Samayeli1 28 - LAWA A BOO SONBORE 2011

Filisiti minin zia da Izirayeli minin ganaa

¹ Bɛa biikoo lɛ li, Filisiti minin nə́ ǹ sɔraasin sɔkɔn, ǹ nə́ die yui ka zia nɛ, Izirayeli minin ganaa. Akiisi pɛ Davida nɛ: «A dɔ̃ mà n tá re woe kun ka masɛ nɛ zia la n din laanka n minin ni.»

² Davida pɛ Akiisi ni: «Ma bɛ́ re sii mɛn zɛnɛɛ, n dinmaa lɛ tá re bɛ doɛ̃.» Akiisi tɔ́n pɛ Davida nɛ: «Bɛ̀ ń bɛ zɛnaa sɛn, masɛ n die n biɛ ma din lɛduə̃li lɛa miɛ̃ yǎa duduu.»

³ A da yaa, Samayeli bɛ́ á gã, Izirayeli kuturu ná a gɛ̀ koa, ǹ ná a gere bĩ a kiwi, Ramaa. Sayulu dinmaa dɔ́ goã á wɔ-kũ laanka boobaa dí nyɛɛ papaã á bɔ gána lɛ nɛ.

⁴ Ǹ kɔn pinaa Filisiti minin lɛn nə́ n sɔkɔn, ǹ nə́ daa giã Sunɛmu. Sayulu dɔ́ Izirayeli minin tumaa sɔkɔn, ǹ nə́ giã Gilboa.

⁵ Sayulu bɛ́ á Filisiti minin sɔraasin lɛn yɛ, nyɛ́ɛ kũ, foo biɛ na gole nə́ n daa la.

⁶ Sayulu nɔ̀n da Dɛnaa Lawa la, sɛnɛ, Dɛnaa Lawa na a lɛ si wa. A na a lɛ si ka narɛ-n wa, a na a lɛ si ka buun diɛ-n wa, a boo kɔn dɔ da a boo gii-dalin manɛ mà ǹ pɛ-n wa.

⁷ Sayulu pɛ a dí-nyalin manɛ: «Lɔ mɛn nə́ ke boobaa ǹ dí nyɛɛ, ka ga bɛ li, ma die ma wo n gɔn koa la.» A dí-nyalin lɛn nə́ pɛ nɛ mà lɔ goon tá Ɛn-Dɔɔrɔ kiwi, nyín bíi.

⁸ Sayulu mɔnaa kɔsɔn wɔ a din ganaa màn mɛn bɛ́ toɛ, ǹ fɔ̃ a ganaa. Á woo kun ka giĩ min paa nɛ, ǹ nə́ dɔ lɔ lɛ li tèlò-n. Sayulu pɛ lɔ lɛ-n kɛnɛn: «Ma bɛ́ re min mɛn pii n ni, bɛ nyín bíi.»

⁹ Lɔ lɛ pɛ nɛ: «Á ke, Sayulu bɛ́ á sii mɛn zɛnaa, táa n dinmaa lɛ á bɛ doɛ̃: Ń boobaa ǹ dí papaã ń bɔ gána lɛ nɛ. Wàa na á baa, ń tá gɛ̀ dɛ ǹ kan kɛ koɛ masɛ nɛ?»

¹⁰ Sayulu nə́ n liɛ ka Dɛnaa Lawa tɔ nɛ, á pɛ: «Dɛnaa Lawa yii á koo, màn kɔn ba re yii sii kɛ lɛ gɔ́ɔ̃-n wa.»

¹¹ Lɔ lɛ nə́ n toa: «Ma n giɛ li ma die nyín bíi ma kɔ n la?» Sayulu pɛ mà a Samayeli bíi.

¹² Lɔ lɛ bɛ́ á Samayeli yɛ, á bubui da. Á pɛ Sayulu ni mà wàa na á baa, á ná asɛ bebele? Mà a da yaa, a din lɛ dɔ n Sayulu lɛa!

¹³ Kii lɛ pɛ nɛ mà nyɛ́ɛ baran kũ wa. Sɛnɛ, mà a ná á wàa yɛ? Lɔ lɛ pɛ Sayulu-n kɛnɛn: «Ma gere nyín goon yɛ soe tán.»

