Samayeli1 31 - LAWA A BOO SONBORE 2011

Sayulu a gɛ̀

¹ Filisiti minin lɛn nə́ yoo ka zia nɛ Izirayeli minin ganaa. Izirayeli minin lɛn nə́ n gòã da baa nɛ Filisiti minin lɛn nyɛɛnɛ, sɛnɛ, Filisiti minin lɛn nə́ ǹ dɛ ǹ nə́ ǹ kaa tán Gilboa kele la.

² Filisiti minin lɛn nə́ Sayulu laanka a nɛgiĩn da ǹ yii ni. Ǹ ná a nɛgiĩn lɛn tumaa dɛ, Zonaatan nɛ, Abinaadaabu ni ka Malkisuwaa nɛ.

³ Zia lɛ a guguru yɔrɔ na á n dia Sayulu la. Min mɛnɛn bɛ́ sa zuĩ, bɛn gɔn Sayulu kũ, á wɔ a ganaa.

⁴ Sayulu pɛ a ziabaa ǹ mànan-gũli ni: «N gɔya woɛ̃ a kii ni, n masɛ fɔ̃ nɛ, ń giɛ Lawa doɛ̃baã wolen kɛn baran da ma fɔ̃, ǹ sàn kɔ ka ma-n wa.» Sɛnɛ, a ziabaa ǹ mànan-gũli lɛ nə́ n piã, a giala, nyɛ́ɛ goã a ganaa taãn-taãnɛ. Sayulu tɔ́n a din a gɔya saa, á bɔ á n wɔ lɛ tán.

⁵ Sayulu a ziabaa ǹ mànan-gũli lɛ bɛ́ á yɛ mà Sayulu gã, a dɔ bɔ á n wɔ a gɔya lɛ, á gã kun ka Sayulu ni.

⁶ Sayulu ni, a nɛgiĩ sɔɔ lɛ nɛ, a ziabaa ǹ mànan-gũli lɛ nɛ, ka a minin tumaa nɛ, ǹ nə́ gã kun bɛa pinaa kɛ lɛ nɛ.

⁷ Izirayeli minin mɛnɛn nə goã giã-n Zizereyɛli a nyankɔrɔ lɛ a wàã kɔsɔ-a, ka ǹ mɛnɛn nə goã Zurdɛ̃ tà a lɛ̀giala gɔn la, ǹ bɛ́ ǹ nə́ yɛ mà Filisiti minin nə́ boo Izirayeli minin la, ǹ nə́ Sayulu laanka a nɛgiĩ sɔɔ dɛ, bɛn nə́ baa si ǹ nə́ ǹ kiwin toa walan. Bɛ kio, Filisiti minin lɛn nə́ dɔ, ǹ nə́ giã bɛa kiwin lɛn nɛ.

⁸ Bɛa lɛawaa, min mɛnɛn nə gã, Filisiti minin lɛn nə́ daa, mà maǹ die bɛn mànan wɛɛ, ǹ nə́ Sayulu laanka a nɛgiĩ sɔɔ yɛ tán ǹ nə́ gã Gilboa kele la.

⁹ Ǹ nə́ Sayulu mìi kuru, ǹ ná a ziabaa ǹ mànan goa. Ǹ nə́ Filisiti minin gána lɛ a bǎãn kɔ kɔn ka Sayulu mìi lɛ nɛ, bɛ̀ ǹ tá a boo diɛ ǹ dì kionən ne, ǹ nə́ pipii zaman dɔ nɛ.

¹⁰ Ǹ nə́ Sayulu a ziabaa ǹ mànan kaa dì Asitartee guguru kɔ ǹ kion, ǹ ná a gere dere Bɛti-Seyan kiwi a kungɔn ganaa.

¹¹ Filisiti minin nə sii mɛn zɛnaa Sayulu ni, bɛ kaa Galaati gána a kiwi Zaabɛsi minin too ne.

¹² Giĩn mɛnɛn bɛ́ doa boe ǹ nə́ la ǹ miãn manɛ, bɛn nə́ zii saa, ǹ nə́ tèlò goon tumu tɔ wɔ ǹ nə́ woo Sayulu laanka a nɛgiĩn lɛn geren waa ǹ nə́ ǹ bɔ Bɛti-Seyan kiwi a kungɔn ganaa. Ǹ bɛ́ ǹ nə́ n bɔyaa ǹ nə́ daa Zaabɛsi kiwi, ǹ nə́ Sayulu laanka a nɛgiĩn lɛn gere tã walan.

¹³ Ǹ nə́ ǹ wen goa, ǹ nə́ ǹ bĩ, tamarisi da kɔn giulun Zaabɛsi kiwi. Bɛ kio, ǹ nə́ n lɛ sɔɔ lɛawaa sɔbaa.