Samayeli1 9 - LAWA A BOO SONBORE 2011

Sayulu laanka Samayeli a kɔn yɛ

¹ Giĩ goon na á goã, a tɔ n Kiisi, Bɛnzamɛn tɔrɔ nɛ, pàã goã a lon, a yii dɔ goã guguru. Ǹ di tɔ n Abiyeli. Serɔrɔ a nɛ n ka Abiyeli ni, Bekorati wɔ n ka Serɔrɔ nɛ, Afia dɔ wɔ n ka Bekorati ni. Afia dɔ n Bɛnzamɛn tɔrɔ goon a nɛ lɛa.

² Kiisi a nɛ goon goã a tan nɛginin lɛa, a tɔ n Sayulu, a bɔ ǹ gɔn nə́ goã siĩni. Izirayeli minin lɛn kɔn nə goã á dɔ li wa. A sasabaa goã á la zaman lɛ tumaa wɔ nɛ. Ǹ tumaa na á goã kuĩ a kɔkɔrɔ nɛ.

³ Sayulu ǹ di Kiisi a dundun daanan man nə́ goã ǹ nə́ papaã. Á tɔ́n pɛ a nɛ Sayulu ni: «Bǐɛ̃ kɔ, n dí-nyalin lɛn goon kũ, n da kun n ni, n wo ga dundun daanan lɛn li.»

⁴ Ǹ nə́ n da, ǹ nə́ bɔ Efrayimu kele la ǹ nə́ bɔ Salisaa gána nɛ, ǹ nə ǹ yɛ wa. Ǹ nə́ bɔ Saalimu gána nɛ, ǹ nə n na màn nɛ wa. Ǹ nə́ bɔ Bɛnzamɛn gána nɛ, ǹ nə ǹ yɛ wa.

⁵ Ǹ bɛ́ ǹ nə́ dɔ Sufu gána nɛ, dí-nyali mɛn goã Sayulu diɛ zii, Sayulu pɛ bɛ nɛ: «Daa wɔ wo piɛ, bɛ bie wa, n maa a díi yaa kiɛ̃ dundun daanan lɛn dinin toɛ walan, a n gɔ́ɔ̃ bii ka wɔsɛn nɛ.»

⁶ Sɛnɛ dí-nyali lɛ pɛ nɛ: «Á ke, giĩ goon tan kɛa kiwi kɛ nɛ, Lawa a boo gii-dali lɛa, a tɔ bɔ. Boo woo boo á n diɛ, a sàabiɛ wa. Daa wɔ wo bɛ li kanna kɔntan, wɔ doa bɛ́ nɛ wɔ zii mɛn saa, á die bɛ nyɛɛ wɔsɛn manɛ.»

⁷ Sayulu pɛ a dí-nyali lɛ nɛ: «Sɛnɛ, bɛ̀ wɔ́ woo, wɔ n die wàa koe Lawa a boo gii-dali lɛ la? A giala, màn-bii ba wɔa boroon ne doo wa, wɔa bǐɛ̃baa ǹ màn kɔn banban, wɔ́ n koe Lawa a boo gii-dali lɛ la wa. Wɔa wàa na a tan?»

⁸ Dí-nyali lɛ wusoo á boo saa á pɛ Sayulu ni: «Á ke, wɔrɔ boɛɛn tá ma gɔn, masɛ n die bɛ lɛ koe Lawa a boo gii-dali lɛ la, màn mɛn bɛ́ toɛ, wɔ doa bɛ́ nɛ wɔ zii mɛn saa, a bɛ nyaa wɔ nɛ.»

⁹ Lɛlɛ, Izirayeli gána nɛ, bɛ̀ ǹ tá re woe nɔ̀n diɛ Lawa la ka sii ni, maǹ nɛn bɛ̀ ǹ pɛ, mà ǹ daa ǹsɛn nə n ta sii-nyaali li. A giala, ǹ bɛ́ min mɛn bii pelo, Lawa a boo gii-dali, maǹ nə́ goã bɛ bii sii-nyaali.

¹⁰ Sayulu pɛ a dí-nyali lɛ nɛ: «N boo kɔɔ̃n kɔ. Daa kəni wɔ wo a li.» Lawa a boo gii-dali lɛ bɛ́ kiwi mɛn-a, ǹ nə́ tɔ́n kiɛ̃ ǹ nə́ woo walan.

¹¹ Ǹ bɛ́ a gialaa dii kiwi lɛ a tenten la, ǹ nə́ kaa nɛnɛn lɛ soe woe mu sii. Ǹ nə́ nɔ̀n da ǹ la: «Sii-nyaali lɛ n kànaa ya?»

¹² Nɛnɛn lɛn nə́ ǹ lɛ si: «Hiĩ. A tá ka nyɛɛnɛ. Ka n nanaa kɛnɛn kɛnɛn, á daa kiwi gɔ́ɔ̃-n pelo, a giala wúlu bɔ tan zaman lɛ wɔ lɛa wúlu bɔ ǹ tenten la.

¹³ Ka bɛ́ re doe kiwi lɛ gɔ́ɔ̃-n lɔn gɔrɔ ka tá re woe yiɛ bɛ̀ a ná a tɔn wo màn bii wúlu bɔ ǹ bǎã-n bɔrɔ wa. Zaman lɛ ba màn bii a kio wa, a giala, a din doamaa nɛ a barka da *wúlu màn lɛ ganaa. Bɛ kio, ǹ min mɛnɛn bíi a tɔ-a, bɛn nə tɔn màn bii. Ka wo kɛnɛn kɛnɛn ka tá re yii pelo lɛn.»

