Samayeli1 25 - LAWA A BOO SONBORE 2011

Samayeli a gɛ̀

¹ Samayeli gã. Izirayeli minin tumaa nə́ n sɔkɔn ǹ ná a gɛ̀ koa. Maǹ nə́ bĩ a din a piɛ, Ramaa kiwi. Davida zii saa á woo Paaran diə gole nɛ.

² Giĩ goon na á goã, a tɔ n Naabaali a lɔ tɔ n Abigayili, a n boe Maahɔ̃ kiwi, Kalɛbu a tanlɛ min ni. Dí nya ǹ bǎã goã a lon Karmɛli kiwi. A na á goã pàãma lɛa taãn-taãnɛ. Sère duu sɔɔ (3 000) na á goã a lon ka bòe duu goon (1 000) ne.

³ A lɔ Abigayili goã siĩni, yiri ná a lon, sɛnɛ, Naabaali din sɔ̀n nə́ goã kaka, min baraa lɛa. Naabaali na á goã á woo a sèren ka kuru Karmɛli kiwi.

⁴ Davida nə́ n toa diə gole lɛ nɛ á ma, mà Naabaali tá a gialaa a sèren ka kuri.

⁵ Davida tɔntɔraa fù dia. Á pɛ tɔntɔraan lɛn manɛ: – Ka wo Karmɛli kiwi, ka á re woe Naabaali yiɛ, ka die ka masɛ a fòo da nɛ. Ka die ka pɛ-n kɛnɛn:

⁶ «Lawa die a nyin sasa kɔ n la, a là nyantoro kɔ n din laanka n kion minin la, a n gɔn pã a da n lon.

⁷ Ma á miɛ mà n tá a gialaa n sèren ka kuri. Wɔ n giɛ li n dɔ̃, mà n sèren-lɛduə̃lin lɛn man nə́ goã kun ka wɔsɛn nɛ. Wɔ ǹ dɛ wa, ka bɛ dɔ nɛ, ǹ biikoo mɛn tumaa zɛnaa Karmɛli kiwi, ǹ màn kɔn papaã wa.

⁸ Nɔ̀n da n tɔntɔraan lɛn la, ǹ tá re pii n ni. Maa dí-nyalin kɛn kũ doɛ̃, a giala, wɔn wɔ́ daa zɔ́n pinaa! Bǐɛ̃ kɔ, bɛ̀ n tá boe la n màn mɛn kɔ n dí-nyalin lɛn laanka n nɛgiĩ Davida la, n bɛ kɔ.»

⁹ Davida a minin lɛn bɛ́ ǹ nə́ dɔ, ǹ nə́ kɔ boon lɛn tumaa lɛ, ǹ nə́ pɛ Naabaali ni ka Davida tɔ nɛ. Bɛ kio, ǹ nə́ tɔ́n nə n yii da.

¹⁰ Naabaali Davida a dí-nyalin lɛn lɛ si á pɛ: «Die n ka Davida nɛ? Bɛ̀rɛ gigiã tan pelo, ǹ nə́ ǹ toɛ n dɛnaagiĩ li, baa sii papaɛ̃.

¹¹ Masɛ á re yui kəni, ma maa buuru saa, ma maa mu saa, ma maa sèren ka-kurulin siĩ saa ma kɔ minin la, man ma ba ǹ bɔ ǹ bǎã dɔ doɛ̃ wa?»

¹² Davida a minin lɛn nə́ n bɔyaa, ǹ nə́ n basa kũ ǹ nə́ woo. Ǹ bɛ́ ǹ nə́ dɔ, ǹ nə́ bɛa boon lɛn yii gũ ǹ nə́ pɛ Davida nɛ.

¹³ Davida pɛ a minin manɛ: «Didie na a gɔya da a din ganaa!» Didie ná a gɔya da a din ganaa. Davida dɔ ná a gɔya da a din ganaa. Min biɛsii (400) kɛ miã kɔ Davida lɛ, ǹ nə́ woo, min biɛpaa (200) golee ǹ nə́ giã guĩn li.

¹⁴ Naabaali a minin lɛn goon nə́ boo lɛ lɛ pɔrɔ Naabaali a lɔ Abigayili ni. Á n toa: «Á ke, Davida na á n toa diə gole ne, á minin dia mà ǹ da fòo sonbore da wɔsɛn dɛnaagiĩ ni, sɛnɛ, wɔa dɛnaagiĩ yoo á yiɛ ǹ ganaa.

¹⁵ A da yaa, bɛa minin kɛn lɛn nə́ wɔ kũ doɛ̃ sɔnbɔraanɛ. Wɔ bɛ́ wɔ́ goã don lɛ nɛ, n wɔ dɛ wa. Wɔ tɔ wɔ kunun ǹ ni biikoo mɛn yii li, wɔa màn kɔn papaã wa.

