nɛ, gɛ̀ gɔ́ɔ̃ nɛ, ǹ nə n na kɔn wa. Ǹ yii goã fuu ǹ nə́ la giogialatã-an manɛ, ǹ nə́ goã kaka ǹ nə́ la yàran manɛ.

²⁴ Izirayeli nɛnɛn lɛn, ka wuu pɛ Sayulu li. A din na á goã mɔnaa tã sonbore giɔ̀mɔ kaka-an we ka ganaa. A din na á nyaǹ bɔ ǹ mànan kaa kaa dɔnkɛn paǹ tumaa ganaa, sana lɛa.

²⁵ Giĩ foo taãnaan lɛn nə́ mɛnaa zia bii, Zonaatan gere á tán kele la.

²⁶ Ma dɔɔ̃n Zonaatan, ma foo ziziɛ̃maa-n parsiini n din a lɛa. N sii goã kaka ma ganaa á la yii ni. N giaárabaa lɛ na á goã kaãbaa diɛ ma ganaa. Á goã siĩni á la giĩ a lɔ narɛɛ nɛ.

²⁷ Giĩ foo taãnaan lɛn nə́ kaa, ziabaa ǹ mànan lɛn nə́ ziziɛ̃ kəni!