Samayeli1 8 - LAWA A BOO SONBORE 2011

Izirayeli minin man giɛ kii li

¹ Samayeli bɛ́ á zizi kɔ ǹ mɛn waáraa, a ná a nɛgiĩn baa sii yɔrɔ-bolen lɛa Izirayeli gána nɛ.

² A nɛ goledɛnaa lɛ tɔ n Zowɛli, bɛ kiodɛnaa tɔ n Abiya. Maǹ nə́ goã sii yɔrɔ bolen lɛa Bɛɛr-Sebaa kiwi.

³ Sɛnɛ a nɛgiĩn lɛn na a tɔ wɔ ǹ gɔn saa wa. Bii kooro na á goã kɔɔ̃nɛ ǹ ganaa. Ǹ nə́ goã lɛ koe lɛ pii ǹ mànan sii, ǹ goã sii yɔrɔ boe a peperebaa li wa.

⁴ Izirayeli min golen tumaa nə́ n lɛ sɔkɔn ǹ nə́ daa Samayeli li Ramaa kiwi.

⁵ Ǹ nə́ pɛ nɛ: «Á ke ń zizi kɔ n nɛgiĩn lɛn bɛ́ ǹ ba n tɔ wɔ ǹ gɔn siɛ wa, kii kɔ wɔ la, a wɔsɛn sii yɔrɔ bɔ ka tɔrɔ gialakun kɛn tumaa wɔ bɛ́ lɔn.»

⁶ Ǹ dinin pɛ kɛ lɛ, mà Samayeli kii kɔ ǹsɛn la, a ǹsɛn sii yɔrɔ bɔ, bɛ kɔɔ̃n kɔ Samayeli ganaa wa. Samayeli tɔ́n Dɛnaa Lawa nyankɔ.

⁷ Dɛnaa Lawa pɛ Samayeli ni: «Zaman lɛ bɛ́ re boo mɛn din tumaa diɛ, n too kɔ a ganaa, a giala, nsɛ Samayeli bie ǹ tá n piɛ̃-n wa, masɛ din ni. Ǹ ba li masɛ goã ǹ mìi la doo wa.

⁸ Ǹ lɛ mui sii ni. Masɛ din ni má ǹ waa má ǹ bɔ Ezipti gána nɛ. A kũ bɛa biikoo lɛ ganaa, a da kaa pelo lɛ, ǹ nə́ masɛ toa walan, ǹ nə́ dí nyɛɛ lawa kɔsɔn manɛ. Ǹ sii mɛn zɛnaa masɛ nɛ, a din lɛ n ke ǹ tá zɛnɛɛ n dɔ nɛ.

⁹ Kanna kəni, n too kɔ ǹ lon, sɛnɛ kii mɛn lɛ bɛ́ re giɛ̃ ǹ mìi la, a saa lɛlɛ, n bɛa pàã zɛnaa ǹ gɔn pɛ ǹ nɛ ka a fubaa nɛ.»

¹⁰ Zaman mɛn lɛ goã giɛ kii li, Samayeli Dɛnaa Lawa a boon lɛn tumaa pɛ bɛn nɛ.

¹¹ Á pɛ: «Kii mɛn bɛ́ re goɛ̃ ka mìi la, a n die a pàã zɛnɛɛ yɔrɔ kɛ la: a tá re kaa nɛgiĩn biɛ sɔraasin lɛa, a ǹ kaa ziabaa ǹ wotoron laanka sùin la, ǹ baa si a wotoro nyɛɛnɛ.

¹² A tá re ǹ tɛnɛn kiɛ min duu goon mìi la, a ǹ tɛnɛn kaa min posooro mìi la, a tá re ǹ tɛnɛn kiɛ a buu-kɔsiɛ ganaa, a ǹ tɛnɛn kaa a kaa-piɛ dí nyɛɛ ganaa, a ǹ tɛnɛn kaa a ziabaa ǹ mànan laanka a wotoron mànan zɛnaa ganaa.

¹³ A tá re kaa nɛlɔn tɛnɛn biɛ nyɔɔ gìĩ kɔɔ̃n-zɛnaalin lɛa, a ǹ tɛnɛn baa màn-bii-zɛnaalin lɛa, a gialakunun baa buruu-dalin lɛa.

¹⁴ A tá re kaa wurun sii ka kaa *rezɛ̃ da laanka kaa *olivie da sonboren ne, a ǹ kɔ a dí-nyalin la.

¹⁵ Ka bɛ́ re màn mɛn yii kaa wurun ni, kaa rezɛ̃ sɔlɛɛn nɛ, a tá re bɛn fùfùbaa ǹ wɔ sii, a kɔ a sumu dí-nyalin laanka a dí-nyali kɔsɔn la.

¹⁶ A tá re kaa dí-nyali sonboren sii ka kaa min ten sonboren laanka kaa dundun sonboren ne, a ǹ kaa a dí ganaa.

¹⁷ A tá re kaa tɔɔn fùfùbaa ǹ wɔ boe. Bɛ kio, ka dininmaan tá re a bɛ̀rɛn biɛ.

¹⁸ Bɛa pinaa kɛ lɛ nɛ, ka dinin bɛ́ re kii mɛn boe, ka tá re ka lɛn lɔlɛkɔn Lawa ganaa bɛa kii lɛ taman yii. Sɛnɛ Dɛnaa Lawa ba re ka lɛ sii bɛa pinaa kɛ lɛ-n wa.»

¹⁹ Sɛnɛ zaman lɛ nə́ piã, ǹ Samayeli bɔlɔ si wa. Ǹ nə́ pɛ: «Haayii! Kii n die goɛ̃ wɔsɛn lon.

²⁰ Wɔsɛn dɔn tá re ǹ biɛ ka tɔrɔn tumaa bɛ́ lɔn. Wɔa kii lɛ tá re wɔa sii yɔrɔ boe, a tá re wɔ nyɛɛnaan boe a wɔa zian baa.»

²¹ Samayeli nə́ n too kɔ zaman lɛ a boon tumaa ganaa, á wusoo á pɛ Dɛnaa Lawa nɛ.

²² Dɛnaa Lawa tɔ́n pɛ Samayeli ni: «Ǹ bɛ́ giɛ màn mɛn li, bɛ zɛnaa. Kii kɔ ǹ la.» Bɛ kio, Samayeli pɛ Izirayeli minin tumaa nɛ mà didie nə n bɔyaa a wo a kiwi.