¹⁶ Wɔ bɛ́ wɔ́ tɔɔn lɛduə̃ ǹ li, biikoo mɛn yii li, maǹ nə́ n baa ka kungɔn bɛ́ lɔn, ǹ nə́ wɔ tamaa, peleen laanka tèlò ne.

¹⁷ Sisia, n doamaa bɛ́ nɛ n sii mɛn zɛnaa, ga bɛ li n dɔ̃ a giala, Davida laanka a minin lɛn man nə́ golee wɔa dɛnaagiĩ laanka a kion bɔ̀n baa li. Naabaali dinmaa lɛ sɛ sɔ̀n bɛ́ bɔbɔnɛɛ, min bɛ́ a ba doe a li ka boo-n wa.»

¹⁸ Abigayili nə́ n nanaa á buuru mìi biɛ paa goa, yɔ bɔnaa paa nɛ, sère sooro siĩ ni, *belee nàn paparɛɛ pán yii sooro ne, Zuifun rezɛ̃ laa san paabiɛ (100) nɛ, ka Zuifun takɔlɔ mìi biɛpaa nɛ.

¹⁹ Á ǹ kaa dundunun la. Á pɛ a dí-nyalin lɛn nɛ mà ǹ kiɛ̃ asɛ nyɛɛnɛ, asɛ die a kɔ ǹ kio lɛ. Sɛnɛ, a na a boo da ǹ zuũ Naabaali lɛ-n wa.

²⁰ A Abigayili toa kiɛ̃ kele kɔ́sɔ nɛ, dundun la, Davida laanka a minin nə́ goã tɔ we woe bɛa bǎã lɛ li, Abigayili nə́ n da ǹ lɛ.

²¹ Davida na á goã taasɛ kɛnɛn: «Masɛ n ma giĩ kɛ lɛ gɔn màn tumaa tamaa diə gole ne, ǹ kɔn papaã wa. Bɛ na á kooro baa koɛ! Á bǐɛ̃ saraa ma la ka baraa nɛ.

²² Bɛ̀ má toa lɛ̀ waa giĩ ganaa a yii n koo Naabaali a kion kɛ nɛ, Lawa die a dɔlɔ babaraa bɔ ma ganaa.»

²³ Abigayili bɛ́ á Davida yɛ, á n nanaa, á gisĩ dundun lɛ la. Á bɔ, á mɛ a lɛ la tán Davida yɔrɔ-a, á n musin doa tán.

²⁴ Bɛ kio, á n musin kurumaa tán Davida giulun á pɛ nɛ: «Maa dɛnaagiĩ, ma din zɛ̀rɛ nɛ! Sɛnɛ, ma nə n nyankoe n toa ma boo da. Bǐɛ̃ kɔ n nə n too kɔ ma lon.

²⁵ N baran ga Naabaali sɔ̀n bɔbɔnɛɛdɛnaa kɛa sii ganaa wa, a giala, Naabaali tɔ lɛ na a ganaa, tɔ mɛn giala bɛ́ pii mà gaãnaabaa. Sɛnɛ, masɛ a dɛnaagiĩ minin mɛnɛn dia, masɛ nə ǹ yɛ wa.

²⁶ Dɛnaa Lawa din nə n kurəə, n baran dòo bɔ n zɔ́ɔn ganaa, n nə ǹ dɛ wa. Sisia, Dɛnaa Lawa Yiikoonaa tɔ lɛ taman yii, masɛ n pii n ni, máa n zɔ́ɔn laanka min mɛnɛn yii tumaa bɛ́ giɛ mà ǹ sii baraa zɛnaa n nɛ, dɔlɔ tá re n boe ǹ ganaa ka Naabaali wɔ bɛ́ lɔn.

²⁷ Sisia, n bɛ̀rɛlɔ bɛ́ die n guguru koe ka màn mɛn nɛ, minin mɛnɛn bɛ́ kunun n ni, a si n gii ǹ ni.

²⁸ Bǐɛ̃ kɔ n nə n bɛ̀rɛlɔ a sã toa nɛ. Dɛnaa Lawa tá re n biɛ kii lɛa, a nə n nɛnyaanan dɔn baa a lɛa, a giala, ń zian da, Dɛnaa Lawa a lɛa. N yiikoonaabaa tumaa gɔ́ɔ̃ nɛ, min baran baraa yɛ n paǹ li wa.

²⁹ Min nə́ yoo n gialaa, á n giɛ li a n dɛ, n gã, sɛnɛ n Lawa, Dɛnaa Lawa lɛ á die n tamaɛ, ka min bɛ́ pàãmabaa ǹ màn tamaɛ lɔn, màn kɔn ná a ba toɛ̃ n ganaa wa. N zɔ́ɔn kɛn sɛn, Dɛnaa Lawa á re ǹ lɛ koe, ka min bɛ́ kɔlɔ diɛ baragii ni a zũ lɔn.