¹⁴ Ǹ bɛ́ doe kiwi lɛ gɔ́ɔ̃ nɛ, ǹ nə́ n da Samayeli lɛ bɛ̀ a n woe *wúlu bɔ ǹ bǎã nɛ.

¹⁵ A da yaa, Dɛnaa Lawa Sayulu a daa toa ka lɛawaa goon ne, á n gɔn waa Samayeli ni, á pɛ nɛ:

¹⁶ «Biɛ̃ kɛnɛn yirəə, ma á die giĩ goon diɛ n li, a n Bɛnzamɛn tɔrɔ lɛa. N die n nyɔɔ lɔ a ganaa, màn mɛn bɛ́ toɛ, a maa zaman Izirayeli lɛ a kii baa, a ǹ si Filisiti minin lɛn la. A giala, má maa zaman lɛ a nɔmaa yɛ, ǹ lɛ-dɛ dɔ ma ganaa.»

¹⁷ Samayeli bɛ́ á Sayulu yɛ, Dɛnaa Lawa pɛ nɛ: «Ma goã má giĩ mɛn boo da n nɛ, ma á re goɛ̃ pàã la maa zaman lɛ mìi la, a din lɛ n ke.»

¹⁸ Sayulu nə́ n zɔ̃ á dɔ Samayeli li kiwi lɛ a kiɛnlɛ-a, á pɛ nɛ: «Bǐɛ̃ kɔ, n sii-nyaali kɛa piɛ bǎã nyaa masɛ nɛ.»

¹⁹ Samayeli Sayulu lɛ si: «Masɛ din nə sii-nyaali lɛ lɛa. Wo ma nyɛɛnɛ wúlu bɔ ǹ bǎã nɛ. Ka á re màn bii kun ka masɛ-n pelo. Biɛ̃ baayɛlɛ, màn mɛn din tumaa bɛ́ n li nɔ̀n-diɛ lɛa, ma á re bɛ giala pii n ni, ma tɔn zii kɔ n la.

²⁰ N dundun daanan mɛnɛn nə papaã, a lɛawaa sɔɔ n pelo n baran ǹ gɔ́ɔ̃ bii ka bɛn nɛ doo wa: ǹ nə́ yɛ dɔn. Màn mɛn din tumaa bɛ́ n gɔn màn lɛa Izirayeli gána nɛ, bɛn man die wɔn lɛa? Ǹ bie n din laanka n di a sumu minin tumaa wɔn lɛa wa?»

²¹ Sayulu ná a lɛ si: «Bɛnzamɛn tɔrɔ mɛn bɛ́ Izirayeli a tɔrɔ kiɛɛrɛn lɛn goon lɛa, táa masɛ n bɛa Bɛnzamɛn tɔrɔ kɛ lɛ a min goon lɛa. Masɛ a tanlɛ bie Bɛnzamɛn tɔrɔn lɛn tanlɛ tumaa giala tiɛ̃ wa? Sɛnɛ wàa na á baa ń tá boo kɛ miã diɛ masɛ nɛ?»

²² Samayeli Sayulu laanka a dí-nyali lɛ kũ, á wɔ ǹ nɛ kion. Ǹ lɛ dia min mɛnɛn la a tɔ-a, á doe min pɔsɔɔ kɛ miã. Samayeli bǎã kɔ Sayulu laanka a dí-nyali lɛ la tán bɛa minin lɛn nyɛɛnɛ.

²³ Samayeli pɛ màn-bii zɛnaali lɛ nɛ: «Ma bɛ́ má siĩ mɛn kɔ n la, da nɛ. Kɛ lɛ má pɛ n nɛ máa n koa.»

²⁴ Màn-bii zɛnaali lɛ siĩ lɛ bɔ, a gisi laanka a mui gòã nɛ. Á daa da tán Sayulu giulun. Samayeli tɔ́n nə n toa: «Siĩ mɛn nə n koa á ke. A sɔ̃, a giala, ma bɛ́ zaman lɛ bii n tɔ-a biikoo mɛn li, man má koa n din ni.» Sayulu laanka Samayeli màn bíi kun bɛa pinaa kɛ lɛ nɛ.

²⁵ Bɛ kio, ǹ nə́ n toa wúlu bɔ ǹ bǎã nɛ, ǹ nə́ daa kiwi gɔ́ɔ̃ nɛ. Samayeli sùn baa kun ka Sayulu ni, kala-n.

²⁶ Ǹ nə́ yoo ka lɛlɛɛ nɛ. Lɛ̀ din waa lɔn, Samayeli lɛ dia Sayulu la kala-n, á pɛ nɛ: «Yoo ma zii kɔ n la, n woo.» Sayulu yoo, a din laanka Samayeli ni ǹ dinin min paa soo zii la kun.

²⁷ Ǹ bɛ́ ǹ nə́ dɔ kiwi lɛ a lɛ-doa ganaa, Samayeli pɛ Sayulu ni mà a pɛ a dí-nyali lɛ nɛ, mà a kiɛ̃ ǹsɛn nyɛɛnɛ. Dí-nyali lɛ kiɛ̃ ǹ nyɛɛnɛ, Samayeli mà Sayulu dinmaa golee sisia, mà Lawa boo mɛn da, asɛ bɛ pɛ nɛ.