¹⁴ Sayulu nɔ̀n da lɔ lɛ la mà gere nyín lɛ na á bɔ wàa li. Lɔ lɛ ná a lɛ si mà giĩ goon ne soe die, dɔnkɛ gole ná a ganaa. Sayulu dɔ̃ mà Samayeli ni. Á n zuməə tán a lɛ la, á n musin kuruməə tán.

¹⁵ Samayeli pɛ Sayulu ni: «Wàa na á baa n ma bíi, ń maa susui lɔlɔkɔn?» Sayulu pɛ: «Ma n nyɛ́ɛ gole gɔ́ɔ̃ nɛ. Filisiti minin man zia diɛ ma-a, Lawa nə́ n wɔlɔ lui ma ganaa. A ba ma lɛ sii doo wa. A ba Lawa a boo gii-dalin hinlaa narɛɛn siɛ doo a tá ma lɛ sii-n wa. Bɛ lɛ nɛ, ma lɛ dia n la, màn mɛn bɛ́ toɛ, ma doamaa bɛ́ nɛ ma sii mɛn zɛnaa, n bɛ pɛ ma nɛ.»

¹⁶ Samayeli tɔ́n pɛ nɛ: «Sɛnɛ, wàa na á baa n tá nɔ̀n diɛ masɛ la n din dɔn doɛ̃ mà Dɛnaa Lawa nə́ n bɔ n li, á n baa a zɔ́ɔ lɛa.

¹⁷ Ma goã má Dɛnaa Lawa a boo mɛn pɛ n nɛ, a din lɛ a sii n ke Dɛnaa Lawa zɛnaa. Dɛnaa Lawa ná a kiibaa lɛ kũ á si n la á kɔ min kɔsɔ la. A na á kɔ Davida la.

¹⁸ A giala, n Dɛnaa Lawa bɔlɔ si wa, ka bɛ dɔ nɛ, n Amalɛki dɛ, n Dɛnaa Lawa foo basã-n wa. Bɛ lɛ nɛ, Dɛnaa Lawa zɛnaa n nɛ kɛnɛn pelo lɛn.

¹⁹ Dɛnaa Lawa tá re Izirayeli minin lɛn dɔn we Filisiti minin gɔn, kun ka n din ni. Biɛ̃ dinin n din laanka n nɛnyaanan tá re goɛ̃ kun ka masɛ nɛ. Izirayeli a sɔraasin lɛn dɔn dinin, Dɛnaa Lawa tá re ǹ we Filisiti minin gɔn.»

²⁰ Boo lɛ a diɛmaa-n gɔrɔ, Sayulu bɔ á mɛnaa tán ka selele, a giala, Samayeli boo mɛn da, á nyɛ́ɛ da a ganaa parsiini. Ka bɛ dɔ nɛ, pàã goã a lon wa, a giala, á penleen laanka tèlò yii zɛnaa a màn kɔn wɔ a lɛ-n wa.

²¹ Lɔ lɛ daa Sayulu genli, á yɛ Sayulu gɔ́ɔ̃ yii nə́ n lɔlɔkɔn. Á lɛ pɛ Sayulu ni: «Á ke, n bɛ̀rɛlɔ nə́ n too kɔ n lon. Má n din da gɛ̀ gɔn lɛ-a, sɛnɛ, n boo mɛn yii pɛ masɛ nɛ, má si.

²² Kanna kəni, bǐɛ̃ kɔ, n nə n too kɔ n bɛ̀rɛlɔ a boo ganaa. A toa ma màn-bii kɔn kɔ n la n bii, bɛ á die toɛ, n pàã yɛ n tɔn nə n zii saa.»

²³ Sayulu nə́ n piã á pɛ mà asɛ a die màn bii wa. Sɛnɛ, a dí-nyalin lɛn laanka lɔ lɛ nə́ n laa a ganaa, á tɔ́n nə ǹ bɔlɔ si. Á yoo á n bɔ tán, á giã piì la.

²⁴ Dii ten goã lɔ lɛ lon a tá toe. Á n nanaa á bɛ dɛ. Á wùsu saa á yaa kooro, yɔ bù ná a ba li wa, á buuru da nɛ.

²⁵ Á mànbii da tán Sayulu laanka a dí-nyalin lɛn giulun ǹ nə́ bii. Bɛ kio, ǹ nə́ yoo ǹ nə́ kaa zii la, ǹ nə́ woo a din tèlò kɛ lɛ nɛ.