³⁰ Dɛnaa Lawa lɛ-kɔ kɔ̃ɔn mɛn yii wɔ maa dɛnaagiĩ la, Dɛnaa Lawa bɛ́ re bɛ lɛ piɛ̃ ǹ mɛn waáraa, a n die n koɛ Izirayeli a kii lɛa.

³¹ Maa dɛnaagiĩ, n baran mà kaa kooro, n nə n din a dòo bɔ, bɛ taasiɛ da n ganaa, a n foo zɛ̀rɛbaa wa. Bɛ̀ Dɛnaa Lawa bǐɛ̃ zɛnaa maa dɛnaagiĩ ni ǹ mɛn waáraa, n yiri die a gisĩ ka n bɛ̀rɛlɔ nɛ.»

³² Davida pɛ Abigayili-n kɛnɛn: «Barka tá Dɛnaa Lawa ganaa, Izirayeli a Lawa lɛ, asɛ mɛn bɛ́ á Abigayili dia á daa n da ma lɛ pelo!

³³ N yiri sonbore mɛn kɔ ma la, ma á barka diɛ n nɛ bɛa lɛa. A giala, n nə n da masɛ lɛ, mà ma baran gɛ̀ dɛ wa, mà ma baran ga gɔ̀lɔ̀baa li ka ma din pàã-n wa.

³⁴ Sɛnɛ, Izirayeli a Lawa, Dɛnaa Lawa lɛ yii á koo! A din lɛ na á masɛ kurəə, ma sii baraa zɛnaa Abigayili-n wa. Bɛ̀ n bie ń daa n da ma lɛ fufuu kɛnɛn wa, bɛ̀ kànaa laanka lɛ̀ a waa nɛ, bɛ̀ giĩ goon ba re goɛ̃ a yii n koo Naabaali a kion wa!»

³⁵ Abigayili da bǐɛ̃baa ǹ màn mɛn kɔ Davida la, Davida nə́ n gɔn dia á si. Davida pɛ Abigayili dinmaa lɛ-n kɛnɛn: «Wo piɛ ka là nyantoro ne. Ga, má n too kɔ n lon, má bǐɛ̃ kɔ n ganaa.»

³⁶ Abigayili nə́ n bɔyaa á daa Naabaali li, bɛ̀ a bɛ́ kiin zɔ́n tɔrɔ zɛnɛɛ a piɛ. Naabaali foo goã kɔɔ̃nɛ. Yɔ goã a yii ganaa taãn-taãnɛ. Abigayili boo kɔn pɛ-n wa, yǎa lɛ̀ waa.

³⁷ Bɛa baayɛlɛ Naabaali a yɔ lɛ bɛ́ á toɛ̃ á n bɔ a yii-a, sii mɛn nə n zɛnaa, a lɔ bɔ a boo ne á pɛ nɛ. Naabaali gɔ̀nɔn yii nə́ n si la, á gole bii-a ka kɔlɔ nɛ.

³⁸ Lɛawaa fù, bɛ kio, Dɛnaa Lawa Naabaali dɛ á gã.

³⁹ Davida ma, mà Naabaali gã, á tɔ́n pɛ: «Barka tá Dɛnaa Lawa ganaa, a giala, Naabaali bɛ́ á ga ma lɛ li, Dɛnaa Lawa din na á bɔ maa lɛ-a, á ná a bɛ̀rɛgiĩ kurəə sii baraa zɛnaa ganaa. Dɛnaa Lawa na á toa Naabaali a baraabaa lɛ kũ a din mìi ni.» Davida minin dia mà ǹ wo pɛ Abigayili ni mà asɛ n giɛ li a saa lɔ lɛa.

⁴⁰ Davida na a dí-nyalin mɛnɛn dia, ǹ nə́ dɔ Abigayili li Karmɛli kiwi, ǹ nə́ pɛ-n kɛnɛn: «Davida na á wɔ dia n li, mà wɔ da pɛ n nɛ, mà asɛ n giɛ li a n saa lɔ lɛa.»

⁴¹ Abigayili yoo á n musin lɛn kuruməə tán, á n kuməə tán a lɛ la, á pɛ: «Maa dɛnaagiĩ, á ke, ma á die n bɛ̀rɛlɔ biɛ, bɛ̀ man dí-nyalin gòãn pii.»

⁴² Abigayili nə́ n nanaa á woo a li. Á dii dundun la, a bɛ̀rɛlɔ sooro goã kun ni. Davida min mɛnɛn dia, á kɔ ǹ lɛ á woo. Bɛ lɛ na á n baa Abigayili a Davida a lɔ baa lɛa.

⁴³ Davida goã dɔn á Zizereyɛli kiwi nɛ Ayiinoamu saa lɔ lɛa. Ǹ dinin min paa tumaa Davida a lɔn baa.

⁴⁴ Sɛnɛ, Sayulu goã á ná a nɛlɔ Mikaali mɛn kɔ Davida la lɔ lɛa, á kũ á si la, á kɔ Layiisi a nɛgiĩ Palti la, boe Galimu kiwi.